काठमाडौं– परराष्ट्रमन्त्री नारायण खड्काले नेपाल र भारतबीचको घनिष्ठ र मैत्रीपूर्ण सम्बन्धलाई नयाँ उचाइमा पुर्याउनका लागि प्रधानमन्त्री शेरबहादुर देउवाको भ्रमण अत्यन्त सकारात्मक भएको बताएका छन्।
आइतबार स्वदेश फर्किएपछि त्रिभुवन विमानस्थलमा आयोजित पत्रकार सम्मेलनमा उनले भ्रमणले त्यसमा महत्त्वपूर्ण योगदान गरेको कुरा प्रतिनिधिमण्डलका सदस्यलाई पनि अनुभूति भएको बताए।
'यो बीचमा कोभिडका कारणबाट यस्ता उच्चस्तरीय भ्रमण भइरहेका थिएनन्', उनले भने, 'नेपाल-भारतको सम्बन्ध बहुआयामिक छ। घनिष्ठ छ, मैत्रीपूर्ण छ, तर बहुआयामिक पनि छ। त्यसैले नेपाल-भारतबीच भएका आपसी हितका बारेमा बडो खुलेर छलफल भयो। त्यो नै ठूलो उपलब्धि हो।'
उनले यो भ्रमणले नेपाल-भारतको सम्बन्धलाई अझ प्रगाढ र नयाँ उचाइमा पुर्याउनेमा प्रधानमन्त्री देउवा समेत विश्वस्त रहेको बताए।
'भारतले पनि यसलाई अत्यन्त महत्त्व दिएको हुनाले नेपाल-भारत बीचको सम्बन्ध प्रधानमन्त्रीज्यूको भ्रमणबाट अझ बढी प्रगाढ र अझ बढी गहिरो र अझ बढी उचाइमा पुग्ने कुरामा उहाँहरुले पनि विश्वास गर्नुभएको छ', मन्त्री खड्काले भने।
परराष्ट्रमन्त्री खड्काले नेपाल–भारतबीचको सीमासम्बन्धी विवादका विषय कूटनीतिक संयन्त्रको वार्तामार्फत् समाधान गर्ने विषयमा छलफल भएको पनि बताए। उनले कालपानी, लिपुलेकलगायत क्षेत्रको विवाद अब परराष्ट्रमन्त्री स्तरीय र अन्य संयन्त्रमा छलफल हुने बताए।
भारत भ्रमणको विषयमा देउवाले आलोचना खेपेको विषयको भने मन्त्री खड्काले बचाउ गरे।
आफ्नो भारत भ्रमणको पहिलो दिन (शुक्रबार) देउवाले भारतीय सत्ताधारी दल भारतीय जनता पार्टी (भाजपा)को मुख्यालय पुगेका थिए। देउवाले भाजपा मुख्यालय पुग्नु कूटनीतिक मर्यादा विपरीत भएको भन्दै आलोचना भएको थियो।
परराष्ट्रमन्त्री खड्काले देउवा भाजपा मुख्यालय पुगेको विषय कूटनीतिक मर्यादा विपरीत भएको भन्ने कुरा ठिक नभएको बताए।
भाजपा कार्यालयमा देउवाले गरेको भ्रमण प्रधानमन्त्रीको रुपमा नभइ कांग्रेस सभापतिको रुपमा भएको खड्काको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
