करण केसीको ब्रिलियन्ट अचिभ्मेन्ट!

क्रिकेट

दीप सुवेदी बिहीबार, चैत १७, २०७८ २१:११

विश्व क्रिकेटमा ह्याट्रिक विकेट व्यक्तिगत सफलता मात्र हो, यसको खासै महत्त्व हुँदैन। तर, यसले खेलाडीको प्रदर्शनलाई भने निक्कै हौसला दिन्छ।

बिहीबार कीर्तिपुर क्रिकेट मैदान पपुवा न्यू गिनीविरुद्धको टी२० आई खेलमा तीव्र गतिका बलर करण केसीले यस्तै उपलब्धि हासिल गरे। उनले लगातार ३ विकेट लिए, त्यो पनि एकै खेलमा। तर, त्यो अन्य ह्याट्रिक विकेटभन्दा फरक थियो।

सन् २०१५ मा नेदरल्यान्डविरुद्ध टी२० आईमा डेब्यू गरेका करणले यसअघि यस्तो उपलब्धि हासिल गर्न सकेका थिएनन्। तर, बिहीबार यो उपलब्धि मात्रै होइन, उनले एकै खेलमा ५ विकेट लिएर राष्ट्रिय कीर्तिमानसमेत कायम गरे। यसअघि नेपालका कुनै पनि खेलाडीले एकै खेलमा ५ विकेट लिएका थिएनन्। न त कसैले ह्याट्रिक नै गरेका थिए।

यसअघि टी२० आईमा उत्कृष्ट प्रदर्शन ४ विकेट रहँदै आएको थियो। करणले पनि यो उपलब्धि हासल गरिसकेका छन्। उनले टी२० आईमा दुईपटक ४ विकेट लिएका छन्।

ओडिआईमा भने अर्का तीव्र गतिका बलर सोमपाल कामी र लेग स्पिनर तथा कप्तान सन्दीप लामिछानेले ५ विकेट लिइसकेका छन्। करणले तीनपटक ४ विकेटसम्म लिएका छन्। ५ विकेटको सफलता भने प्राप्त गर्न बाँकी छ।

तर, करणले टी२० आईमा सोमपाल र सन्दीपलले भन्दा अगाडि ५ विकेट लिए। यो ५ विकेटसँगै ५० को आँकडा पनि पूरा भएको छ।

बिहीबार पपुवा न्यू गिनीविरुद्धको खेलको पहिलो ओभरको चौथो बलमा लेगा सियाकालाई १ रनमा आसिफ शेखबाट क्याच गराउँदै करणले आफ्नो ५०औं टी२० आई विकेट पूरा गरेका थिए।

टी२० अन्तर्राष्ट्रिय क्रिकेटमा ५० विकेट पूरा गर्ने उनी दोस्रो नेपाली बलर हुन्। यसअघि सन्दीप लामिछानेले उक्त सफलता हात पारेका थिए। करणले यो उपलब्धि हासिल गर्न ३७ खेल खेले। सन्दीपले ५० विकेट पूरा गर्न २९ खेल खेल्नु परेको थियो।

तर, आफूले भने ५० विकेट लिन्छु भन्ने केही नसोचेको उनी बताउँछन्। ‘क्रिकेट खेल्ने हो, जहाँसम्म पुगिन्छ पुगिन्छ भन्ने लागेको थियो। भविष्यमा कति रेकर्ड बन्छ, कति भंग हुन्छ,’ उनी भन्छन्।

५० विकेट लिसकेका करणले नै असाद भालालाई तेस्रो ओभरको दोस्रो बलमा सोमपाल कामीबाट १ रनमा क्याच गराए। यी दुई ओभरमा निकै किफायती बलिङ गरेका करणलाई कप्तान सन्दीपले १७औं ओभरमा व्यक्तिगत तेस्रो ओभर फ्याँक्न पठाए। तर, करण अघिल्ला दुई ओभरमा जति किफायती देखिएनन्। उनको ६ बलमा नर्मन भानुआ र सेसे बाउले एक छक्का र एक चौकासहित १४ रन बनाए।

यसपछि नेपालको अन्तिम ओभरमा बलिङ गर्न आएका करणले उत्कृष्ट पुनरागमन गरे। २०औं ओभरको पहिलो बलमा रन नदिएका करणले त्यसपछि लगातार तीन बलमा क्रमश : चाद सोपार, सिमोन अटाई र नैसान पोकनाको विकेट लिए।

उनले २०औं ओभरको दोस्रो बलमा चाद सोपारलाई २ रनमा रोहित पौडेलबाट थर्डमा क्याच गराए। तेस्रो बलमा शिमोन आतीलाई बोल्ड गरे। र, अटेईलाई आउट गरेपछि कीर्तिपुर मैदानमा ‘ह्याट्रिक ह्याट्रिक’ भनेर दर्शकको ठूलो आवाज सुनियो। र, भयो पनि त्यस्तै।

चौथो बलमा पुछारमा ब्याटिङमा आएका नोसेइना पोकानाको ब्याटमा लागेर बल माथि उठेलगत्तै करणले खुसी मनाए। उक्त बल दीपेन्द्रसिंह ऐरीले समातेपछि टी२० क्रिकेटमा नयाँ कीर्तिमान मात्रै बनेन, पपुवा न्यू गिनी अलआउट भयो र नेपाल ३७ रनले विजयी हुँदै फाइनलमा पुग्यो।

जारी प्रतियोगितामा नेपालको लगातार तेस्रो जित हो। नेपालले यही प्रतियोगिताको पहिलो खेलमा पपुवा न्यू गिनीलाई १५ रनले हराएको थियो। दोस्रो खेलमा भने मलेसियामाथि ६ विकेटको जित निकाल्यो।

खेलपछि बल क्याच नै नभइ किन खुसी मनाएको भन्ने सञ्चारकर्मीको प्रश्नमा करणले भने, ‘क्याचमा दिप्पी (दिपेन्द्रसिंह ऐरी) थियो, उमाथिको विश्वासले क्याच नहुँदै सेलिब्रेट गरेँ।’

नेपाली बलरको टी२० को उत्कृष्ट बलिङ यहीँ नै हो भन्ने उनलाई खेलका दौरान भने थाहा थिएन। उनी आफ्नो उत्कृष्ट खेल्ने कोसिस गरिरहेको बताउँछन्।

‘यो बलिङ प्रदर्शन नेपाली बलरको उत्कृष्ट प्रदर्शन हो भन्ने थाहा थिएन। सबैले फिल्डिङ प्लान नै गरिरहेका थिए। मैले पनि ब्याट्सम्यानले डिफेन्स गर्छ होला भनेर सोचिरहेको थिएँ। स्लो बल फालौं भन्ने थियो,’ उनले भने, ‘म आफ्नो उत्कृष्ट खेल्ने कोसिस गरिरहेको थिएँ।’

नेपाली खेलाडीले टी२० आईमा करणले हासिल गरेको यो उपलब्धिलाई कप्तान सन्दीपले ‘ब्रिलियन्ट अचिभ्‌मेन्ट’ भनेका छन्। क्रिकेट यात्रामा पछि फर्केर हेर्दा पनि यसको महत्त्व हुने उनको तर्क छ।

‘करण केसीको स्पेल ब्रिलियन्ट अचिभ्‌मेन्ट हो। क्रिकेटमा थोरै मात्र यस्तो उपलब्धि प्राप्त हुन्छ’, सन्दीपले भने, ‘क्रिकेट यात्रामा पछि फर्केर हेर्दा पनि यसको महत्त्व हुन्छ।’

हुन पनि हो, किक्रेटमा पहिलो छक्कादेखि अन्तिमसम्म र पहिलो विकेटदेखि सर्वाधिकसम्म पनि छुट्टै कीर्तिमान बन्छ। तर, करणले अहिले हात पारेको यो कीर्तिमान कुनै नेपाली खेलाडीले बनाउन सकेका थिएनन्। शक्ति गौचनले भने सन् २०१२ मा विश्व टी२० छनोटमा डेनमार्कविरुद्ध ह्याट्रिक विकेट लिएका थिए।

खेलपछि करणले यो कीर्तिमान आफ्नो लागि विशेष रहेको बताएका छन्। उनले भने, ‘स्पेशल नै हो, ह्याट्रिक पनि, ५ विकेट पनि। टी२० आईमा यो मेरो बेस्ट फिगर नै हो। खुसी लागिरहेको छ। अब भविष्यमा अझै चार/पाँच पटक यस्तो गर्न सकुँ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।