काठमाडौं– महाअभियोग दर्ता भएर निलम्बनमा रहेका प्रधानन्यायाधीश चोलेन्द्र शमशेर जबरा विवादित फैसलाले रिहा भएका सशस्त्रका पूर्व नायव महानिरीक्षक (डीआईजी) रञ्जन कोइरालाको मुद्दा १९ महिनापछि पेसीमा चढेको छ।
श्रीमती हत्याको आरोपमा २० वर्ष कैद सजाय ठहर भएका कोइरालालाई प्रधानन्यायाधीश जबरासहितको इजलासले साढे ८ वर्षमा सीमित गर्दै राहत दिएको थियो।
उक्त निर्णय सार्वजनिक रुपमा विरोध भएर उनीविरुद्ध महाअभियोग लगाउन आवाज उठेपछि सरकारी पक्षले पुनरावेदन दायर गरेको थियो। उक्त निवेदनमा २०७७ साउन ११ गते सर्वोच्चमा दर्ता भएको थियो।
साउन १२ गते सर्वोच्चका तीन न्यायाधीशको इजलसाले निस्सा दिएको थियो। निस्सा भए लगत्तै उक्त मुद्दा लामो समयसम्म पेसी नै चढेन। मुद्दा पटक पटक पेसी तोकिने तर इजलासमा सुनुवाइ नहुने हुँदै आएको थियो। बिहीबार उक्त मुद्दा न्यायाधीशहरु आनन्दमोहन भट्टराई, अनिलकुमार सिन्हा र शुष्मालता माथेमाको इजलासमा रहेको छ।
तत्कालीन प्रधानन्यायाधीश राणा र तेजबहादुर केसीको इजलासले ११ वर्ष ६ महिना छुट दिँदै फैसला २०७७ असार १५ गते सुनाएको थियो। उक्त फैसलाविरुद्ध सरकारी पक्षले दर्ता गरेको पुनरावेदनमा न्यायाधीशहरु बमकुमार श्रेष्ठ, प्रकाशकुमार ढुङ्गाना र कुमार रेग्मीको इजलासले निस्सा दिएको थियो।
निस्सा भए लगत्तै राणाको नेतृत्वमा रहेको सर्वोच्चमा पेसी चढेन। बिहीबार उक्त मुद्दा पनि सुनुवाइ हुनसक्ने देखिँदैन। उक्त मुद्दा न्यायाधीश भट्टराईले हेर्न मिल्दैन।
उक्त मुद्दा न्यायाधीशहरु तेजबहादुर केसी, बमकुमार श्रेष्ठ, प्रकाशकुमार ढुंगाना, सुष्मालता माथेमा, कुमार रेग्मी र मनोजकुमार शर्माले हेर्न नमिल्ने सर्वोच्चले जनाएको छ।
जिल्ला अदालत र उच्च अदातलले जन्मकैद सजाय हुने ठहर गरेका कोइरालाको कैद सजाय घटाउने फैसला सर्वोच्च अदालतले सुनाएको थियो।
सजाय घटाउन माग गर्दै कोइरालाले आफू निर्दोष रहेको जिकिर गर्दै सर्वोच्च रिट दायर गरेका थिए। अदालतमा पेस भएका प्रमाण केलाउँदा रञ्जनले श्रीमती गीताको हत्या गरेको ठहर सर्वोच्चले गरे पनि सजाय भने भारी मात्रामा कटौती गरेको छ।
‘२०६८ पुस २७ गते दुई जनाबीच भएको वादविवादपछि हात हालाहाल हुँदा रञ्जनले नै हत्या गरेको पुष्टि हुन्छ,’ सर्वोच्च अदालतले गरेको फैसलाको पूर्णपाठमा भनिएको छ, ‘गीता ढकालले व्यापारका लागि पैसा मागेका कारण कोइराला दम्पतीबीच विवाद भएको र दुवै पक्षबीच झैझगडा र वादविवाद भई आवेगमा आई रञ्जन कोइरालाले धकेल्दा भित्तामा ठोकिएर गीताको मृत्यु भएको देखिन्छ।’
रञ्जनले प्रहरीसमक्ष आफैंले हत्या गरेको भनी गरेको बयान, लास जलाएको स्थानमा भेटिएका हड्डीका टुक्रा, आगोले डढेको लेडिज घडी, शरीरको आधाभन्दा बढी हिस्सा जलेको अवस्थामा फेला परेको शवको लासजाँच मुचुल्का, घटनास्थल प्रकृति मुचुल्काको व्यहोरा, घटनास्थल भेटिएका अवशेषहरू महिलाको भएको, शरीर पूरै जलेको भन्ने शव परीक्षण प्रतिवेदनलगायतलाई अदालतले प्रमाणको रुपमा स्वीकार गरी फैसला गरेको पूर्णपाठमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
