काठमाडौं- नेकपा एमालेका महासचिव शंकर पोखरेलले आगामी वैशाख ३० गते हुने स्थानीय तहको निर्वाचनमा पार्टीलाई बहुमत ल्याउने आधार पार्टीले तयार गरिसकेको बताएका छन्।
‘हिजो स्थानीय तहमा हामीले एक्लै ४५ प्रतिशत स्थान जितेका थियौं,’उनले भने,‘अब त्यो भन्दा बढी नै हामीले जित हात पार्छौं। हामीले त्यसको आधार तयार गरेका छौं।’उनले आफूहरु निर्वाचनमा नेकपा एमालेको पक्षमा जनादेश दिन आग्रह गरेर जाने बताए।
‘हामीसँग अजेन्डाको कुनै कमी छैन। जनतासमक्ष जानुपर्छ,’उनले भने,‘हिजो एमाले नेतृत्वको सरकारले थालेका विकासका परियोजना देखि लिएर महत्वपूर्ण कामका बारेमा हामीले जनताका बीचमा जानुपर्छ।’
उनले नेपालको गुमेको भूमि समेटेर नक्सा प्रकाशन गर्ने कामदेखि महत्वपूर्ण विकास निर्माणका काम अघि बढाएको भन्दै ती पूरा गर्नका लागि नेकपा एमाले नै आवश्यक भएको बताए।
‘देशभक्तिको एजेन्डा छ हामीसँग जनता समक्ष जानका लागि हामीले गुमेको भूमी समेटेर नक्सा जारी गरेका हौं,’उनले भने,‘राष्ट्रियताको सवालमा यी विषय जनता समक्ष लिएर जानुपर्छ।’
गठबन्धनमा रहेका दलहरुले मुलुकको विकास र सम्बृद्धि गर्न नसक्ने भन्दै सम्बृद्ध नेपाल सुखी नेपालीको सपना साकार गर्न एमाले नै सरकारको नेतृत्वमा आउनुपर्ने उनको भनाइ थियो।
नेकपा एमालेले विजय हासिल गरे मात्रै मुलुक समाजवादको यात्रामा अघि बढ्ने भन्दै कांग्रेसले जिते पुँजीवादको बाटो हुने बताए।
‘प्रचण्ड र माधव नेपाल पनि पुँजीवादको बाटोमा छन्। उनीहरु कम्युनिष्टको पक्षमा छैनन्,’उनले भने,‘उनीहरु त शेरबहादुर देउवाको बाटोमा गइसकेका छन्।’
उनले नेकपा माओवादी केन्द्र र नेकपा एकीकृत समाजवादीका कार्यकर्तालाई एमालेमा प्रवेश गरेर बलियो कम्युनिष्ट पार्टी निर्माण गर्ने अभियानमा एमाले रहेको भन्दै नेता कार्यकर्तालाई त्यसतर्फ केन्द्रीत हुन निर्देशन समेत दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
