प्रतिकात्मक तस्बिर
काठमाडौं– होलीमा अमर्यादित गतिविधि गरेको भन्दै काठमाडौं प्रहरीले बिहीबार १२९ जनालाई नियन्त्रणमा लिएको छ। नियन्त्रणमा लिइएकामध्ये ७ जना महिला र १२२ जना पुरुष छन्।
महानगरीय प्रहरी परिसर काठमाडौंले होलीमा मादक पदार्थ सेवन गर्ने, जबरजस्ती रंग तथा लोला दल्ने, अमर्यादित व्यहार देखाउने र शान्ति सुरक्षमा खलल पुर्याउने व्यक्तिलाई नियन्त्रणमा लिने मातहतका वृत्त, प्रभाग तथा पोस्टहरुलाई निर्देशन दिएको थियो।
प्रहरीले सबैभन्दा बढी काठमाडौंको बसन्तपुर क्षेत्रबाट ३१ जनालाई नियन्त्रणमा लिएको छ। महानगरीय प्रहरी वृत्त जनसेवाले ३१ जनालाई नियन्त्रणमा लिएको हो।
यस्तै, वृत्त बानेश्वरले २६, वृत्त स्वयम्भूले २०, वृत्त बालाजुले १२ जनालाई नियन्त्रणमा लिएको महानगरीय प्रहरी परिसर काठमाडौं जनाएको छ।
नियन्त्रणमा लिएकामध्ये सामान्य प्रकृतिका घटनाहरुमा केही समय राखेर आफन्तको जिम्मा लगाएर छाडिने प्रहरीले जनाएको छ। कानुन विपरीतका गतिविधिमा संलग्नहरुमाथि भने आवश्यक अनुसन्धान हुने प्रहरीको भनाइ छ।
प्रहरीले होलीका लागि लक्षित गरेर लागू गरेको 'विशेष' सुरक्षा योजनानुसार सवारी चेक–जाँचमा समेत कडाइ गरेको छ। होलीका दिन नियम मिच्ने ९०६ वटा सवारी साधनलाई नियन्त्रणमा लिइएको महानगरीय ट्राफिक प्रहरी महाशाखाले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
