काठमाडौं– बलिउडमा राजनीतिक फिल्मको निकै ठूलो प्रभाव छ। बलिउड फिल्म क्षेत्रमा प्रायः चुनावनजिक हुँदा राजनीतिक विषयलाई आधार मानेर बनेका फिल्महरू प्रदर्शनमा आउँछन्।
हालसालै प्रदर्शनमा आएको अनुपम खेर अभिनित फिल्म ‘द कश्मीर फाइल्स’ यसैको उदाहरण हो। विवेक अग्निहोत्रीको निर्देशनमा बनेको फिल्म अहिले भारतीय दर्शकले पनि मन पराइरहेका छन्।
कश्मीरी पण्डितको पीडामा आधारित बनेर निर्माण भएको उक्त फिल्मलाई कतिपयले भारतीय जनता पार्टीको चुनावी प्रोपोगाण्डालाई लिएर निर्माण भएको बताइरहेका छन् भने कतिपयले फिल्मले वास्तवमै कश्मीरी पण्डितहरुमाथि भएको अन्यायलाई देखाएको बताइरहेका छन्।
चुनावी समयमा प्रदर्शनमा आउने बलिउडका यस्ता फिल्मले निश्चित पार्टको धारणालाई लिएर आममानिसमा त्यसको प्रभाव पार्ने गरि निर्माण भएका हुन्छन्। बलिउडमा पछिल्लो समय यस्ता फिल्मको निर्माण पनि बढिरहेको छ। २०१९ को ‘उरी’देखि २०१७ मा प्रदर्शनमा आएको ‘एन इनसिगनिफिकेन्ट मेन’जस्ता फिल्महरु यसका उदाहरण हुन्।
उरी : द सर्जिकल स्ट्राइक
भारतमा २०१९ मा भएको जनरल इलेक्सनअघि प्रदर्शनमा आएको यो फिल्ममा विक्की कौशल मुख्य भूमिकामा देखिएका छन्। फिल्म ११ जनवरी २०१९ मा प्रदर्शनमा आएको थियो। फिल्म २०१६ मा ‘भारतीय सेनाले पाकिस्तान’माथि गरेको सर्जिकल स्ट्राइकमा आधारित रहेको छ।
‘उरी’बक्स अफिसमा निकै सफल भएको थियो। फिल्ममा भएको एक संवाद ‘हाउ इज द जोस’ फिल्म प्रदर्शन हुँदा सिनेमा हलमा पनि गुञ्जिएको थियो। फिल्म बक्स अफिसमा चर्चित र सफल भएपनि उक्त फिल्म राजनीतिक प्रोपोगाण्डाको विषयमा बनेको कुरा चर्चामा आएको थियो।
द एक्सिडेन्टल प्राइम मिनिस्टर
२०१९ जनवरी ११ मा प्रदर्शनमा आएको फिल्म ‘द एक्सिडेन्टल प्राइम मिनिस्टर’पनि बलिउडमा राजनीतिक प्रोपगाण्डाको रुपमा निर्माण भएको थियो।
२०१४ मा सार्वजनिक भएको सञ्जय बारुको सोही नामको उपन्यासमा आधारित फिल्ममा भारतीय प्रधानमन्त्री मनमोहन सिंहको कथालाई प्रस्तुत गरिएको थियो। ‘उरी’सँगै प्रदर्शनमा आएको उक्त फिल्ममा अनुपम खेरले मुख्य भूमिका निभाएका थिए।
फिल्मलाई ‘भारतीय कंग्रेस पार्टी’को प्रोपोगाण्डा फिल्मको रुपमा दर्शकले समीक्षा गरेका थिए। फिल्मले बक्स अफिसमा भने खास तहल्का मच्चाउन सकेको थिएन्।
पीएम नरेन्द्र मोदी
२०१९ मा भारतको ‘जनरल असेम्बली इलेक्सन’को परिणाम आएको दुई दिनपछि २४ मेमा प्रदर्शनमा आएको भारतीय फिल्म ‘पीएम नरेन्द्र मोदी’मा सत्ता सम्हालिरहेका भारतीय प्रधानमन्त्री नरेन्द्र मोदीको गुणगान गाइएको थियो।
फिल्ममा मोदीको भूमिकामा अभिनेता विवेक ओबेरोयले अभिनय गरेका छन्। प्रदर्शनमा आउनुअघि निकै विवादमा आएको फिल्म यही कारणले पूर्वनिर्धारित मितिभन्दा पछि सरेको थियो। फिल्मलाई चुनावअघि प्रदर्शन गर्ने बताइएको थियो। तर, भारतीय जनता पार्टी सत्तामा हुँदा विपक्षमा रहेका अन्य पार्टीले विरोध गरेसँगै फिल्मको प्रदर्शन मिति पछि सरेको थियो। विपक्षले फिल्ममाथि आचारसंहिता उल्लंघन गरेको आरोप लगाएका थिए।
एन इनसिगनिफिकेन्ट मेन
बलिउडमा भारतका विभिन्न पार्टीका नेतामाथि फिल्म बन्ने क्रममा हालसालै मुलधारको राजनीतिमा आएर शक्ति सिर्जनामा अग्रणी देखिएको आम आद्मी पार्टीका प्रमुख अरविन्द केजरीवालमाथि पनि फिल्म बन्न पुग्यो। डकुमेन्ट्री शैलीमा बनेको यो थ्रिलर फिल्ममा आपका प्रमुख अरविन्द केजरवालको विषयमा कथा समेटिएको छ।
कुश्वु रान्का र विनय सुक्लाको निर्देशनमा बनेको फिल्मलाई ‘क्राउड फण्डिङ’मार्फत निर्माण गरिएको थियो। फिल्ममा केजरीवालले भारतीय राजनीतिमा भएको भ्रष्टाचार उन्मुलनका लागि गरेको संघर्षलाई देखाइएको छ।
ठाकरे
भारतको शिव सेनाका सुप्रिमो रहेका बाल ठाकरेको जीवनमाथि आधारित रहेर ‘ठाकरे’ फिल्म बनेको थियो। फिल्ममा नवाजुद्दीन सिद्दिकी मुख्य भूमिकामा थिए। फिल्मलाई अभिजीत पानसेले निर्देशन गरेका थिए।
२०१९ को लोकसभा चुनावभन्दा पहिले प्रदर्शनमा आएको यो फिल्म निकै विवादमा आएको थियो। २३ जनवरी २०१९ मा प्रदर्शनमा आएको फिल्ममा अभिनेत्री अमृता सिंहले सिद्दिकीलाई साथ दिएकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788253593.png)
-1786602170.png)
-1786513116.png)
