काठमाडौं– सत्तारुढ जनता समाजवादी पार्टी (जसपा) विभाजनको निकट पुगेको भनेर केही हप्तायता चर्चा भइरहेका थिए। त्यसका लागि हस्ताक्षर संकलन भइरहेको भन्ने पूरक समाचार पनि सार्वजनिक भइसकेका थिए। केन्द्रीय समिति अध्यक्ष उपेन्द्र यादवको एकलौटी अघि बढ्ने शैली र अन्य नेताको शक्ति अभ्यासको चाहनाले गर्दा विवाद सिर्जना भएको, तर त्यसको उत्कर्ष भने बाहिर चर्चा भएजस्तो नभएको नेताहरुले सार्वजनिक रुपमै स्वीकार गरिसकेका छन्।
आइतबार र सोमबार बसेको केन्द्रीय समिति बैठकले डा बाबुराम भट्टराई, उपेन्द्र यादव र अशोक राई रहने तीन सदस्यीय मुख्यालय (हेडक्वार्टर) गठन गरेको छ। स्थानीय तहको निर्वाचन प्रयोजनको लागि जसपामा अब राईको पनि हस्ताक्षर प्रयोग गरिने छ। यसअघि मन्त्री बनाउँदादेखि राष्ट्रिय सभाको निर्वाचनमा उम्मेदवार छनोट गर्दा यादवले एकलौटी गरेको भन्दै भट्टराई र राई एक ठाउँमा उभिएर यादवमाथि दबाब बढाएका थिए।
बैठकपछि पार्टीमा देखिएको विवाद साम्य भएको नेता राजकिशोर यादव बताउँछन्। अरु समस्याहरु विधान अधिवेशन र महाधिवेशनबाट टुंगो लगाउने उनको भनाइ छ। 'बैठकमा धेरै विषयमा छलफल भयो। तर, मुख्य छलफल स्थानीय चुनावमा केन्द्रित भयो। त्यसले चुनावका लागि नेता र कार्यकर्तालाई उर्जा थप्ने काम गरेको छ', नेपाल लाइभसँग कुरा गर्दै उनले भने।
यसबीच ठूलै विवादबाट गुज्रिएको अर्को पार्टी हो, नेकपा (माओवादी केन्द्र)। महाधिवेशनबाट अधकल्चो केन्द्रीय समिति सदस्यहरु टुंग्याएको उसले माघ २० गतेदेखि बसेको दोस्रो केन्द्रीय समिति बैठकबाट केही सदस्यहरु थपेको छ। तर, पदाधिकारी चयनको काम भने गरिएन। अर्कोतिर, अमेरिकी सहयोग परियोजना, मिलेनियम च्यालेन्ज कम्प्याक्ट (एमसीसी)को विषयमा पार्टीभित्र देखिएको चरम विवादलाई पनि छलफलको अजेन्डा बनाइएन। एमसीसीको विरोध गरेका नारायणकाजी श्रेष्ठलाई अध्यक्ष पुष्पकमल दाहाल ‘प्रचण्ड’ले अप्रत्यक्ष रुपमा 'पार्टी छाडेर गए हुन्छ' भन्ने अभिव्यक्ति दिएपछि सो पक्ष असन्तुष्ट भएको थियो। पार्टी नै विभाजन हुने आशंका गरिएको थियो, श्रेष्ठले आफू पक्षका नेताहरुसँग छलफल पनि गरेका थिए। तर, प्रचण्डले निकै प्रयत्नका साथ श्रेष्ठलाई मनाए।
यसरी निर्वाचनको मुखमा पार्टीमा विवाद हुनसक्ने यी र यस्ता विषयलाई पछि छलफल गर्ने गरी माओवादीले थाती राखेको छ। अब उसको ध्यान पूर्णरुपमा निर्वाचनतर्फ केन्द्रित भएको छ।
पार्टीभित्र विवाद र विग्रहको कारण हुनसक्ने विषयलाई थाती राखेपछि माओवादी केन्द्रका अध्यक्ष प्रचण्ड यतिबेला देश दौडाहमा छन्। उनले केही दिनयता बागमती प्रदेश, प्रदेश १, कर्णाली प्रदेश र सुदूरपश्चिम प्रदेशका आफ्ना नेता तथा कार्यकर्तालाई प्रशिक्षण दिन भ्याइसकेका छन्। प्रदेश १ देखि सुदूरपश्चिम प्रदेशसम्म प्रचण्डले नारायणकाजी श्रेष्ठलाई पनि सँगै लिएर हिँडेका छन्। पार्टीभित्र विवाद नरहेको सन्देश दिन प्रचण्डले श्रेष्ठलाई सँगै लैजाने गरेको बुझ्न गाह्रो छैन।
कार्यकर्तामाझ पुगेर प्रचण्डले आफ्नै तागतमा चुनाव लड्ने आँटदेखि गठबन्धनको सम्भावनासम्म सुनाउने गरेका छन्। 'पहिलो जोड चाहिँ आफ्नै तागतमा निर्वाचन जित्नेगरी तयारी गरेर जानुपर्छ। सहायक रुपमा मात्रै अन्य दलसँग तालमेलको कुरालाई लिनुपर्छ', सोमबार सुदूरपश्चिम प्रदेश पुगेका उनले पत्रकारहरुसँग आफ्नो दलको रणनीति सुनाएका थिए।
एमसीसीको विषयमा अर्को सत्तारुढ दल, नेकपा (एकीकृत समाजवादी)मा पनि विवाद उत्पन्न भएको थियो। तर, अहिले त्यो विषयलाई चर्चा गर्न छाडिएको छ। पार्टीभित्रका विवादले निर्वाचनमा असर पर्ने आकलन गरेरै सो विषयलाई दबाइएको छ। सामाजिक सञ्जालमा समेत पार्टीको निर्णय विपरीत नलेख्न माधव नेपालले निर्देशन दिइसकेका छन्। बुधबार केन्द्रीय कमिटीको बैठक उद्घाटन गर्दै उनले भनेका थिए- 'कतिपय कमरेडहरुको स्टाटसहरु हेर्ने हो भने अत्यन्तै आपत्तिजनक स्टाटसहरु लेख्ने गर्नुभएको छ। म यहाँबाट भन्न चाहन्छु, यस्ता स्टाटसहरु जसले लेख्नुभएको छ, गल्ती स्वीकार गर्नुस्। दोहोर्याउने काम नगर्नुस्। किनभने अराजकतालाई यो पार्टीमा छुट छैन।'
यो पार्टीले गठबन्धनमा जोड दिएको छ। तर, गठबन्धन आफ्नो मात्रै चाहनाको कुरा नभएको पनि नेताहरुले बताउँदै आएका छन्। उसले एमालेबाट असन्तुष्टहरुको मत आफूतिर तान्ने रणनीति अख्तियार गरेको छ। उपमहासचिव गंगालाल तुलाधर भन्छन्, 'पूर्वपार्टी नेकपा एमालेभित्र विचारको स्खलन भयो। जसरी मूल नेतृत्व नै दक्षिणपन्थी अवसरवादी दलदलमा भासिँदै गयो। 'आइ लभ यु केपी बा' भन्ने संस्कृतिका जनप्रतिनिधिहरुले भ्रष्टाचारलाई नै अर्जुनदृष्टि देखेका छन्। र, आफूलाई एक प्रकारले भन्ने हो भने सम्पूर्ण रुपले समाप्त पारेका छन्। अहिले जनताले विकल्प हेरिरहेका छन्। राम्रा र असल मान्छे हाम्रातिर छन्। नराम्रा र खराब मान्छे उतातिर (एमालेतिर) भन्ने ढंगले मान्छेहरुले विश्लेषण गर्न थालेका छन्। त्यसैले यतिबेला एकीकृत समाजवादी र कलम चिह्नमा मत दिन्छौं, अरुलाई दिन्नौं भन्ने भावना विकसित भइरहेका छन्।'
कांग्रेसभित्र महाधिवेशनपछिका केही समय विवाद उत्पन्न भएको थियो। खासगरी देउवा एक्लै अघि बढेको भन्दै शेखर कोइराला पक्षका केही असन्तुष्टि सुनिने गरेका थिए। तर, अहिले कांग्रेस अभियान नै बनाएर निर्वाचनमा होमिइसकेको छ। स्थानीय निर्वाचन लक्षित 'घरघर जाऔं, कांग्रेस जिताऔं' अभियान यही फागुन २९ देखि चैत २९ सम्मका लागि तय भएर सुरु भइसकेको छ। अभियान अघि बढाउन ७७ जिल्लामा केन्द्रीय प्रतिनिधिहरु खटिएका छन्।
नेकपा एमालेभित्र विवाद सार्वजनिक हुने स्थिति छैन। तर, एमालेले पनि स्थानीय तह लक्षित योजनाहरु तय गर्न केन्द्रीय कमिटीको बैठक बोलाउने तयारी गरिरहेको छ। बैठकको अजेन्डा तय गर्न मंगलबार मात्रै सचिवालय बैठक बसेको थियो। यद्यपि, एमाले यसअघि नै निर्वाचनकेन्द्रित भइसकेको छ। उसले देशैभर अन्य पार्टीका नेता र निर्वाचित जनप्रतिनिधिलाई आफ्नो पार्टीमा भित्र्याउने कार्यलाई प्राथमिकता दिएको छ। त्यसकै लागि अध्यक्ष केपी शर्मा ओली निरन्तर देश दौडाहामा छन्।
अर्को पार्टी, लोकतान्त्रिक समाजवादी पार्टी (लोसपा) भित्र केही विवाद छन्, तर बैठक बसेको छैन। पार्टीका समितिहरु नै गठन नभएको र बैठक पनि नबसेको हुनाले सो पार्टीले भने ठोस योजना तय गर्न सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
