काठमाडौं– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले तत्कालीन प्रधानमन्त्री केपी शर्मा ओलीको खलनायकीपनले पाँच दलीय गठबन्धनको अवस्थामा आइपुगेको बताएका छन्।
सोमबार सुदूरपश्चिम प्रदेशको कैलालीमा आयोजित राजनीतिक र वैचारिक प्रशिक्षणमा बोल्दै प्रचण्डले आफूले र माधवकुमार नेपालले कांग्रेस सभापति शेरबहादुर देउवालाई प्रधानमन्त्री बन्न बारम्बार आग्रह गरेको बताए।
‘ठूलो चिज प्राप्त गरौंला, ठूलो राजनीतिक स्थायित्व गरौंला, कम्युनिस्टहरुको बृहत्तर एकतामार्फत समाजवादको यात्रामा अघि बढौंला भन्ने थियो’, प्रचण्डले भने, ‘तर, केपी ओलीका कारण त्यो कुरा सम्भव भएन। हामीले पार्टीमा निकै कोसिस गर्दा पनि सम्भव नभएपछि लिखित असहमति राख्यौं। यी सबै प्रसंगहरु संसद् विघटनसम्म पुग्यो।’
ओलीको प्रतिगमनपछि आफूले प्रतिपक्ष दलका नेता एवम कांग्रेस सभापति देउवालाई प्रधानमन्त्री बन्न निकै आग्रह गरेको प्रचण्डले बताए। ‘माधवजी र मैले बारम्बार शेरबहादुरजीलाई भेटेर प्रधानमन्त्री बनिदिनुस् भनेर धेरैचोटी अनुरोध गर्यौं। त्यसपछि मात्रै देउवाजी प्रधानमन्त्री हुन तयार हुनुभयो’, प्रचण्डले भने।
आफूलाई एमालेसँग पार्टी एकता नगरेर ५ वर्ष प्रधानमन्त्री बन्न अफर गरेपनि स्वीकार नगरेको प्रचण्डले दाबी गरे। ‘अघिल्लो निर्वाचनमा कांग्रेस र मधेसवादी दलहरुले तपाईंहरु पार्टी एकता नगर्नुस्, ५ वर्ष प्रधानमन्त्री खानुस् भनेर भन्दा पनि नैतिक दृष्टिले अस्वीकार गरेको हो’, प्रचण्डले भने, ‘तर, चार वर्ष पुग्दा नपुग्दै केपी ओलीको खलनायक भूमिका र विदेशी शक्तिसामु आत्मसमर्पण गरेपछि हामीले प्रतिगमनविरुद्ध संघर्ष गर्नु पर्यो।’
बाबुराम भट्टराई र मोहन वैद्यलाई लक्षित गर्दै प्रचण्डले किताब पढेर मात्रै हुने भए डाक्टर–वैद्यले धेरै चिज गरिसकेको हुने बताए।
‘धेरै ठूलो विद्वानहरु अहिले कहाँ छन्? किताब पढेर हुने भए भाषण गरेर हुने भए, उपदेश दिएर हुनुपर्ने भए हामीभन्दा कैयन ठूलो पार्टी नारायणमानदेखि मोहनविक्रमको हुनुपर्ने हो। तर, त्यस्तो भएन र हुँदैन’ प्रचण्डले भने, ‘विचार, संगठन, व्यवहार, संघर्षबीच समुचित तालमेल भयो भने मात्रै विचारको विकास र पार्टीको रुपान्तरण हुने, संगठन निर्माण र जनसंगठन सुदृढ हुने हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
