काठमाडौं- नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले केही दिन अघि सार्वजनिक भएर चर्चामा रहेको प्रकाश सपुतको गीतका विषयमा अहिले उत्तेजित हुनु नपर्ने बताएका छन्।
उनले यो विषयलाई सहज र स्वाभाविक रुपमा लिनुपर्ने बताए।
धनगढीस्थित गेटा विमानस्थलमा सञ्चारकर्मीहरुसँग कुरा गर्दै अध्यक्ष प्रचण्डले माओवादी 'जनयुद्ध' का क्रममा राम्रो भयो र नराम्रो भयो भन्ने दुबैपक्ष रहेको बताए।
'यो विषयमा मेरो विचारमा अहिले उत्तेजित हुनु पर्ने छैन' प्रचण्डले भने, 'तर्क वितर्क हुन्छ। पक्ष विपक्ष हुन्छ। त्यसलाई सहज, स्वभाविक रुपमा लिनु पर्छ।' तर, गीत आफूले पूरै हेर्न नपाएको प्रचण्डले बताए।
माओवादीले गरेको युद्धका कारण संघीयता, समावेशिताका विषयमा साथै, उत्पीडित जातीले केही न केही हकअधिकार पाइयो भनेर गर्व गरेर बसेको पक्ष पनि रहेको र माओवादीले वर्बाद पारो भन्ने पक्ष पनि रहेकोले यो विषय अहिले मात्र होइन सयौं वर्षसम्म उठिरहने उनले बताए।
'यो अहिले मात्र होइन हामी गइसकेपछि पनि सयौं वर्ष रहिरहने छ' प्रचण्डले भने।
प्रचण्डले जनयुद्ध लडेका लडाकुहरु विदेशी भूमिमा पसिना बगाउँन बाध्य रहेको र उनीहरुको दु:ख पूर्ण जीवन आफूले देखेको बताउँदै त्यहाँ रहेकाहरुले समेत केही अप्ठ्यारो पर्यो भने भन्न भनेको दाबी गरे।
'म कतार वा मलेसियामा जाँदा होस् । सयौंका सयौं संख्यामा त्यहाँ दुस्खपूर्ण जीवन बिताएका लडाकुहरूलाई भेटेँ', प्रचण्डले भने, 'उहाँहरूले मलाई भन्नुहुन्थ्यो कमरेड तपाईंलाई अप्ठ्यारो पर्यो भने भन्नुस् है हामी जस्तोसुकै त्याग गर्न तयार छौं हामी बिग्रेका छैनौ विचलित भएका छैनौं भन्नु भएको छ।'
१० वर्ष माओवादी द्वन्द्वलाई कथामा उतारेर शुक्रबार सार्वजनिक भएको गायत सपुतको 'पिर' प्रति नेकपा माओवादी केन्द्रका नेताहरु आक्रोशित भइरहेका बेला प्रचण्डले धेरै उत्तेजित नबन्न आग्रह गरेका हुन्। माओवादी विद्यार्थी संगठनले उक्त गीत हटाउन चेतावनी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
