काठमाडौं- नेकपा माओवादी केन्द्रका नेता वर्षमान पुनले अहिले पार्टीले पोलिटब्युरो र स्थायी समिति नबनाउने बताएका छन्। जारी केन्द्रीय समितिको बैठकबाट सो पार्टीको सांगठनिक संरचनाको निर्माण गर्ने अपेक्षा गरिएको थियो। तर, केन्द्रीय समितिले मात्रै पूर्णता पाउने भएको छ।
'हाम्रो विधानमा केन्द्रीय समिति छ, पोलिटब्युरो छ, स्थायी कमिटी छ। त्यो अहिले बन्दैन। केन्द्रीय कार्यालयको व्यवस्था छ। पदाधिकारी रहने गरी केन्द्रीय कार्यालय र महासचिवको नेतृत्वमा सचिवालयको व्यवस्था छ विधानमा। हामी अहिले सानो केन्द्रीय कार्यालय बनाउने सोच गरिरहेका छौँ। तात्कालिक भइपरी आउने कुरा केन्द्रीय कार्यालयले हेर्ने। बाँकी हामी केन्द्रीय कमिटीमै छलफल गर्छौँ। केन्द्रीय समितिले नै निर्णय गर्छौँ', पुनले भने।
उनले केन्द्रीय कार्यालय कति सदस्यीय हुने टुंगो नलागेको बताए। 'सायद अध्यक्षलाई 'हेल्पिङ ह्यान्डस्'को रुपमा सानो टिम बनाउनलाई केन्द्रीय समितिले त्यो अधिकार प्रत्यायोजन गर्छ', उनले भने, 'त्यो पनि आज बन्दैन। अध्यक्षलाई त्यो अधिकार प्रत्यायोजन दिने गरी तयारी गरेका छौँ। सायद त्यसरी नै जाला।'
उनले विधान अनुसार पदाधिकारी चुन्न पाउँदा राम्रो हुने भए पनि आफूहरुसँग समयको अभाव रहेको बताए। अलिकति समय लिएर छलफल गरेर पदाधिकारी चयन गर्ने उनको भनाइ छ।
माओवादी केन्द्रको दोस्रो केन्द्रीय समितिको बैठक शुक्रबाट सुरु भएको हो। शनिबार गृहकार्य गरेर आइतबार पुनः बैठक बस्ने भनिएको थियो। तर आइतबार बैठक बसेन। अर्कोतिर, पदाधिकारी चयन, पोलिटब्युरो तथा स्थायी समिति पनि चयन नगर्दै बैठकको समापन गर्न लागिएको छ।
गत पुसमा सम्पन्न महाधिवेशनले अपुरो केन्द्रीय समिति चयन गरेको थियो। लगत्तै बसेको केन्द्रीय समितिको बैठकले अध्यक्षमा पुष्पकमल दाहाल प्रचण्डलाई निर्विरोध निर्वाचित गरेको थियो। तर दुई महिना बित्दा समेत माओवादीमा केन्द्रीय समितिभन्दा माथिका संरचना गठन हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
