काठमाडौं– नेकपा माओवादी केन्द्रका नेता नारायणकाजी श्रेष्ठनिकट अधिकांश केन्द्रीय सदस्यले तत्काल पार्टी विभाजन गरेर कसैलाई फाइदा नहुने सुझाव दिएका छन्। श्रेष्ठले बिहीबार आफ्नो निवास हात्तीवनमा आफूनिकट केन्द्रीय सदस्यलाई बोलाएर छलफल गरेका थिए। छलफलमा सहभागी नेताहरूले एकतामै जोड दिएका हुन्।
छलफलको सुरुवातमै श्रेष्ठले घटनाक्रमका विषयमा ब्रिफिङ गरेका थिए। आफ्नो कुराभन्दा पनि नेताहरुकै सुझाव सुन्न बोलाएको भन्दै श्रेष्ठले त्यही सुझावका आधारमा निर्णय लिने बताए। त्यसपछि बोल्नेक्रममा अधिकांश नेताहरुले पार्टी विभाजन गर्नेभन्दा त्यहीँभित्र संघर्ष गर्नुपर्ने सुझाव दिएको एक केन्द्रीय सदस्यले बताए।
‘तत्काल पार्टी विभाजन गरेर हामीलाई पनि फाइदा छैन। फेरि फुटाएर कता जाने भन्ने अन्योल छ’ बैठकमा नेताहरुको सुझाव सुनाउँदै ती नेताले भने, ‘बरु यही पार्टीलाई रुपान्तरण गरेर क्रान्तिकारी पार्टी बनाउँ। आफ्नो कुरा केन्द्रीय समिति बैठकमा राखौं। त्यसमा सम्बोधन नभए सोचौंला।’
प्रतिगमनविरुद्धको आन्दोलनमा सफलता भइरहेको अवस्थामा पार्टी फुटाएर कसैलाई फाइदा नहुने नेताहरूले श्रेष्ठलाई सुझाएका छन्। कतिपय नेताहरुले पार्टीमा धेरै अपमान सहेर बस्न नहुने सझुाव समेत दिएका छन्। पार्टी एकता भएदेखि नै माओवादीमा पेलान सहेको बताउँदै त्यसरी धेरै बस्न नहुने सुझाव दिएको अर्का एक केन्द्रीय सदस्यले बताए।
राजनीतिमा आत्मसम्मान हुने भन्दै हेपिएर एउटै पार्टीमा बस्न नसकिने उनीहरूले सुझाएका हुन्। बिहीबार बिहान साढे ८ बजेदेखि १० बजेसम्म छलफल चलेको थियो। श्रेष्ठले बोलाएको भेलामा दर्जन केन्दीय सदस्य सहभागी भएको दाबी गरिएको छ। त्यसअघि श्रेष्ठले बिहीबार नै प्रचण्डलाई भेटेका थिए।
श्रेष्ठसँगको भेटमा प्रचण्डले पार्टी एकतालाई जोड दिँदै आफ्नो मनसाय श्रेष्ठले पार्टी छोडेर जाउन् भन्ने नरहेको प्रष्ट्याएको खुमलटार स्रोतले जनाएको छ। त्यसक्रममा प्रचण्डले पार्टी विभाजन हुनेगरी गतिविधि नगर्न श्रेष्ठलाई आग्रह गरे। प्रचण्डलाई भेटेलगतै श्रेष्ठले आफूनिकट केन्द्रीय सदस्यसँग छलफल गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
