काठमाडौं– गत सोमबार आफ्नो निवास खुमलटारमा आयोजित पत्रकार सम्मेलनमा प्रचण्डले घुमाउरो शैलीमा पार्टीका नेता नारायणकाजी श्रेष्ठले पार्टी छोडेर गए हुन्छ भन्ने अभिव्यक्ति दिएपछि दुई नेताको सम्बन्धमा केही चिसोपना आएको छ।
नेता नारायणकाजी श्रेष्ठलाई मनाउन केही दिन अघि माओवादी केन्द्रका अध्यक्ष पुष्पकमल दाहाल प्रचण्ड आफै उनको निवास हात्तिवन गएका थिए। दुई नेताबीचको भेटवार्ताले चिसिएको सम्बन्धमा केही सुधार भएको भनिए पनि त्यो मथ्थर भइसकेको देखिएको छैन।
प्रचण्डसँग रुष्ट भएका नेता नारायणकाजी श्रेष्ठले पूर्व माओवादी नेताहरुसँग सम्वाद अघि बढाएपछि उनलाई मनाउन प्रचण्ड थप सक्रिय बनेका छन्। बिहीबार बिहान पनि नेकपा माओवादी केन्द्रका अध्यक्ष प्रचण्ड र नेता नारायणकाजी श्रेष्ठबीच भेटवार्ता भएको छ।
नेता श्रेष्ठलाई प्रचण्डले आफ्नै निवास खुमलटारमा बोलाएर आधा घन्टा छलफल गरेका छन्। छलफलमा अध्यक्ष प्रचण्डले नेता श्रेष्ठलाई मनाउने प्रयास गरेका छन्। भेटमा प्रचण्डले नेता श्रेष्ठलाई पार्टी विभाजन गर्ने र विभाजन हुने कुनै पनि गतिविधि नगर्न भनेको एक नेताले जानकारी दिए। ‘उहाँहरुबीच आज पनि बिहान भेटवार्ता भएको हो,’ ती नेताले भने, ‘अध्यक्षले अहिले पार्टी विभाजन गर्ने गतिविधिमा नलाग्नुस् यही पार्टीमा बसेर रुपान्तरण र क्रान्तिकारी पार्टी बनाउने हो भन्नुभयो।’ नेता श्रेष्ठले भने तपाईंले पार्टी छोडेर गए हुन्छ भनिसकेकाले परिस्थिति धेरै बिग्रि सकेको प्रष्ट पारेका थिए।
नेता नारायणकाजी श्रेष्ठ असन्तुष्ट भएपछि बुधबार साँझ नेकपा माओवादी केन्द्रका नेता वर्षमान पुन पनि उनलाई मनाउन हात्तिवन पुगेर छलफल गरेका थिए। पार्टीको आठौं महाधिवेशनबाट पारित प्रस्तावमा एमसीसीलाई संशोधन गरेर मात्रै पारित गर्ने निर्णय गरिएको थियो। तर, प्रचण्डले एक्लौटी ढंगले व्याख्यात्मक घोषणासहित एमसीसी पारित गर्ने निर्णय गराएको भन्दै श्रेष्ठ सहितका नेताहरु आक्रोशित बनेका छन्। अध्यक्ष प्रचण्डको अभिव्यक्तिपछि नेकपा माओवादी केन्द्रभित्रको विवाद थप पेचिलो बनेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788061592.webp)
-1786602170.png)
-1786513116.png)
