काठमाडौं– अख्तियार दुरुपयोग अनुसन्धान आयोगले पूर्वमन्त्री रामकुमार श्रेष्ठविरुद्ध अकुत सम्पत्ति आर्जन गरेको अभियोगमा आइतबार विषेश अदालतमा भ्रष्टाचार मुद्दा दायर गरेको छ।
पूर्वसचिव समेत रहेका श्रेष्ठ तत्कालीन खिलराज रेग्मी नेतृत्वको चुनावी सरकारमा मन्त्री बनेका थिए। उनलाई सार्वजनिक सेवा प्रवेश गरेयताको सम्पत्ति अध्ययन गर्दा अकुत सम्पत्ति आर्जन गरेको पाइएको दाबी गर्दै अख्तियारले भ्रष्टाचार मुद्दा दायर गरेको हो।
अख्तियारले मन्त्री श्रेष्ठसँग ४ करोड ४५ लाख २७ हजार ६६८ रुपैयाँ बिगो दाबी गरेको छ। मन्त्री श्रेष्ठको बैंक खातामा ६८ लाख ५० हजार ९ सय ५३ रुपैयाँ बचत देखिएकाले उक्त रकम जफत गर्ने र बिगो बापतको बाँकी रकम उनको जायजेथाबाट असुलउपर गर्नुपर्ने अख्तियारको आरोपपत्रमा उल्लेख छ।
२०२६ चैत १८ गतेदेखि सेवामा प्रवेश गरेका उनी २०३६ कात्तिक २६ गते शाखा अधिकृत बनेका थिए। उनी सचिव पदमा बढुवा भइ २०६४ माघ ८ देखि अनिवार्य अवकाश पाएका थिए।
श्रेष्ठ २०६९ चैत ६ देखि २०७० माघ २९ सम्म पर्यटन, शान्ति तथा खेलकुद मन्त्री भएका थिए। श्रेष्ठ सार्वजनिक सेवा प्रवेश गरेको मितिदेखिको अवधिलाई जाँच अवधि कायम गरी सो अवधिको आयव्ययको विश्लेषण गर्दा सम्पत्तिको स्रोत खुल्न नसकेको दाबी अख्तयारको आरोपपत्रमा उल्लेख छ।
‘शान्ति तथा पुनर्निर्माण र युवा तथा खेलकुद मन्त्रालयको मन्त्री जस्तो सार्वजनिक सेवाको पदमा बहाल रहँदा आफनो पदीय हैसियतको दुरुपयोग गरी गैरकानुनी रूपमा सम्पत्ति आर्जन गरी अमिल्दो तथा अस्वाभाविक उच्च जीवनस्तर यापन गरेको पुष्टि हुन आयो’, आयोगको आरोपपत्रमा भनिएको छ, ‘भ्रष्टाचार निवारण ऐन अनुसार कैद र जरिवाना हुनुपर्ने देखिन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
