काठमाडौं– एमसीसी सम्झौताका सन्दर्भमा संस्थागत निर्णय गर्न भनेर बसेको जनता समाजवादी पार्टी (जसपा) कार्यकारिणी समितिको शनिबारको बैठक विना निष्कर्ष सकिएको छ।
एमसीसीका सन्दर्भमा नेताहरुले आ–आफ्नो धारणा राखे पनि संसद्बाट पारित गर्ने वा नगर्न भन्ने विषयमा निर्णय हुन नसकेको कार्यकारिणी सदस्य नवराज सुवेदीले जानकारी दिएका थिए।
शुक्रबार बसेको कार्यकारिणी समिति बैठकले अमेरिकी नियोग मिलेनियम च्यालेञ्ज कर्पोरेशन (एमसीसी), स्थानीय तहको निर्वाचन लगायतका १२ वटा विषयमा छलफल गर्न अजेण्डा तय गरेको थियो। शनिबारको बैठकबाट एमसीसीका विषयमा निर्णय गर्ने भनिएको थियो। शनिबारको बैठकमा कार्यकारिणी सदस्यहरुलाई पढ्नका लागि भनेर एमसीसी सम्झौताको कपि नै वितरण गरिएको थियो।
तर, एमसीसीका विषयमा सहमति जुट्न नसकेको सुवेदीको भनाइ छ। सुवेदीका अनुसार एमसीसीका विषयमा छलफल गर्न अध्यक्ष उपेन्द्र यादव, संघीय परिषद् अध्यक्ष बाबुराम भट्टराई र वरिष्ठ नेता अशोक राईबीच आइतबार छलफल हुने छ। शीर्ष नेताहरुबीच एक धारणा बनेपछि निर्णयका लागि बैठकमा छलफल गरिने उनको भनाइ छ।
शनिबारको बैठकमा भने नेताहरुले 'मन माझामाझ' गरेको सुवेदीले बताए। 'लामो समय बैठक नबसेकाले नेताहरूबीच मन माझामाझ मात्रै भयो। एमसीसीका विषयमा छलफल भएपनि निर्णय हुन सकेन,' सुवेदीले नेपाल लाइभसँग भने।
पार्टीका आन्तरिक विषयमै जसपा अध्यक्ष यादव र संघीय परिषद् अध्यक्ष भट्टराईबीच टकरावको अवस्था छ। एमसीसीका विषयमा पनि जसपा दुई ध्रुबमा विभाजित छ। अध्यक्ष यादव पक्ष संशोधन नगरी एमसीसी पारित गर्न नहुने पक्षमा छ भने भट्टराई पक्ष जस्ताको त्यस्तै संसद्बाट पारित गर्नुपर्ने पक्षमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
