काठमाडौं– नेकपा एकीकृत समाजवादीका अध्यक्ष माधव कुमार नेपालले अमेरिकी नियोग मिलेनियम च्यालेञ्ज कर्पोरेशन (एमसीसी) सम्झौताको सन्दर्भमा प्रमुख प्रतिपक्ष नेकपा एमालेले 'न पोथी न भाले'को चाल देखाएको टिप्पणी गरेका छन्।
एमालेले एमसीसीको बारेमा स्पष्ट धारणा नराखेर अहिलेसम्म न पोथी न भालेको चाल देखाइरहेको नेपालको भनाइ छ।
शुक्रबार संसद भवनबाहिर सञ्चारकर्मीहरुसँगको कुराकानीका क्रममा नेपालले एमसीसी पास गर्ने नाममा नेकपा एमालेका अध्यक्ष केपी शर्मा ओलीसँग अनैतिक सम्झौंता नगर्न पनि प्रधानमन्त्री शेरबहादुर देउवाको ध्यानाकर्षण गराएका छन्।
नेकपा एमालेले एमसीसीमा आफ्नो पार्टीको सहयोग चाहिए सभामुख अग्निप्रसाद सापकोटा र आफ्नो पार्टीले कारबाही गरेका १४ जना सांसदहरुलाई बर्खास्त गर्नुपर्ने शर्त राखेकोमा नेपालले दुःख व्यक्त गरे।
नेता नेपालले प्रधानमन्त्री देउवालाई हतारमा निर्णय नलिन र एमसीसीका केही प्रावधानहरु नसच्याएसम्म आफूहरु विपक्षमा रहने स्पष्ट पारेको पनि बताए।
‘अनेकौं जटिलताहरु देखा परेका छन्। मैले सूचना पाएसम्म विरुद्धमा मुभ गर्ने, त्यस्तो पनि कोसिस भइरहेको छ। त्यो पनि शर्त राखेर मात्रै। त्यो पनि कुनै शर्त होइन, हाम्रा पार्टीका कार्यकर्ता, नेताहरुलाई सांसदबाट बर्खास्त गर्नुपर्ने, सभामुखलाई बर्खास्त गर्नुपर्ने, महाअभियोग लगाउनु पर्ने यस्ता शर्त राखेर त्यसपछि मात्रै एमसीसीमा समर्थन गर्ने भन्ने कुराको प्रश्ताव केपी ओलीबाट आएको भन्ने कुराहरु छन्। यसले हामीलाई पनि चिन्तित बनाएको छ,' नेपालले भने।
एमसीसीका सन्दर्भमा केही कुराहरु 'मिलाउन' आवश्यक रहेको अध्यक्ष नेपालको भनाइ छ। 'हामीले एमसीसी प्रोजेक्टमा कतिपय कुराहरुलाई मिलाउनु पर्नेछ। नेपाल इण्डो प्यासिफक इस्टाटेजीको अंग बन्न चाहँदैन। कुनै सैन्य रणनीतिमा, कसैको सुरक्षा रणनीति अन्तर्गत नेपाललाई पार्न दिने पक्षमा छैनौं,' नेपालले भने, 'नेपालको भूमिलाई छिमेकी मुलुकहरुको बिरुद्धमा प्रयोग हुने कुनै पनि आशंका नरहने कुराको प्रत्याभूति चाहन्छौं। नेपालको असंलग्न परराष्ट्रनीतिमा हामी तटस्थ रहन चाहन्छौं। नेपालको भूमिमा ट्रान्समिशन लाइन बन्छ भने र बाटो बन्छ भने त्यसमा नेपालको अधिकार नै रहन्छ। रोजगारीमा नेपालीको अधिकार कायम रहनुपर्छ। लेखा परीक्षणको अधिकारमा नेपालको अधिकार रहनुपर्छ। त्यसमा नेपालको संविधानको सर्वोच्चता हुनुपर्छ। यी सबै कुराको स्पष्टता नभएसम्म स्वभाविक रुपमा यथास्थितिमा हामी एमसीसी पास गर्ने पक्षमा छैनौं।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
