काठमाडौं- सत्ता साझेदार दलहरु नेकपा माओवादी केन्द्र र एकीकृत समाजवादी मिलेनियम च्यालेन्ज कर्पोरेसन (एमसीसी)लाई लिएर अन्य विकल्पमा छलफल गर्न राजी भएपछि प्रधानमन्त्री शेरबहादुर देउवाले महामन्त्री गगन थापालाई प्रधानमन्त्रीनिवास बालुवाटार बोलाएका छन्।
गठबन्धनका तर्फबाट माओवादी केन्द्रका अध्यक्ष पुष्पकमल दाहाल ‘प्रचण्ड’ले सत्ता गठबन्धन पनि जोगिने गरी एमसीसीका अन्य विषयमा छलफल गर्न आफू तयार भएको सन्देश प्रधानमन्त्री देउवालाई दिएका थिए। एमसीसीलाई जसरी पनि पास गर्न लागिपरेका देउवाले महामन्त्री थापालाई विकल्पमा छलफल गर्न बोलाएको बालुवाटार स्रोतले जनाएको छ।
महामन्त्री थापाले यसअघि संकल्प प्रस्तावमार्फत विवादित विषयमा एमसीसी सम्झौतासँगै 'व्याख्यात्मक घोषणा' पास गर्ने प्रस्ताव अघि सारेका थिए। उक्त प्रस्तावमा गठबन्धनका नेताहरुले एक चरण छलफल समेत गरेका छन्।
एमसीसी अनुदान सहायता सम्झौतामा व्याख्यात्मक घोषणा जरुरी भएको, एमसीसीका विषयमा राज्यको स्पष्ट धारणा निर्माण गर्न आवश्यक रहेको र एमसीसी अनुदान सम्झौतालाई लिएर जनस्तरमा व्याप्त चासो, चिन्ता, आशंका आदि रहेकाले राज्यस्तरबाट सम्बोधन गर्न र नेपालको राष्ट्रिय स्वार्थ अनुरुप हुनेगरी कार्यान्वयन गर्न ‘डिक्लेरेटिभ इन्टरप्रिटेसन’ पास गर्नुपर्ने उक्त प्रस्तावमा छ।
माओवादी केन्द्र र एकीकृत समाजवादीले संशोधन मागेका बुँदामा उनीहरुलाई हुनुपर्ने लागेको कुरा व्याख्यात्मक घोषणामा राखिने गरी यो प्रस्ताव आएको हो। माथिका अन्तर्राष्ट्रिय कानुनअनुसार दुई पक्षमध्ये अनुमोदन गर्ने पक्षले सन्धिका दफामा आफ्नो व्याख्या ‘डिक्लेरेटिभ इन्टरप्रिटेसन’ प्रस्तुत गर्ने व्यवस्था रहेको अघि सारिएको अवधारणामा उल्लेख छ। एमसीसीको हकमा पनि स्पष्ट हुन खोजेको दफामा नेपालका तर्फबाट आफ्नो बुझाइ राखेर घोषणा गर्न सकिने बताइएको छ।
नेपाल सरकार र एमसीसीबीच भएको सम्झौतामा लेखिएका र व्याख्यात्मक घोषणामा उल्लेखित प्रावधान र सम्झौतासँग सम्बन्धित विषय बाहेक अन्य कुनै पनि विषयमा नेपाल काम गर्न बाध्य नहुने कुरा समेत संसद्बाट पास गर्नुपर्ने अवधारणामा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
