काठमाडौं– सत्तारुढ गठबन्धनको घटक नेकपा एकीकृत समाजवादीले अमेरिकी नियोग मिलेनियम च्यालेञ्ज कर्पोरेश (एमसीसी)सँगको सम्झौताको बाँकी संसदीय प्रक्रियामा विपक्षमा उभिने निष्कर्ष निकालेको छ।
एमसीसी सम्झौता संसद्मा टेबल गर्न दिने र नदिने भन्ने विषयमा अन्तरविरोध देखिएको एकीकृत समाजवादीमा अबको प्रक्रियामा विपक्षमा नै जाने सहमति बनेको हो।
यसअघि अध्यक्ष माधवकुमार नेपाल पक्षले टेबल गर्न दिनुपर्ने पक्षमा र सम्मानित नेता झलनाथ खनाल पक्ष टेबल नै गर्न नहुने पक्षमा देखिएका थिए।
पार्टीको स्थायी कमिटी बैठकमा भएको छलफलभन्दा बाहिर गएर संसद्मा टेबल गर्ने विषयमा अध्यक्ष सहितका नेताहरुको धारणा आएपछि पार्टीभित्र नै अन्तरविरोध भएको थियो। तर, पछि बसेको सचिवालयको बैठकले भने एमसीसीको विपक्षमा नै मतदान गर्ने निर्णय गरेको थियो।
बुधबार पनि अध्यक्ष माधवकुमार नेपाल र सम्मानित नेता झलनाथ खनाल लगायतका नेताहरुको बैठकले एमसीसीको विपक्षमा नै जाने निर्णय गरेको हो।
अध्यक्ष नेपालको जोड जसरी पनि गठबन्धन जोगाएर अघि बढ्नुपर्नेमा छ। तर, नेता खनाल भने गठबन्धन जोगाउने नाममा एमसीसी पास गर्न नहुने पक्षमा देखिएका छन्।
एमसीसीको विषयलाई लिएर पार्टीभित्र नै विवाद देखिएपछि पछिल्लो समय शीर्ष नेताहरु छलफलमा जुटेका थिए।
एमसीसी जबरजस्ती पास गरिएमा गठबन्धनमा बसिरहन आवश्यक नभएको भन्दै सरकार छाडेर बाहिरिनुपर्ने पनि एकीकृत समाजवादीमा दबाब बढिरहेको छ।
सचिव एवम् शहरी विकास मन्त्री रामकुमार झाँक्रीले त सरकारमा पनि सहभागी भइरहने र सरकारको प्रस्तावको विपक्षमा मतदान गर्ने विषय उचित नभएको भन्दै धारणा बनाउनुपर्ने बताइसकेकी छन्।
प्रवक्ता एवम् पार्टी उपमहासचिव जगन्नाथ खतिवडाले एमसीसीको बाँकी प्रक्रियाका सन्दर्भमा कसरी प्रस्तुत हुने भन्ने विषयमा शीर्ष नेताहरुबीच छलफल भएको जानकारी दिए। ‘टेबल गर्ने/नगर्ने विषयमा पार्टीभित्र केही अन्तरविरोध थियो नै, अहिले त्यो छैन,’ उनले भने,‘सचिवालय बैठक र शीर्ष नेताहरुको छलफलमा पनि एमसीसीको विपक्षमा मतदान गर्ने निर्णय भइसकेको छ। अब पार्टीले एमसीसीको विपक्षमा नै मतदान गर्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
