प्रचण्डको फेसबुकमा राखिएको भनाइसहितको तस्बिर।
काठमाडौं- एमसीसीका कारण राष्ट्रिय राजनीति गन्जागोलमा फसेको छ। नेकपा एमाले अध्यक्ष केपी शर्मा ओलीले संसद् विघटन गरेपछिविरुद्ध बनेको पाँचदलीय सत्ता गठबन्धन नै संकटमा छ। एमसीसी पास नगरी नछाड्ने कांग्रेसको लाइन र पास गर्नै नहुने माओवादी केन्द्रका अधिकांश नेता कार्यकर्ताको भावनामा मझधारमा परेका छन्, पुष्पकमल दाहाल 'प्रचण्ड'।
यो मझधारबाट सजिलै किनार लाग्ने संकेत देखिरहेका छैनन् प्रचण्ड। सत्ता गठबन्धन पनि जोगाउने र एमसीसीको डुंगा पनि पार लगाउने सम्भावना नदेखिएपछि प्रचण्डले एउटा जालभित्र परेको महशुस गरेका हुन सक्छन्। यस्तो अवस्थामा बुधबार प्रचण्डको एउटा भनाइसहित तस्बिर उनको आधिकारिक फेसबुक पेजबाट सार्वजनिक भयो।
जहाँ उनी भन्छन्, 'विश्व इतिहासमा हरेक क्रान्तिपछि प्रतिक्रान्तिकारीहरु फेरि पुरानै सत्ता उल्ट्याउन भरमग्दुर कोशिस गर्छन्। अहिले नेपालमा पनि क्रान्ति र प्रतिक्रान्तिकारीहरुबीच संघर्ष चलिरहेको छ। उनीहरु कैयन षड्यन्त्र रचिरहेका र भ्रम छरिरहेका छन्। हामी ती सवै प्रपञ्चको जालो चिरेर विजयी हुनेछौं।'
उनले जुन प्रसंगमा भनेपनि फेसबुक प्रयोगकर्ताले एमसीसीकै सेरोफेरोमा बुझेका छन्। एमसीसीको 'जालो'मा माओवादी नेतृत्व परेको छ। त्यो चिरेर बाहिर निस्किन नसकिरहेको अवस्थामा फेसबुकमा सेयर विचारमा अन्य फेसबुक प्रयोगकर्ताको प्रतिक्रिया केही भावुक, केही रमाइला र केही आक्रोशपूर्ण देखिन्छन्।
केही आवेग, आलोचना र व्यंग्य
एसबी प्याङ्गो लिम्बू फेसबुक हेन्डल भएका एकजनाले प्रचण्डको उक्त भनाइमा नेताप्रतिकै वितृष्णा पोखेका छन्। उनी लेख्छन्,'हजारौं जन्ता मुर्ख भएप नि देश बर्बाद हुँदैन, तर एउटा नेता मुर्ख भयो भने देश बर्बाद हुन्छ। नेपालमा त्यस्ता नेता थुप्रै भेटिन्छन्।'
प्रचण्डको भनाइमा कृष्णप्रसाद भट्टराई नामबाट फेसबुक चलाइरहेका अर्का व्यक्तिले अविश्वास व्यक्त गरे। उनको प्रतिक्रिया छ, 'आज बिहानै चोकमा एउटा बौलाहा कराइरहेको थियो, तर बिडम्बना त्यसको राजनीतिक विश्लेषण योभन्दा मन छुने र यथार्थपरक थियो।'
निशब्द शर्मा नामका फेसबुक प्रयोगकर्तालाई प्रचण्डप्रति विश्वास नै उठेको रहेछ। उनको आक्रोशमिश्रित जवाफ छ, 'प्रचन्डबाट क्रान्ति, अलकायदाबाट शान्ति त्यस्तै-त्यस्तै हो।'
जनक सापकोटा नामका सामाजिक सञ्जाल प्रयोगकर्ता रमाइलो तरिकाले प्रचण्ड र एमसीसीको विकासक्रम प्रस्तुत गर्छन्। 'द सुप्रिमो रोडम्याप' भन्दै यसरी उनी सिर्जनशीलता प्रस्तुत गर्छन्:
१. चिट्ठी पठाएकै छैन, शेरबहादुरजीले भन्नु भएको अर्कै हो।
२. चिट्ठी पठाएको हो तर एमसीसी पास गर्छु भनेर होइन।
३. एमसीसी पास गर्छु भनेर चिट्ठी पठाएको हो तर टेबल गरिन्न।
४. एमसीसीको विपक्षमा छु। कांग्रेसले जबर्जस्ती टेबल गरे सरकारमा बसिन्न।
५. टेबलचाहिँ गरियो तर पक्षमा भोट हालिन्न। सरकार पनि छोडिन्न।
यसपछि प्रचण्डका सम्भावित कदम प्रस्तुत गरेका छन् :
६. पक्षमा भोट चाहिँ हालियो। तर कार्यान्वयन गरिन्न।
७. कार्यान्वयन चाहिँ गरियो तर पूरा हुन्न दिइन्न।
८. पूरा हुन चाहिँ दिने हो तर अमेरिकी सेना ल्याइन्न।
९. परियोजना सम्पन्न चाहिँ भयो तर अमेरिकी सेना आएन।
१०. उद्घाटनको दिन 'यो एमसीसी परियोजनाले देशलाई अब स्विट्जरल्याण्ड बनाउँछ।'
अन्तिममा लेख्छन्, 'राष्ट्रनायक कमरेड प्रचण्डलाई काम गर्न दे।'
यसैगरी श्रवण पौडेल नामका फेसबुक प्रयोगकर्ता माओवादीप्रति चिन्ता व्यक्त गर्छन्, 'यो छेपारे पाराले वडामा पनि जित मुस्किल छ माओवादीलाई। छिनछिनमा फेरिने बोलीले जनमत खस्कँदो छ।'
बेबबहादुर ओलीको जालो फोर्ने शब्दमा आफ्नै अर्थ छ। उनी प्रतिक्रिया लेख्छन्, 'जालो फोरेर भनेको एमसीसी पास गर्ने भनेका होला।'
रोशन दाहाललाई भने प्रतिक्रान्ति प्रचण्डहरुकै बाटो समाएर त्यहाँ पुग्ने कोशिस गरेका हुन् जस्तो लाग्छ। उनको विचार छ, 'जुन छोटो समयमा तपाईंहरुले त्यत्रो राज्यसत्ता आफ्नो अधिनमा पार्नुभो। छोटो बाटो हिँडेर। लगत्तै पछि घटिरहेका प्रतिक्रान्तिहरु तपाईंहरुकै बाटो समाइ त्यहाँ पुग्ने कोशिस गरेका हुन्। जस्तै मधेस आन्दोलनका नेता। यो शृंखला तबसम्म रोकिन्न, जबसम्म हरेकको आफ्नै राज्य र आफ्नै सरकार र प्रधानमन्त्री हुँदैनन्।'
प्रेम, आशा र भरोसा
अहिले 'प्रचण्डका पाँच अवतार'का रुपमा उनका गतिविधिको एउटा ग्राफिक्स भाइरल छ। प्रचण्ड विरोधीले त्यसलाई विरोधको हतियार बनाएका छन्। तर प्रचण्डलाई विश्वास गर्ने हरी पी भुर्तेल भन्छन्, 'पाँच अवतार हैन कम्रेड, एक हजार अवतार लिएर भए पनि एमसीसी फेल गर्नुपर्छ । देश बचाउ प्रचण्ड।'
सुदर्शन अर्याल प्रचण्डप्रति यति भरोसा जताउँछन् कि उनी भएकै कारण नेपाल र नेपालीको अस्तित्व जोगिएको उनलाई लाग्छ।
उनी भन्छन्, 'तपाईं सदा ऊर्जाशिल, कर्मशील, प्रयत्नशील भएर क्रान्तिकारी धारमा रहीरहन पर्छ अध्यक्ष कमरेड। तपाईं हुनुहुन्छ र त नेपाल र नेपालीको अस्तित्व जोगिएको छ ।'
यसैगरी अशोक रावलले भरोसा जताउँदै 'गणतन्त्र नेपालका पिता'को उपमा दिएका छन् भने कृष्ण जीएच ढाल बनेर 'प्रचण्ड का बिरोधीहरुलाई मेरो प्रश्न?' भन्दै आफ्ना कुरा राख्छन्, 'यहाँ नदिनाला र नेपाली भूमी बेच्नेहरु छ्याप छ्याप्ति भेटिन्छन् तर एउटा उदाहरण दिनुहोस्। यिनले कुन नदिनाला र नेपाली भुमि बेचे? यहाँ महाकाली, गण्डकी र कोशी बेच्नेहरु देशप्रेमी? यहाँका दलाल मिडिया भन्दै छन्- सरकार पनि आफैं, सडकमा पनि आफैं। के माओवादी लगायतका दल एमसीसी पास गर्ने शर्तमा सरकारमा सहभागी भएको हुन्? होइन भने यिनले राष्ट्रिय मुद्दा र राष्ट्रिय सहमति गरेर अगाडि बढौ भन्दा के गल्ती गरे? कालो काङ्ग्रेस र एमाले हिजोदेखि देश बेच्दै आएका पार्टी हुन्, यिनिहरुको इतिहास हेर्दा नै काफी छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773902187.png)
-1764146706.png)
-1773837959.png)
