काठमाडौं– मंगलबार अपराह्न अमेरिकी राजदूत र्याण्डी बेरीसँग भेटवार्ता गरेपछि एमाले अध्यक्ष केपी शर्मा ओली प्रधानमन्त्री शेरबहादुर देउवालाई भेट्न बालुवाटार पुगेका थिए।
वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल र उपमहासचिव विष्णु रिमालसहित बालुवाटार पुगेका ओलीले देउवासँग झण्डै २ घण्टा कुराकानी गरे। तर, छलफलको 'प्रमुख विषय' एमसीसीका सन्दर्भमा कुनै स्पष्ट जवाफ दिएनन्।
ओली नेतृत्वकै तत्कालीन सरकारले एमसीसी सम्झौता संसद्मा पेस गर्ने निर्णय गरेकाले देउवाको 'स्वाभाविक चासो' थियो– संसद्मा प्रस्तुत भइसकेपछि एमसीसीबारे एमालेको अबको अडान के हो, के हुन्छ? तर, ओलीले मंगलबारको भेटवार्तामा पनि स्पष्ट जवाफ नदिएको बालुवाटार स्रोतको भनाइ छ।
प्रधानमन्त्रीनिकट स्रोतका अनुसार मंगलबारको भेटवार्तामा ओलीलाई देउवाको प्रस्ताव थियो– तपाईंहरु आफ्नो पूर्व अडानजस्तै एमसीसीका बारेमा स्पष्ट (पक्षमा) देखिनु पर्यो। एमाले नेता विष्णु रिजालका अनुसार गठबन्धनबाट आफ्नो सरकारलाई सहयोग नमिलेकाले एमसीसी अनुमोदन गराउन एमालेले सघाउनुपर्ने देउवाको आग्रह थियो।
तर, एमाले अध्यक्ष ओलीले भने पहिले आफूहरुको माग पूरा हुनुपर्ने अडान कायम राखेका छन्। एमाले विभाजन गरी बनेको नेकपा एकीकृत समाजवादीका १४ जना सांसद्लाई कारबाही हुनुपर्ने माग ओलीले पुन: स्मरण गराए। जुन माग अगाडि सारेर एमालेले गत असोजदेखि सदन अवरुद्ध गर्दै आइरहेको छ।
'एमसीसी सम्झौता संसद्मा पेस गर्ने भन्ने निर्णय नै एमाले अध्यक्ष ओली प्रधानमन्त्री भएका बेला भएको हो। यसकारण प्रधानमन्त्रीले उहाँहरु (ओली र एमाले नेता)लाई एमसीसी सम्झौता तपाईंहरुकै निर्णानुसार संसद्मा प्रस्तुत भइसक्यो। अब स्पष्ट निर्णय लिनुहोस् भन्ने प्रस्ताव गर्नुभएको हो,' प्रधानमन्त्री देउवानिकट स्रोतले भन्यो।
ओलीसँगै बालुवाटार पुगेका एमाले नेता विष्णु रिमालका अनुसार प्रधानमन्त्री देउवाको जोड एमसीसी पास गर्नेमै थियो। 'प्रधानमन्त्री ज्यूले पास गरौं यार, पास गरौं यार... भन्नुभयो,' रिमालले भने।
ओलीले भने पहिले आफूहरुले संसद्मा उपस्थित हुने वातावरण बन्नुपर्ने पार्टीको अडान दोहोर्याएको रिमाल बताउँछन्। 'एमसीसी पास गर्ने कुरा त ठिकै छ, छलफल गरौंला। पहिला हाम्रो माग (एकीकृत समाजवादीका १४ सांसदलाई कारबाही गर्ने) पूरा हुनुपर्यो भन्ने हाम्रो अध्यक्षको कुरा रह्यो,' रिमालले नेपाल लाइभसँग भने।
प्रधानमन्त्री देउवा निकट स्रोतका अनुसार समाजवादीका १४ सांसद्लाई कारबाही गरिए आफूहरु संसदीय प्रक्रियामा सहभागी हुने वातावरण बन्ने र त्यसपछि मात्रै एमसीसीका पक्ष/विपक्षमा मतदान गर्ने निर्णय गर्ने भनेर ओलीले जवाफ दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
