काठमाडौं- नेपाली कांग्रेसका प्रवक्ता प्रकाशशरण महतले एमसीसी पास भएमा अमेरिकी सेना आउने अफवाह गलत भएको टिप्पणी गरेका छन्।
सोमबार पत्रकारसँगको भेटघाटमा कांग्रेस प्रवक्ता महतले अमेरिकी सेना आउनका लागि एमसीसी नचाहिने बताए।
'अमेरिकी सेना आउने भए एमसीसी चाहिँदैन। अमेरिकी सेनाको काम छैन? अमेरिकी सेना पुगेको देशबाट त फर्किरहेका छन्' उनले भने।
कुनै पनि देशका पार्टीको विचारधारा हेरेर सम्बन्ध नबनाउने भन्दै उनले भने, 'यस्तै सहयोग अन्य देशबाट आओस्। हामी आँखा चिम्लेर सहयोग गर्छौं।'
फागुन १२ गतेपछि एमसीसी कसरी पारित हुन्छ र सत्तागठबन्धनको स्थिति के हुन्छ भन्ने निर्णय हुने उनको भनाइ छ। गठबन्धन टुट्दैन भन्नेमा आफूहरु विश्वस्त रहेको उनले बताए।
महतले एमालेसँग पनि कुरा भएको भन्दै यो मुद्दासँग जोडेर राजनीतिक नर्गन आग्रह गरे। उनले संसदमा कुनै मुद्दामा चित्त नवुझेमा छलफल गर्न सकिने तर अहिले एमसीसी टुङ्गो लगाउनका लागि लाग्न आग्रह गरे।
उनले एमसीसीलाई लिएर नेपालमा अपरिपक्व खेल भएको बताए। नेपालको सन्दर्भ लिएर अमेरिका र चीन बोल्नु पर्ने अवस्था यहीँका दलबाट भएको उनको भनाइ थियो।
अल्पविकसित देशहरूको माग अनुसार नै अमेरिकाले एमसीसी परियोजना दिएको बताउँदै उनले पूर्वाधार विकासका लागि नेपालको माग अनुसार नै एमसीसी सम्झौता भएको उनले बताए।
'डा बाबुराम भट्टराई समयदेखि सबै सरकारले यो प्रक्रिया अघि बढाएका हुन्। पाँच वर्षको कसरत पछि सम्झौता भएको हो। यो नेपालको हितमा छ भनेर सबै दलले भनेकै हुन्। प्राथमिकताको क्षेत्र हामीले नै तोकेको हो। यो अनुदानमा कुनै शर्त राखिएको छैन' उनले भने।
अन्तर्राष्ट्रिय रुपमा आह्वान गरेर ठेक्का लगाउँन भएकाले यो सैन्य परियोजना नभएको उनको दाबी छ।
'प्रधानमन्त्री केपी शर्मा ओली प्रधानमन्त्री हुँदा संसद्को अनुमोदन गर्ने नयाँ प्रावधान थपियो। आज विरोधमा उत्रने जुन जुन नेताहरु हुनुहुन्छ,उहाँ सबै मन्त्री हुँदा यो प्रक्रिया अघि बढेकै थियो,' उनले भने, 'सत्तामा हुँदा एक र विपक्षमा हुँदा अर्को विचार कांग्रेसले राख्दैन।'
एमसीसी पारित गर्नका लागि प्रचण्ड स्वयंले समय मागेको भन्दै उनले अन्तर्राष्ट्रिय विश्वासमा समेत आँच आएको बताए।
उनले एमसीसी टेबल गर्न गठबन्धनका दलहरु सहमत भएको भन्दै यसलाई सकारात्मक रुपमा लिएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787239320.jpg)
-1787821305.jpg)
-1786602170.png)
-1787821306.jpg)
-1786513116.png)
