काठमाडौं- जनता समाजवादी पार्टी (जसपा)का संघीय परिषद् अध्यक्ष बाबुराम भट्टराईको सहमति विपरित अध्यक्ष उपेन्द्र यादवले कार्यकारिणी समितिको बैठक बोलाएका छन्।
जसपाको यसअघि बसेको पदाधिकारी बैठकमा केन्द्रीय समिति बैठक बोलाउने समझदारी भए पनि यादवले एक्लैटी रुपमा फागुन १३ गते केन्द्रीय कार्यकारिणी समिति बैठक बोलाएपछि विवाद चुलिएको हो।
आइतबार प्रतिनिधि सभामा टेबल भएको एमसीसीकाबारे छलफलका लागि फागुन १२ गते संसद् बैठक बोलाइएको छ। तर एमसीसीबारे छलफलका लागि उपेन्द्र यादवले त्यसको भोलि पल्ट मात्रै कार्यकारिणी समिति बैठक बोलाएपछि पार्टी विवाद चुलिने देखिएको छ।
अध्यक्ष यादवले सोमबार एक विज्ञप्ति जारी गर्दै फागुन १३ गते एमसीसी, स्थानीय निर्वाचन, पार्टी विधान अधिवेशन र वर्तमान राजनीतिक परिस्थितिका विषयमा छलफल गर्न कार्यकारिणी समिति बैठक बोलाएको जनाएका छन्। यादवले कार्यकारिणी समिति बैठक बोलाए लगतै भट्टराई निकट एक नेताले आश्चार्य प्रकट गर्दै एकलौटी ढंगले बैठक बोलाइएको बताए।
‘पदाधिकारी बैठकमा यसअघि केन्द्रीय समिति बैठक बोलाएर एमसीसी, स्थानीय निर्वाचन लगायत विषयमा छलफल गर्ने समझदारी भएको थियो’ बाबुराम निकट ति नेताले भने,‘आज उपेन्द्रजीले बैठक बोलाउनु भएछ। के गर्न खोज्नु भएको हो थाहा छैन। यो बैठकमा बाबुरामजी सहमत हुनुहुन्न।’ पार्टी सरकारमा जाने विषयलाई लिएर चर्किएको विवाद एमसीसी प्रकरणपछि थप पेचिलो बनेको छ।
एमसीसी जस्ताको त्यस्तै पारित गर्नु पर्ने पक्षमा बाबुरामपक्ष उभिएको छ भने यादवपक्ष संशोधन गरेर मात्रै पारित गर्नु पर्ने पक्षमा छ। एमसीसीका विषयमा जसपा स्पष्ट दुई धार देखिएको छ। एमसीसीका विषयमा उपेन्द्र 'रिर्जभेसन' भएकाले छलफल गरेर जसपा एक हुने नेता प्रमोद साहले बताए। जसपा एमसीसीको विषयमा पक्ष/विपक्षमा विभाजित नभएर एक हुने साहको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
