काठमाडौं– नेपाल प्रहरीमा तीन अतिरिक्त महानिरीक्षक (एआईजी) दरबन्दी थप भएको पत्र प्रहरी प्रधान कार्यालय पुगेको छ। तीन एआईजी दरबन्दी थपको पत्र आइतबार प्रहरी हेडक्वार्टर पुगेको हो।
गत बिहीबारको मन्त्रिपरिषद्ले तीन एआईजी थपको निर्णय गरेको थियो। उक्त निर्णय गृह मन्त्रालय हुँदै आइतबार प्रहरी हेडक्वार्टर पुगेको हो। प्रहरी हेडक्वार्टरबाट प्रहरी किताबखानामा तीन एआईजी दरबन्दीको थपको विषय दर्ता भएपछि बढुवा प्रक्रिया सुरु हुनेछ।
किताबखानामा पद दर्ता भएपछि बढुवा सिफारिस समितिको बैठकले तीन डीआईजीलाई एआईजीमा बढुवाका लागि सिफारिस गर्नेछ। तीन एआईजी बढुवाका १८ डीआईजी प्रतिस्पर्धामा छन्।
घनश्याम अर्याल, प्रकाशजंग कार्की, वसन्त पन्त, ईश्वरबाबु कार्की, धिरज प्रताप सिंह, वसन्त लामा, रवीन्द्र धानुक, उत्तमराज सुवेदी, अरुण बिसी, गणेशबहादुर ऐर बढुवाको प्रतिस्पर्धामा छन्।
यसैगरी, पुरुषोत्तम कँडेल, राजेशकुमार लाल कर्ण, डा देवबहादुर बोहरा, दिवेश लोहनी, रामकृपाल साह, उमेश रन्जितकार, प्रकाश अधिकारी र मुकुन्दराज आचार्य बढुवाको प्रतिस्पर्धामा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
