चितवन- चितवन राष्ट्रिय निकुञ्जका दुई ठाउँबाट नौ जना भारतीय नागरिक शंकास्पद रुपमा पक्राउ परेपछि निकुञ्जभित्र सुरक्षा व्यवस्था कडा पारिएको छ।
वर्षाद्को समयमा चोरी सिकार कम हुने भएकाले गस्ती कम गर्ने गरिए पनि यही याममा गत साता निकुञ्जको पश्चिमी सेक्टर ‘साइली माइली’मा सात जना भारतीय नागरिक पक्राउ परेका छन्। त्यसको केही दिनमै निकुञ्जको पूर्वी सेक्टर ‘सुनाचुरी’मा दुई जना भारतीय पक्राउ परेका हुन्।
निकुञ्जका प्रमुख संरक्षण अधिकृत वेदकुमार ढकालले ‘साइली माइली’मा पक्राउ परेकाहरुले बाटो बिराएर छिरेको जनाएको र सुनाचुरीमा माछा मार्दै गर्दा पक्राउ परेको भए पनि शंकास्पद देखिएकाले उनीहरुमाथि कारबाही प्रक्रिया अगाडि बढाइएको बताए।
ती क्षेत्रहरुमा हात्तीसहितको स्वीप अप्रेशन गर्ने काम भइरहेको उनले बताए। ती व्यक्तिको साथमा केही नभेटिए पनि उनीहरुले हातहतियार लुकाएको हुनसक्ने भन्दै पश्चिमी र पूर्वी सेक्टरमा दिनहुँजसो स्वीप अप्रेशन भइरहेको उनले बताए।
‘साइली माइली’ भारतीय सीमा क्षेत्रमा रहेको वाल्मीकी नगरबाट झन्डै ६ घन्टाको यात्रापछि मात्रै पुग्न सकिन्छ। ती व्यक्तिहरुले हराएको जनाए पनि यतिभित्र कसरी र कुन उद्देश्यसहित आइपुगे भन्नेबारे अनुसन्धान भइरहेको उनले बताए। ती व्यक्ति भारतको वाल्मीकि नगरका हुन्। पूर्वी सेक्टरमा पक्राउ परेका अवैधरुपमा माछा मार्दै गरेका भएकाले उनीहरुको गतिविधिबारे पनि अनुसन्धान भइरहेको उनले बताए।
पक्राउ परेकाहरुको बारेमा निकुञ्जले विस्तृत खुलाएको छैन। निकुञ्जका सूचना अधिकारी नरेन्द्र अर्यालले गत वर्षमा असारदेखि भदौसम्म गस्ती कम हुने भए पनि यस वर्ष सुरक्षा चुनौती देखिएपछि हिउँदका महिना जस्तै गरी निकुञ्ज सुरक्षाका काम भइरहेको बताए।
निकुञ्जभित्र कतिपय ठाउँहरुमा वर्षाद्को समयमा गाडी नजाने भएपछि हात्ती र पैदल गस्तीलाई तीव्रता दिइएको छ। अर्यालका अनुसार, मध्यवर्ती क्षेत्रमा भने गाडीको प्रयोग गरी पूरै निकुञ्जलाई घेरामा राखेर गस्ती भइरहेको छ।
२०७३ चैत २६ गते यता निकुञ्जमा दुर्लभ एकसिंगे गैँडा मारिएको छैन। तस्करको चलखेल हुनसक्ने भन्दै निकुञ्जले गस्तीलाई वर्षभरि नै तीव्रता दिँदै आएको छ। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752504514.jpg)
-1752390485.png)
-1749826086.png)
