काठमाडौं– नेकपा एमालेका अध्यक्ष केपी शर्मा ओली र नेपाली कांग्रेसका नेता डा शेखर कोइरालाबीच समसामयिक राजनीतिक विषयमा छलफल भएको छ।
सत्तारुढ दल कांग्रेसमा संस्थापन इतर पक्षको 'नेतृत्व' गरिरहेका कोइराला संसद्को प्रमुख प्रतिपक्षी दल एमालेका अध्यक्ष ओलीलाई भेट्न उनको निजी निवास बालकोट पुगेका हुन्। २ नेताबीच करिब साढे २ घण्टा छलफल चलेको कोइराला निकट स्रोतले नेपाल लाइभलाई जानकारी दियो।
'दुई नेताबीच करिब साढे २ घण्टा छलफल चल्यो। अहिलेको राजनीतिक अवस्था, एमसीसी, संसद् सुचारु गर्ने विषयमा केन्द्रित भएर छलफल भयो,' नेता कोइराला निकट स्रोतले नेपाल लाइभसँग भन्यो।
ओलीले एमसीसीको विषयमा कांग्रेसको 'धारणा'मा आफूहरु सकारात्मक नै रहेको जवाफ दिएको कोइराला निकट स्रोतको भनाइ छ। ओलीले संसद् सुचारु गर्ने विषयमा आफूहरु सकारात्मक नै भएको, तर आफूहरुले उठाउँदै आएको विषयलाई सम्बोधन हुनुपर्ने बताएका छन्।
ओली निकट स्रोतका अनुसार २ नेताबीचको भेटमा सत्तारुढ गठबन्धनको बारेमा पनि समीक्षा भएको छ।
अमेरिकी सहयोग नियोग, मिलेनियम च्यालेञ्ज कर्पोरेसन (एमसीसी) सम्झौताको विषयले गठबन्धन टुट्ने चर्चा चलिरहेको प्रसंगमा दुई नेताबीच 'समीक्षात्मक छलफल' भएको ओलीको सचिवालयका एक सदस्यले जानकारी दिए।
सरकारको नेतृत्व गरिरहेको कांग्रेस एमसीसी सम्झौता संसद्बाट अनुमोदन गराउनुपर्ने पक्षमा 'एकमत' छ। तर, गठबन्धनमा रहेका नेकपा माओवादी केन्द्र, नेकपा एकीकृत समाजवादी र जनता समाजवादी पार्टीमा एमसीसी सम्झौता संशोधन नगरी पारित गरिनुहुन्न भने पक्ष बलियो छ।
सरकारको नेतृत्वमा रहँदा नेकपा एमाले पनि एमसीसी पारित गर्नुपर्ने पक्षमा थियो। तर, प्रतिपक्षमा पुगेपछि एमालेले एमसीसीबारे धारणा सार्वजनिक गरिसकेको छैन। एमालेका नेताहरुले एमसीसीका विषयमा सत्तारुढ पक्षले नै पहिले समान धारणा बनाउनुपर्ने बताउँदै आएका छन्।
एमसीसीकै विषयमा छलफल गर्न प्रधानमन्त्री तथा नेपाली कांग्रेसका सभापति शेरबहादुर देउवाले २ दिन अगाडि ओलीलाई सरकारी निवास बालुवाटार बोलाएका थिए।
आइतबार प्रधानमन्त्री देउवा, एमाले अध्यक्ष ओली र सत्ता साझेदार दल नेकपा माओवादी केन्द्रका अध्यक्ष पुष्पकमल दाहाल (प्रचण्ड)बीच बालुवाटारमा छलफल भएको थियो।
उक्त बैठकमा माओवादी केन्द्रका अध्यक्ष पुष्पकमल दाहाल (प्रचण्ड)ले एमसीसी सम्झौताका सन्दर्भमा चुनावपछि मात्रै संसदीय प्रक्रिया अगाडि बढाउने प्रस्ताव राखेका थिए।
एमाले अध्यक्ष ओलीले भने एमसीसीका विषयमा पहिले सत्ता पक्षमा एकमत हुनुपर्ने बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787796648.png)
-1787795595.png)
-1786602170.png)
-1786513116.png)
