काठमाडौं- नेपाल राष्ट्र बैंकले आयातमा शतप्रतिशत नगद मार्जिन लागू गरेका वस्तुमध्ये नक्कली कपाल मात्रै नौ करोड ९१ लाख रुपैयाँ बराबरको आयात भएको छ।
नेपाल राष्ट्र बैंकले गएको पुस ५ गते परिपत्र जारी गर्दै विभिन्न २० वस्तु आयात गर्दा नगद मार्जिन राख्नुपर्ने व्यवस्था गरेको थियो। राष्ट्र बैंकको उक्त व्यवस्थापछि यसरी आयात हुने समग्र सामानमा भने केही गिरावट आएको भन्सार विभागले प्रकाशित गरेका तथ्यांकमा देखिन्छ।
राष्ट्र बैंकले परिपत्र जारी गर्दै १८ वटा वस्तुको आयातमा प्रतीतपत्र (एलसी) खोल्दा शतप्रतिशत नगद मार्जिन राख्नुपर्ने र दुईवटा वस्तु आयातमा एलसी खोल्दा ५० प्रतिशत नगद मार्जिन राख्नुपर्ने व्यवस्था गरेको थियो। विगतमा बैंक तथा वित्तिय संस्थाले दिने कर्जाका आधारमा एलसी खोल्ने गरिन्थ्यो। बढ्दो आयातका कारण विदेशी मुद्राको सञ्चिति घट्दै गएपछि राष्ट्र बैंकले आयात गर्दा नगद मार्जिन राख्नुपर्ने नीति ल्याएको थियो।
राष्ट्र बैंकले चकलेट, चुइगम, इनर्जी ड्रिंक, चुरोट, अत्तर, शृङ्गारका सामग्री, स्याम्पु, कपालमा लगाउने तेल, काठका सामग्री र फर्निचर, जुत्ता, टोपी, छाता, कृत्रिम फूल, मार्बल, ट्वाइलेट र भान्छाकोठाका सामग्री, चाँदी, फलामका फर्निचर, प्लास्टिकका फर्निचरजस्ता वस्तु आयात गर्दा शतप्रतिशत मार्जिन बैंकमा राख्नुपर्ने व्यवस्था गरेको हो। साथै, गाडी आयात गर्दा ५० प्रतिशत मार्जिन आयातकर्ताले राख्नुपर्ने व्यवस्था गरेको थियो। गत पुसको सुरुआतमै २० वटा वस्तुमा लागू गरेको मार्जिनले पहिलो महिनामा करिब दुई अर्बले यस्तो सामानको आयात घटेको भन्सार तथ्यांकले देखाउँछ। आयात घट्दा राष्ट्र बैंकले अपनाएको नीतिको प्रभाव देखिएको जानकारहरु बताउँछन्।
गएको कात्तिकसम्ममा शतप्रतिशत मार्जिन लागू गरेका २० वस्तु ६४ अर्ब १५ करोडको ५७ लाख रुपैयाँ बराबरको आयात भएको थियो। यसैगरी, मंसिरसम्ममा ७६ अर्ब ५९ करोड ९३ लाख रुपैयाँको आयात भएको थियो। पुससम्ममा यी वस्तूको आयात ८७ अर्ब २४ करोड ६२ लाख रुपैयाँ रहेको भन्सार विभागको भनाइ छ। राष्ट्र बैंकले मार्जिन लागू गरेका केही सामानको आयात बढेको छ भने केही सामानको आयात घटेको देखिन्छ।
उक्त वस्तुहरूमा केहीको आयात बढेको छ भने केही वस्तुको आयातमा कमी आएको छ। राष्ट्र बैंकले कडाइ गरेको ल्वाङ पु्स महिनामा एक लाख २२ हजार रुपैयाँले बढी आयात भएको छ। मंसिरको तुलनामा पुसमा उक्त रकम बराबरको आयात कम भएको हो। मंसिरमा ८० लाख रुपैयाँको आयात भएकोमा पुसमा ८१ लाख रुपैयाँको आयात भएको छ।
यसैगरी, मार्जिनका कारण चिनीलगायत सख्खर आयात घटेको छ। मंसिर महिनाको तुलनामा पुसमा १५ करोड ७६ लाख रुपैयाँ २२ हजार रुपैयाँको आयात घटेको देखिन्छ। सरकारले शतप्रतिशत मार्जिन लागू गरेको वाइन, ह्वीस्की र मिनिरल वाटरको आयात भने पुसमा १३ करोड तीन लाख रुपैयाँले बढेको छ। यसैगरी, सुर्ती तथा चुरोटको आयात पनि १५ करोड ६५ लाख ९८ हजार रुपैयाँले बढेको तथ्यांक छ।
पुसमा परफ्यूम र ट्वाइलेट वाटर एक करोड चार लाख १३ हजार रुपैयाँ, सौन्दर्य सामग्री १७ करोड २८ लाख १८ हजार रुपैयाँ, कपालमा प्रयोग हुने क्रिम तथा स्याम्पो नौ करोड १९ लाख रुपैयाँले कम आयात भएको भन्सार विभागको तथ्यांकमा उल्लेख छ। यो अवधिमा काठलगायत यससम्बन्धी सामग्री आयात भने बढेको देखिन्छ। जसमा पुस महिनामा मंसिरको तुलनामा तीन करोड पाँच लाख ६९ हजार रुपैयाँ बढीको आयात भएको छ।
जुत्ता तथा जुत्ता बनाउने सामग्री आयात पुस महिनामा ४० करोड ४१ लाख ८२ हजार रुपैयाँ, टोपीलगायत टाउको ढाक्न प्रयोग हुने विभिन्न वस्तु नौ करोड ७५ लाख ५५ हजार रुपैयाँ, छाता र छडी ३० लाख ४७ लाख रुपैयाँ बराबरको आयात भएको छ। यसैगरी, आइब्रो तथा नक्कली कपालका वस्तु २७ लाख ४२ हजार रुपैयाँ बराबरको आयात भएको छ।
मार्बल, माइलस्टोन्स र घर बनाउनका आवश्यक ब्लक २१ करोड ८१ लाख ८१ हजार रुपैयाँ, इँटा, ब्लक, सेरामिक वस्तु ४५ करोड १९ लाख ७९ हजार, बोतल एक करोड ६७ लाख ११ हजार र चाँदी तथा चाँदीका धुलो ४३ करोड नौ लाख ६३ हजार रुपैयाँले आयातमा कम भएको विभागको तथ्यांकमा उल्लेख छ।
यसैगरी, सवारीसाधन (विद्युतीयबाहेक) १९ करोड २१ लाख ८४ हजार रुपैयाँ, मोटरसाइकल चार करोड ८५ लाख ११ हजार र तास दुई करोड ७८ लाख ३० हजार रुपैयाँ कमको आयात भएको छ। तर, फर्निचरलगायतका अन्य सामान भने १८ करोड २१ लाख ९१ हजार रुपैयाँले बढी आयात भएको तथ्यांक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
