आर्द्र बिम्ब

साहित्य डबली

आर्द्र बिम्ब

रमेश श्रेष्ठ शनिबार, पुस २४, २०७८ १५:०५

माहुरीले
बोकेर उडेको पृथ्वीबाट
चुहिइरहेको महको धारा
कसको मुखमा परेर पड्किने हुन्
चुइङ्गम चपाएर सोचिरहन्छन्
देवताहरू मरेर बनेका– तन्नेरी पहाडहरू

चाकाभित्रको अर्को पृथ्वीबाट
महकै बाँसुरी बजाएर सोचमग्न छन् प्यूपाहरू
बहुचर्चित तेस्रो विश्वयुद्धमा
सहभागी हुनेहरूका बारेमा

चौथो बिहे गर्ने इच्छासहित
दिनको तीन चम्चा शुद्ध मह खाएर
माइलाबाजे
ज्यान लागेको ऐना हेर्दै मुस्कुराउँछन्
हामी बाँचिरहेको पृथ्वीमा
त्यतिबेलै
भुरुरुरु... उडेर गयो रानी माहुरी
पछिपछि लागे हुल बाँधेर थुप्रै माहुरीहरु
त्यसैमध्येबाट मर्दै खसिरहेका थिए
बलशाली कविता लेख्ने
कवि माहुरीहरू