काठमाडौं– कोरोना भाइरसको नयाँ भेरियन्ट पत्ता लागेसँगै विश्व फेरि अन्योलमा फसेको छ। विभिन्न क्षेत्रमा यसको असर देखिन सुरु भएको छ। यसबीच बलिउडमा पनि ओमिक्रोनका कारण छायांकन भइरहेका फिल्महरु ‘पोस्टपोन्ड’ हुन थालेका छन्।
भारतमा लगातार कोरोना संक्रमण बृद्धि हुँदा जोखिमलाई मध्यनजर गर्दै बलिउडकर्मीहरुले आफ्नो फिल्मको छायांकन र प्रदर्शन मिति सार्न सुरु गरेका छन्।
जोन अब्रहाम र अर्जुन कपुरको फिल्म ‘अय्याप्पनुम कोशीयुम’को छायांकन पछि सरेको छ। जगन शक्तिले निर्देशन गर्ने फिल्म जनवरीबाट छायांकनमा जाने कुरा थियो। तर, भारतमा निरन्तर बढिरहेको कोरोना संक्रमण र सरकारले गरिरहेका प्रतिबन्धका कारण फिल्मको छायांकन सरेको भारतीय सञ्चारमाध्यमले जनाएका छन्। अब फिल्मको छायांकन अवस्था सामान्य भएपछि गरिने बताइएको छ।
त्यस्तै, अभिनेत्री कटरीना कैफको फिल्म ‘मेरी क्रिसमस’को छायांकनको मिति पनि सरेको छ। जनवरी ७ तारेखबाट छायांकन हुने भनिएको फिल्म ओमिक्रोनका कारण सरेको हो। फिल्ममा धेरै जसो दृश्य रातको समयका भएकाले सरकारका प्रतिबन्धकाबीच फिल्म छायांकन गर्न नसक्ने भएकाले मिति अनिश्चित समयका लागि सारेको निर्माण पक्षले बताएका छन्।
त्यस्तै, सलमान खानको फिल्म ‘टाइगर–३’को छायांकन पनि सरेको छ। जनवरी पहिलो हप्ता दिल्लीमा छायांकन गरिने भनिएको फिल्म जनवरी १७ सम्म सरेको छ। अर्कातिर, बलिउड बादशाह शाहरुख खानको फिल्म ‘पठान’को पनि छायांकनको समय पोस्टपोन्ड भएको छ।
स्पेनमा हुने फिल्मको छायांकनका लागि स्पेनमा केही दृश्यहरु खिच्न बाँकी थिए। तर, युरोपमा बढिरहेको ओमिक्रोनका कारण फिल्मको निर्माण पक्षले हाललाई छायांकन पोस्टपोन्ड गरेको छ। जनवरी पहिलो साताबाट हुने भनिएको छायांकनलाई अनिश्चित समयका लागि सारिएको छ। ‘पठान’को छायांकनका लागि २० देखि २५ दिन स्पेनमा खिच्न बाँकी रहेको भारतीय सञ्चारमाध्यमले जनाएका छन्।
फिल्मको छायांकनजस्तै प्रदर्शन मिति पनि सर्न सुरु भएका छ। डिसेम्बर ३१ बाट प्रदर्शनमा आउने भनिएको शाहिद कपुर अभिनित जर्सी कोरोना महामारीको जोखिमलाई मध्यनजर गर्दै सारिएको छ। फिल्मको निर्माण पक्षले कोरोनाको जोखिमलाई कम गर्न सरकारले जारी गरेको नयाँ मापदण्ड र जोखिमलाई मध्यनजर गर्दै फिल्मलाई सारेको बताएको छ। अब फिल्म कहिले प्रदर्शन हुन्छ भन्ने बारेमा भने खुलाइएको छैन।
यी बाहेक बलिउडमा ठूला लगानीमा बनेका ‘आरआरआर’, ‘राधे श्याम’, ‘पृथ्वीराज’ लगायतका फिल्म पनि पोस्टपोन्ड हुने भारतीय सञ्चारमाध्यमले जनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
