राष्ट्रिय प्रजातन्त्र पार्टी (राप्रपाको) महाधिवेशन हालै सम्पन्न भएको छ। महाधिवेशनले नयाँ नेतृत्व चयन गरेको छ। हामीले निर्वाचित अध्यक्षलाई बधाई, शुभकामना दिइसकेका छौं। निर्वाचनको परिणामलाई स्वीकार गर्न नसकेको भन्ने कुतर्कमा कुनै दम छैन। फराकिलो छाती, चिन्तन र दूरगामी सोचअनुसार नै हामीले केन्द्रीय कार्यसमितिको बैठकमा महत्त्वपूर्ण विषयको उठान गरेका हौं। प्रतिस्पर्धा, चुनावी सरगर्मी लगायतका विषयलाई हामी भृकुटीमण्डपमा नै छोड्न, बिर्सन तयार छौं।
भृकुटीमण्डपको चाहेर पनि बिर्सन नसक्ने घटना भनेको निर्मल निवासको ‘नाङ्गो हस्तक्षेप’हो। जुन विषय स्वीकार्य छैन। यो सामान्य विषय होइन। यसले हामी सबैलाई सधैं लखेटिरहनेछ। हामीले उठाउन खोजेको कुरा कुनै व्यक्तिको हार–जितसँग सम्बन्धित छैन। हामीले उठाएको विषय भनेको राप्रपाको परिकल्पना र आदर्श अनुरुपको राजसंस्थाको भूमिकाको विषय हो। हामी सबै नेपाली जनताको निमित्त सर्वस्वीकार्य हुने राजसंस्थाको पक्षमा क्रियाशील भएको राजनीतिक शक्ति हौं।
सबै राजनीतिक दल र पक्षले सजिलै पचाउन सक्ने राजसंस्था आजको आवश्यकता हो। जो अभिभावकको भूमिकामा रहनु पर्दछ। सबैको साझा हुनुपर्छ। राप्रपाको मूल्य र मान्यता यसरी अडेको छ। तर, पार्टीको मान्यता विपरीत, आदर्श विपरीत मुकुकको राष्ट्रिय राजनितीमा एउटा मात्र रहेको राजसंस्था चाहने पार्टीभित्र पनि त्यो संस्थाले खेल्न खोज्नु दुर्भाग्यपूर्ण हो भन्ने हाम्रो ठम्याइ छ। यो राम्रो भएन। यस्तो प्रवृत्तिले पार्टीको हित गर्दैन। मुलुकको हित गर्दैन। र, स्वयम् राजसंस्थाको पनि हित गर्दैन। राजा सबैको साझा हुन नसक्नु, कुनै व्यक्ति र समूहको स्वार्थमा प्रयोग हुनु त्यो गरिमामय संस्थाको निमित्त अशोभनीय विषय हो।
हामीले उठाएको राजासहितको प्रजातन्त्रको मर्ममाथि यस्तो गैरजिम्मेवार, काँचो कामबाट गम्भीर प्रहार भएको छ, यस्तो हर्कतले पार्टीको आदर्शलाई धुलिसात पार्छ। यस घटनाबाट अन्य राजनीतिक शक्तिहरुमा समेत शंसय शृजना गर्छ। राजसंस्थप्रति नकारात्मक भावनाको विकास हुन्छ। अन्तत्वगोत्वा राजसंस्थाको अजेण्डालाई नै कमजोर पार्नेछ। हामी राजसंस्था सबैको साझा हुनुपर्छ, अभिभावक हुनुपर्छ भन्ने, राजसंस्था चाहिँ कुनै अमुक व्यक्ति र समूहको पछि लाग्दै हिँड्ने घटना अत्यन्तै दुर्भाग्यपूर्ण हो।
हामीले यस विषयलाई गम्भीरतापूर्वक लिनका लागि पार्टीको केन्द्रीय समिति बैठकमा आवाज उठाएका छौं। छलफलमा ल्याउन माग गरेका छौं। यो मुद्दा छानबिन गरि किनारा लगाउन नेतृत्वसमक्ष आग्रह गरेका छौँ। पार्टीभित्र कुरा उठेपछि त्यस् विषयलाई सम्बोधन गर्ने जिम्मेवारी नेतृत्वको हो।
नेतृत्व प्रजातान्त्रिक र विधिसम्मत ढंगले अगाडि बढ्छ र यसलाई गम्भीरतापूर्वक लिन्छ भन्नेमा हामी आशावादी छौं। यो विषयलाई छानबिनको दायरामा ल्याउँदा घाटा कसैलाई हुँदैन। यसले स्वयं निर्मल निवास, पार्टी, नेतृत्व, एकता सबैको हित गर्छ। हामी पार्टी एकता, परस्पर आत्मियता र नयाँ शिराको यात्रामा अघि बढ्न चाहन्छौं। देशभरिका नेता–कार्यकर्ताको चाहना पनि यही हो। नेतृत्व अकर्मण्य भएर अगाडि बढ्न खोजे परिस्थिति दुर्भाग्यपूर्ण हुन सक्छ। जुन हाम्रो चाहना हुँदै होइन।
(बर्तौला राष्ट्रिय प्रजातन्त्र पार्टीका केन्द्रीय सदस्य हुन्।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1751526495.png)
-1749826086.png)
