काठमाडौं– आउँदो हप्ताको शुक्रबारदेखि एक साताभित्र तीन नेपाली फिल्महरु हलमा लाग्दैछन्। पुस ९ गते ‘चुरीफुरी’सँगै पुस १५ गते ‘चपली हाइट ३’ र पुस १६ गते ‘कठपुतली’को प्रदर्शनको घोषणा भएको छ।
केही समयअघि कोरोना महामारीले चलचित्र क्षेत्रलाई थला पारेको भन्दै नेपाली फिल्मको प्रदर्शन नजुँधाउने भन्दै दुई साताको अन्तरमा फिल्म प्रदर्शन गर्ने निर्णय गरेका चलचित्रकर्मीहरुले नै फिल्मलाई जुधाउनमा लागि परेका छन्।
कोरोना महामारीको जोखिमका कारण २० महिनासम्म बन्द गरेका हलहरु गत भदौदेखि सञ्चालन गर्ने सरकारले अनुमति दिएपनि नेपाली सिनेमा चल्न सकेनन्। नेपाली निर्माताहरुले फिल्म प्रदर्शन गर्दा दर्शक नआउने भन्दै आफ्नो फिल्मलाई रिलिज नै गर्न मानेनन्। चलचित्र विकास बोर्डले भदौदेखि तीन महिनासम्म विभिन्न सहुलियतको घोषणा गरेपनि फिल्म प्रदर्शन गर्नमा नेपाली निर्माताहरु राजी थिएनन्।
त्यसबीच नेपाल चलचित्र संघले निर्देशक अशोक शर्माका संयोजकत्वमा एउटा समिति बनायो। उक्त समितिले कोरोनाका कारण थलिएको चलचित्र उद्योगको हितका लागि भन्दै केही समय नेपाली फिल्महरु दुई–दुई साताको फरकमा प्रदर्शन गर्ने र एकसँग अर्कोलाई नजुधाउने निर्णय गरेको थियो।
तर, आफैंले गरेको निर्णय स्वयम् चलचित्रकर्मीहरुले नै तोडेका छन्। हिन्दी र हलिउडका फिल्महरुले हलमा दर्शकको चाप बढाएसँगै एउटा फिल्मसँग अर्को फिल्म जुधाउन लागिपरेका छन् नेपाली निर्माताहरु।
ऋषिराज आचार्यले निर्देशन गरेको फिल्म ‘चुरीफुरी’ पुस ९ गते प्रदर्शन हुँदैछ। त्यस्तै, पुस २ गते प्रदर्शन हुने घोषणा गरेर पछि आफ्नो फिल्मसँग हिन्दी फिल्मको जुँध्ने भन्दै मिति सारिएको ‘चपली हाइट ३’ पुस १५ गते प्रदर्शन हुँदैछ। ‘चपली हाइट ३’का निर्माता अर्जुन कुमार आफैंले चलचित्र संघले गरेको निर्णय तोड्दै आफ्नो फिल्म ‘चुरीफुरी’को प्रदर्शनसँगै राखेका छन्।
‘चपली हाइट ३’को प्रदर्शन मिति सर्नुअघि ठीक दुई साताको अन्तरमा प्रदर्शन हुने घोषणा भएको अर्को फिल्म ‘कठपुतली’ पनि सोही साता प्रदर्शन हुँदै छ। भीमसेन लामाले निर्देशन गरेको फिल्म पुस १६ गते प्रदर्शनको घोषणा भएको छ।
आउँदो साताको शुक्रबारदेखि एक साताको अवधिमा यी तीन फिल्म प्रदर्शन हुँदैछन्। सँगै बलिउड र हलिउडका अन्य चार फिल्मको पनि प्रदर्शन यही मितिमा छ। ‘द मेट्रिक्स रेजरेक्सन’, ‘गोस्टबस्टर्स’, ‘अतरंगी रे’जस्ता फिल्महरु पनि यही साता प्रदर्शन हुँदै छन्।
हेरौं, आफैं दर्शक आएनन् भन्दै नियम बनाउने चलचित्रकर्मीले अब एकै समयमा फिल्म जुधाएर कसरी दर्शक पाउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
