महाधिवेशन

साहित्य डबली

महाधिवेशन

पुरुषोत्तम आचार्य शनिबार, मंसिर २५, २०७८ १२:३२

सहस्र किरणहरूमा
दासताको विष भरेर
लाखौँ ताराहरूलाई गिज्याउँदै
अँध्यारोको साम्राज्यसित
यो धरतीको उज्यालो साट्ने
सम्झौता गर्दैछ
एउटा सूर्य
महासय! यो गद्दारीवेशन हो; महाधिवेशन हुनै सक्दैन!!

भित्र्याँउदै घातक
बहुराष्ट्रिय कार्वनडाइअक्साइड
आफ्नै सञ्जीवनीको
अथाह र स्वच्छ अक्सिजन
आवधिक रूपमा
आणविक हतियारको कारखानातिर
खुलेआम बुझाइरहेछ
एउटा बूढो रुख
महासय! यो दलालीवेशन हो; महाधिवेशन हुनै सक्दैन!!

बर्षौंवर्ष
मान्छेहरूका आँखा, जिब्रो, र पेटमा
डस्दाडस्दै मर्न पुगेका
भयानक विषालु सर्पहरू
फेरि बौरेर
एकजुट भई जोत्ने कोसिस गर्दैछन्
मान्छेहरूकै छातीमा
एउटा नृशंस हलो
महासय! यो अपराधिवेशन हो; महाधिवेशन हुनै सक्दैन!!

ठिंगुर्‍याउँदै सपनाका मुनाहरू
दुर्गन्धित सिनोमा
दाँत गाडिरहेछ हँसिया
वर्गशत्रुको टेबिलमा
वीभत्स रसको गिलाँससित
‘चियर्स’ गरेपछि
ठाउँ कुठाउँ बज्रिरहेछ हथौडा
र, पनि भनिरहनेछन् ती
‘किसानसितै छ हँसिया’
‘मजदुरसितै छ हथौडा’
महासय! यो भ्रान्तिवेशन हो; महाधिवेशन हुनै सक्दैन!!

आउनुहोस्!
हाम्रा जीवन र सपनाका हत्यारा ‘महाधिवेशन’हरूको
सख्त खारेजीको घोषणा गरौँ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।