काठमाडौं– मंसिर ७ गते काठमाडौंको बाफलमा जलेको अवस्थामा एउटा वृद्धको शव भेटियो।
शवको पहिचान मेटाउने गरी जलाइएको पाइएपछि प्रहरीले हत्या आशंकामा अनुसन्धान अगाडि बढायो। प्रहरीलाई सुरुमा मृत व्यक्तिको सनाखत गर्नै गाह्रो भयो।
अनुसन्धान सुरु भएको करिब १० दिनपछि प्रहरीले मृत फेला परेका व्यक्तिको सनाखत गर्न सक्यो। जलेको अवस्थामा भेटिएको शव काभ्रेको तिमाल गाउँपालिका–८ घर भइ बाफल बस्ने ७६ वर्षीय टेपबहादुर भनिने हर्कबहादुर बानियाको भएको खुल्यो।
महानगरीय अपराध महाशाखाका प्रमुख एसएसपी चन्द्रकुवेर खापुङका अनुसार १० दिन लामो अनुसन्धानपछि उक्त शवको सनाखत हुन सकेको हो। शवको सनाखत भएपछि प्रहरीले सुरुमा मृत भनेर आशंका गरिएका व्यक्ति नै अभियुक्त भएको समेत खुल्यो।
स्थानीयका अनुसार बानियाको शव भेटिएको ठाउँमा सुशील शर्मा नाम गरेका व्यक्ति बस्दै आएका थिए। सुशील बाफल क्षेत्रमा मागेर हिँड्ने गरेका थिए। बस्ने ठाउँमा नै शव भेटिएपछि सुरुमा प्रहरीले मृतक व्यक्ति सुशील भएको आशंका गरेको थियो।
यद्यपि अनुहार समेत डढेकाले शवको पहिचान हुन सकेको थिएन। त्यसपछि अपराध महाशाखाका डिएसपी कृष्ण चन्द नेतृत्वको टोलीले उक्त घटनाको अनुसन्धान सुरु गरेको थियो। अनुसन्धानका क्रममा प्रहरीले सुरुमा मृत भनेर आशंका गरेका शर्मा नै अभियुक्त भएको खुल्यो।
‘शव कसको हो भन्ने हामीलाई पहिचान गर्न निकै गाह्रो भएको थियो। शवको सनाखत भएपछि हामीले मृत भनेर आशंका गरिएका व्यक्ति नै अभियुक्त भएको पाइयो,’ महाशाखाका एसएसपी खापुङले भने।
मृतकको फिंगर प्रिन्ट समेत सुरक्षित राखेर अनुसन्धान गरेको र पछि सनाखत भएपछि बानियाले वृद्ध भत्ता निकाल्दा फिंगर प्रिन्टसँग मेल खाएपछि मृतक बानिया नै भएको पुष्टि भएको थियो।
बानियाका भतिजमार्फत् उनको शवको सनाखत भएको थियो। गत ४ मंसिरमा भतिजसँग बाटोमा बानियाको जम्काभेट भएको थियो। मलेसियाबाट फर्किएका भतिजले भिडियो समेत बनाएका थिए। उक्त भडियोमार्फत् मृत व्यक्ति प्रहरीले पहिले आशंका गरेका सुशील नभएर बानिया भएको खुलेको थियो। त्यसपछि प्रहरी अनुसन्धानमा सुशील तानिएका थिए।
बानियाले वृद्ध भत्ता समेत निकाल्ने गरेको र भतिजसँग भेट हुँदा उनले समेत पैसा दिएका हुनसक्ने भएकाले बानियासँग राम्रै पैसा हुनसक्ने आशंकामा सुशीलले बानियालाई आफू सुत्ने ठाउँमा (गाईबाख्रा चोकस्थित एउटा खण्डहर घर) लगेर हत्या गरेको खापुङले बताए।
‘पैसा भएको हुनसक्ने आशंकामा आफू सुत्ने ठाउँमा रक्सी समेत खुवाएर सुशीलले बानियाको गोजीबाट पैसा निकाल्न खोजेका रहेछन्। बानियाले थाहा पाएपछि विवाद हुँदा हिर्काएर सुशीलले हत्या गरेको पाइयो,’ एसएसपी खापुङले भने।
हत्यापछि सुशीलले आगोले जलेर आफैं मृत्यु भएको हो भन्ने देखाउनका बानियाको शरीरमा आगो लगाएर फरार भएको अनुसन्धानबाट खुलेको छ।
सुरुमा सुशीलले आफूलाई घटनाबारे केही जानकारी नै नभएको दाबी गरेका थिए। यद्यपि उनको चप्पल र कपालको केही भाग डढेको देखिएकाले प्रहरीले उनलाई निगरानीमै राखेर अनुसन्धान गरेको थियो। अनुसन्धानका क्रममा प्रहरीले सुशीलको साथबाट आधा जलेको ५० रुपैयाँ समेत बरामद गरेको छ। उक्त ५० रुपैयाँ सुशीलले बानियाको गोजीबाट थुतेका थिए।
प्रहरीका अनुसार बानियासँग टन्नै पैसा हुनसक्ने आकलन गरेर त्यही पैसा हत्याउन सुशीलले हत्या गरेका देखिएको छ। तर, सुशीलले हत्यापछि भने बानियाबाट पैसा फेला पार्न नसकेको बयान दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
