काठमाडौं– अर्थमन्त्री जनार्दन शर्माले मोबाइल डिभाइस म्यानेजमेन्ट सिस्टम (एमडीएमएस) तत्काल लागु गर्ने घोषणा गरेका छन् । नेपाल मोबाइल बितरक संघको दोस्रो राष्ट्रिय महाधिवेशनको उद्घाटन सभामा बोल्दै अर्थमन्त्री शर्माले विभिन्न देशबाट अबैध रुपमा आयात हुने मोबाइल फोनलाई रोक्न एमडीएमएस तत्काल लागु हुने घोषणा गरेका हुन्। ‘मैले अबैध रुपमा मोबाइल फोन आयात हुने विषयलाई व्यवस्थापन गर्न लागु हुने एमडीएमएसबारे हिजो मात्रै थाहा पाएँ,’ उनले भने, ‘तत्काल लागु गर्न निर्देशन दिइसकेको छ। यो तत्काल नै लागु हुन्छ।’
बैध रुपमै धेरै मोबाइल फोन आयात भइरहेको प्रसङ्ग कोट्याउँदै उनले भने, केलाई अबैध भन्ने हो? यहाँ त बैध रुपमा अबैध आयात भइरहेको छ। मैले केही दिन अघिदेखि मन्त्रालयका अधिकारीलाई अबैध सुन आयातलाई अनुगमन गर्न विमानस्थलमा खटाएको छु। त्यहाँ दैनिक २० देखि २२ किलोग्राम अबैध सुन आयात भइरहेको छ। यसैगरी मोबाइल फोन पनि आयात भइरहेको रिर्पोट आएको छ।’
उनले विदेशबाट वैधानिक रुपमा नै दैनिक हजारौं मानिसले ल्याइरहेको मोबाइल फोन रोक्न भने कठिन रहेको कार्यक्रममा बोल्दै उनले भने, बताए। उनले भने, ‘हामी रेमिट्यान्सले अर्थतन्त्र चलाइरहेका छौं। विदेशमा दुःख गरेर नेपाल फर्किनेहरुलाई एउटा फोन पनि ल्याउन नदिनु अन्याय हुन्छ। ल्याउन दिएमा यहाँ दर्ता हुँदैन। यो अली समस्या छ । यद्यपि व्यवस्थित गर्न सरकार प्रतिबद्ध छ।’
मोबाइल मानिसको क्षमताभन्दा पनि अघि बढिसकेको बताउँदै उनले प्रविधिसँगै मानिसको क्षमता पनि बृद्धि गर्नुपर्ने भएको बताए। उनले भने, ‘मोबाइल फोनले हाम्रो आवश्यकताअनुसार चल्न सहज भएको छ । यसमा कनेक्टिभी, सञ्चार, मनोरञ्जन, सूचना सबै चिज अटाएको छ। यो अत्यावश्यक बस्तु भएको छ। त्यसकारण पनि मोबाइलमा सरकारले कडाइ गर्न नै सक्दैन। बिलासिताको बस्तुभित्र मोबाइल फोन परे पनि यसमा कडाइ हुँदैन ढुक्क हुुनुस्।’
नेपाल उद्योग वाणिज्य महासंघका अध्यक्ष शेखर गोल्छाले मोबाइल फोनको अवैध आयात रोक्न सके अर्थतन्त्रमा ठूलो सहयोग पुग्ने बताए। हवाइजहाज र मोबाइलले नै संसारलाई एउटा घर बनाइदिएको गोल्छाको भनाइ थियो। त्यसका कारण मोबाइल फोनलाई बिलासिता भन्नु नै गलत हुने उनले बताए। अहिले मोबाइल फोन अबैध रुपमा आयात भइरहेको बताउँदै उनले अर्थतन्त्रलाई व्यस्थित र औपचारिक रुपमा अघि बढाउन यस्तो आयात रोक्नैपर्ने बताए।
मोबाइल व्यवसायलाई व्यवस्थित गर्न एमडीएमएस लागु गर्नु अनिवार्य सर्त भएको व्यवसायी दीपक मल्होत्राले बताए। ‘चालू आर्थिक वर्षको बजेट दस्तावेजमै समेटिएको विषय भएकाले एमडीएमएस लागु हुनेमा हामी ढुक्क थियौं,’ उनले भने, ‘तर त्यसो हुन सकेन । अब बल्ल अर्थमन्त्री तात्नुभएको छ। लागु हुन्छ भन्ने विश्वास लागेको छ । मोबाइल बजार व्यस्थित गर्न यो अनिवार्य सर्त हो।’
अबैध कारोबार बजारको क्यान्सरजस्तै भएको बताउँदै उनले समयमै काटेर नफाले बजार नै ध्वस्त हुने खतरा बढेको बताए।
यस्तै नविल बैंकका प्रमुख कार्यकारी अधिकृत अनिल केसरी शाहले मोबाइल फोन बिलासिताको बस्तु नभएको बताउँदै यसमा लगानी गर्न बैंकिङ क्षेत्र तयार भएको बताए।
सो अवसरमा नेपाल दूरसञ्चार प्राधिकरणका निर्देशक मीनप्रसाद अर्यालले संस्थाको कानूनी अधिकारभित्र रहेर यही महिनाभित्र एमडीएमएस लागु गरी मोबाइल बजार व्यवस्थित गर्ने प्रतिबद्धता जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791363924.png)
-1786602170.png)
