काठमाडौं– स्वास्थ्य तथा जनसंख्या मन्त्रालयले शुक्रराज ट्रपिकल तथा सरुवा रोग अस्पताल, टेकुका निर्देशक डा अनुप बास्तोलालाई त्यहाँबाट सरुवा गर्ने तयारी अघि बढाएको छ।
पाँच महिना अघिमात्र अस्पतालको निर्देशक नियुक्त भएका डा बास्तोलालाई त्यहाँबाट हटाएर ‘अनुकुल व्यक्ति’लाई त्यसको जिम्मेवारी दिने तयारीमा मन्त्रालय लागेको हो।
स्वास्थ्य तथा जनसंख्यामन्त्री विरोध खतिवडाको इच्छाअनुसार बास्तोलालाई सरुवा गर्न खोजिएको स्वास्थ्य मन्त्रालय स्रोतले बताएको छ।
डा बास्तोला कोभिड–१९ महामारी सुरु भएयता कोरोना संक्रमितको उपचारमा फ्रन्टलाइनमा खटिएका अब्बल चिकित्सक मानिन्छन्। उनको नेतृत्वमा टेकु अस्पतालले कोरोना संक्रमितको उपचारमा उदाहरणीय काम गरेको थियो।
अस्पतालको निर्देशक बनेपछि उनले थुप्रै सुधारका कामसमेत अघि बढाएका थिए।
मन्त्रीको ‘इच्छा’मा मन्त्रालयले उनलाई सरुवा गरेर टेकु अस्पतालबाट हटाउने तयारी गरेपछि स्वास्थ्य मन्त्रालयकै कर्मचारीले विरोध गरेका छन्।
‘मन्त्रीको नजिकका केही मान्छेले अस्पताल सुधारमा खटिएका डा अनुपलाई हटाएर अर्को व्यक्तिलाई निर्देशक बनाउन खोजेका छन्, यसमा आर्थिक चलखेलको कुरा पनि आएको छ’, मन्त्रालयका एक अधिकारीले भने, ‘यो चलखेलमा मन्त्री नै संलग्न हुनुहुन्छ या हुनुहन्न भनेर त म भन्न सक्दिनँ, तर मन्त्रीनिकट केही व्यक्तिहरुले आर्थिक चलखेल गरिरहेका छन्।’
मन्त्री खतिवडाको सचिवालयका एक कर्मचारीले आर्थिक चलखेलको कुरा ठाडै अस्वीकार गर्दै भने, ‘कर्मचारी सरुवा हुने कुरा त सामान्य र प्रक्रियागत कुरा हो नि, यसमा किन चलखेलको चर्चा गरिन्छ?’ उनले टेकु अस्पतालका निर्देशकलाई हटाउने कुरा अहिले नभएको र त्यसमा आर्थिक चलखेलको चर्चा गरेर बदनाम गराउने खेल खेलिएको दाबी गरे।
स्वास्थ्य मन्त्रालय स्रोतका अनुसार डा बास्तोलालाई सार्क क्षयरोग केन्द्रमा सरुवा गर्नेगरी फाइल तयार गरिएको छ। उनको ठाउँमा टेकु अस्पतालमै कार्यरत डा मनिषा रावललाई निर्देशक बनाउन लागिएको मन्त्रालय स्रोतले बतायो।
तर, कोरोना संक्रमितको उपचारमा निरन्तर सक्रिय रहेका र अस्पताल सुधारमा पनि जुटिरहेका डा बास्तोलालाई हटाउन नहुने आवाज मन्त्रालयकै कर्मचारीले उठाएपछि मन्त्री खतिवडाले सरुवा सम्बन्धी निर्णयमा हस्ताक्षर भने नगरेको स्रोतले बतायो। ‘डा बास्तोलालाई हटाउँदा बाहिर राम्रो सन्देश नजाने र मन्त्रीको पनि विरोध हुने भनेर केही कर्मचारीले मन्त्रीलाई जानकारी पनि गराएका छन्’, स्रोतले भन्यो।
डा बास्तोला गत असार १४ गते अस्पतालको निर्देशक बनेका थिए। निर्देशक बनेपछि धेरै सुधारका काम थालनी गरेका उनले अस्पतालको नाममा रहेका जग्गाको खोजी गर्ने र अस्पताललाई ३०० शय्यामा बिस्तार गर्ने योजनासमेत अघि बढाएका छन्।
मन्त्री खतिवडाले भने फाल्तु आरोप लगाउनेहरुका विषयमा कुनै टिप्पणी नगर्ने बताए। 'यस्ता फाल्तु कुराको पनि के जवाफ दिएर हिँड्नु?,' उनले नेपाल लाइभसँग भने, 'जागिर खाएदेखि रिटायर्ड हुँदासम्म एकै ठाउँमा बस्ने भन्ने पनि हुन्छ र? सीडीओ, एसपी, शिक्षा र वन अधिकारी सरुवा भएको देखेको छु। मन्त्रीकै पनि पोर्टफोलियो चेन्ज भएको देखेको छु।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
