काठमाडौं- प्रधानमन्त्री शेरबहादुर देउवाले सर्वोच्च अदालतको विवादमा एक/दुई दिनभित्रै निकास आउने बताएका छन्।
नेपाल बार एसोसियसनको ज्ञापनपत्र बुझ्दै आज प्रधानमन्त्री देउवाले गठबन्धनका दलहरुसँग छलफल गरेर एक/दुई दिनभित्र निकास दिने बताएका हुन्।
नेपाल बारका महासचिव लिलामणि पौडेलका अनुसार बारले प्रधानन्यायाधीश चोलेन्द्र शमशेर जबराको बर्हिगमन हुनुपर्ने १७ बुँदे आरोपसहितको ज्ञापनपत्र प्रधानमन्त्रीलाई बुझाएको छ। बारका अध्यक्ष, पूर्वअध्यक्ष र सर्वोच्च बारका पदाधिकारीसहित बालुवाटार पुगेको टोलीले उक्त ज्ञापनपत्र बुझाएको हो।
प्रधानन्यायाधीश जबराले अदालतमा बिचौलिया परिचालन गरी भ्रष्टाचार बढाएको र न्यायिक विचलन हुने फैसला गरेकाले राजीनामा माग गर्दै आन्दोलनमा उत्रिनुपरेको बारले प्रधानमन्त्रीलाई जानकारी गराएको थियो।
प्रधानमन्त्री देउवाले अदालतभित्रको कुरा सकभर उतै मिल्नुपर्ने आफूहरुको मत रहेको तर अब यसमा गठबन्धनको साझा धारणा आउने र निकास दिनेगरी आउने उनले बताए।
‘तपाईंहरुले उठाउनुभएको कुरा हेरिरहेको छु। बारले गरेको आन्दोलनको बारेमा पनि मैले पनि बुझेको छु,’ प्रधानमन्त्रीले भने, ‘यो धेरै लामो जान हुँदैन। गठबन्धनमा छलफल गरेर एक/दुई दिनमा निकास आउँछ।’
बारले कात्तिक ११ गतेदेखि प्रधानन्यायाधीश जबराको राजीनामा मागसहित आन्दोलन गर्दै आएको छ। जबराले भने सडकबाट दबाब दिएकै आधारमा राजीनामा नदिने टिप्पणी गरेका छन्।
बारले प्रधानमन्त्री देउवालाई भेटेर महाअभियोगको प्रक्रिया अघि बढाउन भनेको छ। संसद् बन्द रहेकोले तत्काल खुलाएर महाअभियोगको प्रक्रिया सुरु गर्न बारका पदाधिकारीहरुले ध्यानाकर्षण गराएका थिए। बारले यसअघि नेकपा (एमाले), माओवादी केन्द्र लगायतका नेताहरुलाई भेटेर ज्ञापनपत्र बुझाइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
