काठमाडौं– बिहीबार सर्वोच्च अदालतदेखि प्रधानमन्त्री निवास बालुवाटारसम्म मार्च पास 'न्याय मार्च' गरेका पेसाकर्मी तथा अभियन्ताहरूले प्रधानन्यायाधीश चोलेन्द्र शमशेर राणाविरुद्ध तत्काल महाअभियोग प्रक्रिया अगाडि बढाउन माग गरेका छन्। राणाविरुद्ध नबढाए दलविरुद्ध आन्दोलन गर्ने उनीहरूको चेतावनी छ।
प्रधानन्यायाधीश राणाले विचौलियाको संरक्षण तथा अदालतमा भ्रष्टाचार संस्थागत गरी विकृतिहरू बढाउन सहयोग गरेका कारण उनलाई पदबाट हटाउन अपरिहार्य भइसकेको अभियन्ताहरूको भनाइ छ। तत्काल संसद अधिवेशन आह्वान गरी राणाविरुद्ध महाअभियोगको प्रक्रिया अगाडि बढाउन पनि उनीहरूले आग्रह गरेका छन्।
प्रधानन्यायाधीश राणाविरुद्ध कात्तिक ८ गतेदेखि जारी नेपाल बार एसोसिएसनको आन्दोलनमा बिहीबार विभिन्न पेसागत संगठन र अभियन्ताहरूले पनि ऐक्यवद्धता जनाएका छन्। ८ वटा पेसागत संघ–संस्थाका तर्फबाट बोल्ने वक्ताहरूले न्यायको पवित्रस्थल बचाउनका लागि बारको आन्दोलनमा पूर्ण सर्मथन रहने बताए।
बारले चलाएको आन्दोलनमा साथ र सहयोगसँगै आवश्यक परेमा आगामी दिनमा सक्रिय रुपमा आन्दोलनमा सरिक हुने पनि उनीहरूले प्रतिवद्धता जनाए।
बिहीबार २ वजे सर्वोच्च अदालतको गेटवा सुरु भएको मार्चपास बालुवाटारस्थित प्रधानमन्त्रीको सरकारी निवास छेउ पुगेर कोण सभा गरेर सकिएको थियो।
कसले के भने?
नेपाल बारको अग्रसरतामा भएको बिहीबारको मार्च पासमा नेपाल पत्रकार महासंघ, इन्जिनियर्स एसोसिएसन, आदिवासी जनजाति महासंघ, जन स्वास्थ्य संघ, शिक्षक महासंघ र विहृत नागरिक आन्दोलनको सहभागिता रहेको थियो। मार्च पासपछि आयोजित कोण सभालाई सहभागी सबै संगठनका प्रतिनिधिले सम्बोधन गरेका थिए।
पुर्णमान शाक्य, अध्यक्ष सर्वोच्च बार एसोसिएसन
यो आन्दोलन हाम्रो रहर हैन। विकृतीको पराकाष्टा नाघेका कारण हामीले सुरु गरेका हौं। संवैधानिक अंगहरूले आफ्नो भूमिका पूरा नगरेका कारण कानुन व्यवसायी अनि विविध पेसागत संघ–महासंघहरू आन्दोलनमा आएका छौं। अब प्रभानन्यायाधीश चोलेन्द्र शमशेर राणालाई फर्केर सर्वोच्च आउन नदिन यो आन्दोलन सडकमा आएको हो। उनी आउने बाटो अब समाप्त भएको छ। हामीले प्रधानन्यायाधीश राणालाई बिदाई गरिसकेका छौं। अब उनी संवैधानिक रुपमा बहिर्गमन हुन मात्र वाँकी छ।
श्रीकृष्ण भट्ट, अध्यक्ष जनस्वास्थ्य संघ
हामीले धेरै दिनदेखि भइरहेको आन्दोलन हेरिरहेका छौं। राजनीतिक दलहरू किन सुतिरहेका छन्? हामी प्रश्न सोध्न चाहन्छौं। दलहरूले अब भन्नुपर्यो कि चोलेन्द्र शमशेर ठिक छन् कि हामी ठिक छौं? राणा ठिक छैनन् भने तत्काल महाअभियोग लगाउन अघि वढ्नुस्। यदि तपाईंहरू नतात्ने हो भने अब जनता सडकमा आउनुपर्ने भएको छ। सडकमा आम जनता लाखौंको संख्यामा आएपछिमात्र दलहरूले चेत्ने हो भने राजनीतिक दलहरूमाथि पनि प्रश्न उठ्ने छ। राजनीतिक दलहरूको व्यवस्थामाथि पनि प्रश्न उठ्ने छ।
जगत बराम, अध्यक्ष आदिवासी जनजाति महासंघ
सामाजिक न्यायको लागि भएको आन्दोलनमा हाम्रो समर्थन छ। विचौलिया र न्यायालयभित्र भएको भ्रष्टाचारको विरुद्धको भएकाले निरन्तर समर्थन छ। न्यायालयमा आज भ्रष्टाचार ,विचौलिया र तस्करी मैत्री भएको छ। पैसा हुनेहरूका लागि अदालत हुन सक्दैनन्। राणा शासन अन्त्य भयो होला भनेको सर्वोच्च अदालतमा वाँकी रहेको छ। बार र अरु संघ महासंघहरू सडकमा आउँदा राजनीतिक दलहरू मौन बस्न पाइँदैन। अब दलहरूविरुद्ध पनि आन्दोलित हुनुपर्ने भएको छ। यदि यसैगरी मौन हुने हो भने राजनीतिक दलहरूविरुद्ध आन्दोलन सुरु हुने छ।
छविराज पोखरेल, अध्यक्ष इन्जिनियर्स एसोसियसन
न्याय मर्नु भनेको राज्य मर्नु हो। अन्तिम अवस्थामा न्याय खोज्न जाने ठाउँ सर्वोच्च अदालत हो। त्यसैविरुद्ध आन्दोलन गर्ने, अनि हामीले सर्मथन गर्नुपर्ने दु:खद अवस्था रहेको छ। न्याय पाउने अन्तिम आश रहेको स्थानमा बसेकाले न्यायको चिरहरण गरेको छ। आन्दोलनमा साथ दिन तयार छौं। न्याय मर्न दिन हुँदैन, यो हाम्रो पनि अभियान हो। त्यसैले बारको हरेक कदममा साथ हुने छ।
कमला तुलाधर, अध्यक्ष नेपाल शिक्षक महासंघ
नेपालको कानुन दैवले जानुन भन्ने कुरा पहिले सुनेको अहिले अहिले देखिरहेको छु। नागरिकहरूको आन्दोलनबाट सधैं न्यायको पक्षमा आवाज उठेको छ। सधैं परिवर्तनका लागि जनता सडकमा आएका छन्। अब पनि जनता सडकमा आएका छन्, दलहरू होसियार हुनुहोला। सामान्तवादको अवशेष राणा रहेछन् भन्ने देखिएको छ। विचौलियाहरूलाई संरक्षण भइरहेको कुरा आएका छन्, न्याय नपाउनेले पाएका तथ्यहरू सार्वजनिक भएका छन्। तर, दु:खद्, दलहरू मौन रहेका छन्। प्रधानमन्त्री शेरवहादुर देउवा अब मुख खोल्नु पर्छ। सम्पत्ति पनि छानबिन हुनुपर्छ। दलहरूले तत्काल संसद बोलाएर प्रधानन्यायाधीश राणाविरुद्ध महाअभियोगको प्रक्रिया सुरु गर्नुपर्छ।
रमेश विष्ट, वरिष्ठ उपाध्यक्ष नेपाल पत्रकार महासंघ
जनताले न्याय नपाउने व्यवस्था लोकतन्त्र हैन। राजनीतिक दलहरू अहिले महाअभियोग नलगाउने जसरी बसेका छन्, यो जनताको जनमतको घोर अपमान हो। बारको आन्दोलनमा हाम्रो सर्मथन छ। भविष्यमा खुट्टा नकमाएर अघि बढ्न आग्रह गर्छु। दलहरूले बेलैमा आँखा खोल्न जरुरी छ। राणाविरुद्ध महाअभियोगको पक्रिया अगाडि नबढाउने हो भने यो व्यवस्थामाथि नै प्रश्न उठ्ने अवस्था सिर्जना हुँदै गएको छ।
नारायणा वाग्ले, पत्रकार/अभियन्ता
गत वर्ष प्रतिगमनको प्रतिरोधमा संगठित नागरिक आन्दोलनले जुन ठाउँमा तेस्रो जनआन्दोलनको घोषणा गरेको थियो। एक वर्षपछि फेरि आज त्यही ठाउँमा आइपुगेका छौं। हाम्रो तेस्रो जनआन्दोलनको घोषणाको औचित्य पुष्टि भएको छ।
जुन राजनीतिक नेताहरुलाई हामीले नेपाल रुपान्तरण गर, राज्य प्रणाली बदल भनेर जिम्मेवारी दिएर पठाएका थियौं। सिंहदरबारको सिँढी चढेपछि हाम्रा शासकहरु जंगबहादुर राणा बन्न थाले। ‘जबरा’ बन्न थाले।
राजनीतिक पार्टीहरुलाई जिम्मेवार बनाउन हाम्रो बृहत् नागरिक आन्दोलन जारी छ।
हाम्रो आन्दोलनले बुढानिलकण्ठमा सुतिरहेका व्यक्तिलाई पानी छम्केर बालुवाटारमा ल्यायो। तिनी एक महिनासम्म पनि बालुवाटारमा सुतेको सुत्यै छन्। सुतिरहने हो भने बुढानिलकण्ठ फर्किए हुन्छ।
अर्का एक जना नेता हुनुहुन्छ। हिजो क्रान्ति गरेको भनेर सधैं गफ गर्नुहुन्छ। तर आजभोलि दैनिक रुवाबासीको भाषण गर्नहुन्छ। उहाँलाई जिम्मेवारी बोध गर्न दबाब दिन्छु।
नेपालको राज्य रुपान्तरणमा हिजो न्यायपालिकालाई जस्ताको तस्तै छोडियो। राजनीति गर्छु भन्ने, देश बदल्छु भन्नेले न्यायपालिका बदल्नुपर्छ कि पर्दैन?
अर्को नेता हुनुहुन्छ। लाखौं कार्यकर्ताका साथ अहिले नारायणी किनारमा हुनुहुन्छ। अहिले न्यायापालिकालाई न्याय भन्ने तत्व नै नरहेको चिज बनाइसक्दा पनि ‘फैसला गर्ने सबैले राजीनामा दिउन्’ भन्दै न्यायपालिकाप्रतिको आफ्नो जवाफदेहिता र भूमिका बिर्सिने नेतालाई म भन्छु, तपाईं काठमाडौं नफर्किए हुन्छ। नजिकै देवघाट छ। नारायणी किनारबाट देवघाट जानुस्। पाँच लाख कार्यकर्ताले एकएक रुपैयाँ उठाए भने तपाईंलाई सुनको कमन्डलु किन्न पुग्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
