काठमाडौं- नेकपा माओवादी केन्द्रका स्थायी समिति सदस्य नारायणकाजी श्रेष्ठ र नेकपा महासचिव नेत्रविक्रम चन्द ‘विप्लव’बीच दुई पार्टीबीच सहकार्य गर्ने विषयमा छलफल भएको छ।
श्रेष्ठनिवास हात्तीवनमा बिहान साढे ९ बजे विप्लव र श्रेष्ठबीच नेपालको कम्युनिस्ट क्रान्तिकारी आन्दोलन विकास गर्न सहकार्य गर्ने विषयमा छलफल भएको बताएको छ।
‘विप्लव कमरेड र नारायण्काजी कमरेडबीच धेरैजसो राजनीतिक विषयमै छलफल भयो। नेपालको कम्युनिस्ट क्रान्तिकारी आन्दोलनका बारेमा गहिरो समीक्षा भयो। त्यसका लागि गहिरो अध्ययन, छलफल, बहस गर्दै विचारको विकास गर्ने भन्ने भयो’, श्रेष्ठनिकट एक नेताले भने, ‘देश र जनताका तात्कालीक मुद्दामा सकारात्मक प्रभाव दिन सहकार्य वा कार्यगत एकता के गर्न सकिन्छ भन्ने विषयमा छलफल भयो।’
नेपालको कम्युनिस्ट आन्दोलनलाई एक ढिक्का बनाउन वैचारिक रुपमा एक ठाउँमा आउने विषयमा सकारात्मक छलफल भएको ती नेताले बताए।
यस्तै, विप्लवले तत्कालीन प्रधानमन्त्री केपी शर्मा ओली नेतृत्वको सरकारले तीन बुँदे सहमति गरेपनि कार्यान्वयन नभएको भन्दै गठबन्धन सरकारले गर्नुपर्ने बताएका थिए। ‘हामीले केपी ओली नेतृत्वको सरकारसँग तीन बुँदे सहमति गर्यौं। त्यतिबेला तीन बुँदे सहमति कार्यान्वयन नहुँदा नेता कार्यकर्ता छुट्न सकेका छैनन्। अहिले गठबन्धनको सरकार बनेको छ। त्यसले नेता कार्यकर्ता छुटाउनुका साथै मुद्दा फिर्ता लिइदिनुपर्यो भन्ने विषयमा छलफल भयो’ ती नेताले भने। ओली सरकारले तीन बुँदे सहमति कार्यान्वयन नगरेर बेइमानी गरेको भन्दै विप्लवले आक्रोश पोखेका थिए।
माओवादी र विप्लव नेतृत्वको नेकपाबीच सहकार्य गर्ने विषयमा प्रचण्ड, प्रवक्ता कृष्णबहादुर महरा र विप्लवबीच शनिबार खुमलटारमा छलफल भएको थियो। प्रचण्ड र विप्लवबीच तत्काल एकता सम्भव नभएपनि मुद्दा मिल्ने विषयमा सहकार्य गर्दै एकतामा जान सकिने विषयमा छलफल भएको थियो।
विप्लवलाई महराले पार्टी महासचिव बनाएर भएपनि एकता गर्नुपर्ने भन्दै निरन्तर छलफल जारी राखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
