काठमाडौं- नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले नेकपाका महासचिव नेत्रविक्रम चन्द 'विप्लव'सँग सहकार्यको प्रस्ताव गरेका छन्। शनिबार बिहान ९ बजे आफ्नो निवास खुमलटारमा भएको छलफलमा प्रचण्डले विप्लवलाई एमालेसँगको एकताको सन्दर्भ पनि सुनाएका थिए।
'मैले नेपालमा बृहत् कम्युनिस्ट एकता गर्न खोजेको थिएँ। ओलीसँग एकता गरेँ। तर सफल हुन सकिनँ। ओली बेइमान निस्किए,' प्रचण्डको भनाइ उद्धृत गर्दै खुमलटार स्रोतले भन्यो, 'अब हामी मिलेर सहकार्य गरौँ।'
छलफलमा विप्लवले माओवादी केन्द्रसँग तत्कालै एकताको सम्भावनालाई नकारेका थिए। 'तत्काल एकता सम्भावना छैन। सहकार्य गर्दै जाऔँ,' उनको जवाफ थियो, 'दीर्घकालीन रुपमा छलफल गर्दै जाऔँ।'
दुई नेताबीच अन्य समसामयिक विषयमा पनि छलफल भएको बताएको छ। अन्तिममा भने तत्काल सहकार्य गर्दै एकतासम्म पुग्ने समझदारी भएको बताइएको छ।
छलफलमा प्रचण्ड र विप्लवको साथमा माओवादी केन्द्रका प्रवक्ता कृष्णबहादुर महरा पनि सहभागी थिए। महरा पछिल्लो समय विप्लवसँग नियमित छलफलमा छन्। उनले पार्टी एकताको प्रयास पनि गरिरहेका छन्।
माओवादी नेतृत्वमा भएको 'जनयुद्ध'मा दुई नेताबीच निकट सम्बन्ध थियो। तर शान्ति प्रक्रियामा आएसँग प्रचण्डसँग टाढिएका विप्लव २०६९ सालमा तत्कालीन एनेकपा माओवादी विभाजन हुँदा मोहन वैद्य किरणतर्फ लागेका थिए। उनले २०७१ मंसिरमा किरण नेतृत्वको नेकपा-माओवादी पनि विभाजन गरी नेकपा गठन गरेका थिए। हिंसात्मक गतिविधिमा संलग्न भएपछि २०७५ फागुनमा सरकारले प्रतिबन्ध लगाएको थियो। दुई वर्षपछि २०७७ फागुनमा सरकारसँग तीनबुँदे सहमति गरेपछि प्रतिबन्ध हटेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769517261.png)
-1764146706.png)
