१. सुक्ष्म राक्षस
यो घातीको नाम तिमी चाहे
कोरोना भन
वा कोभिड
वा जे भन
यो सुक्ष्म राक्षस हो
यसले ताकेपछि
कि सताउँछ
कि अधमरो पार्छ
कि मार्छ
निकै घाती छ यो अदृश दुष्टात्मा
यसको दंशमा
कसैका बा
कसैकी आमा
कसैकी पत्नी
कसैको छोरो
कसैकी छोरी
सब परिवारहरू एकाएक कल्वित भएका छन्
मृत्युको यति धेरै वैश्विककरण
कुनै युगले देखेको थिएन
अरु कुनै युगलाई
यति धेरै वैज्ञानिक
यति धेरै प्रयोगशाला
यति धेरै अस्पताल
यति धेरै डाक्टर
यति धेरै नर्सहरु
य ति धेरै अक्सिजन सिलिन्डर
य ति धेरै भेन्टिलेटर
चाहिएको थिएन
यति धेरै लाचारी
कुनै युगको तस्बिरमा देखिँदैन
मर्नेहरु
म मात्र हैन मर्ने भनेर
मरिरहेछन्
अरु मरेको दृष्टान्तमा
चित्त बुझाएर
यति धेरै
मर्नेहरू
कुनै युगमा थिएनन्।
२. विभेद कोभिड संसार
कोभिड सल्किएर
भर्खरै डोनाल्ड ट्रम्पलाई
सैनिक अस्पताल वाल्टर रिड लगियो
त्यै स्थितिको छटपटिँदो
म
एम्बुलेन्स कुर्दैछु।
कत्ति फरक छ मेरै भोट पाएको डोनाल्ड ट्रम्प
र ममा
म अठाह्र घण्टादेखि एम्बुलेन्स कुर्दैछु
डोनाल्ड ट्रम्पले खोक्ने वित्तिकै हेलिकोप्टर पाएको छ
उम्दा डाक्टरहरूको सुसार पाएको छ
केही दिनमा ऊ सकुशल फर्कनेछ ह्वाइटहाउस
म कफिनभित्र बन्द हुनेछु
विभेदको संसारमा
जनता दबिएरै मर्छ।
चाहे कोभिड होस् वा
फ्लू
वा पूँजी।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।