काठमाडौं– प्रधानन्यायाधीश चोलेन्द्र शमशेर राणाको राजीनामा माग गर्दै आन्दोलनमा रहेका कानुन व्यवसायीले दोस्रो दिन (आइतबार) पनि सर्वोच्च अदालतको मुख्य प्रवेशद्वार (मूल गेट) अगाडि धर्ना दिए।
सर्वोच्चमा धर्ना दिनका लागि आइतबार बिहान १० बजे नै कानुन व्यवसायीहरू नेपाल बार एसोसिएसनको प्राङ्गणमा भेला भइसकेका थिए। कानुन व्यवसायीहरू नेपाल बार र सर्वोच्च अदालतको भवनको बीचमा रहेको गेटबाट छिरेर सर्वोच्चको मूल गेटमा पुगेका थिए।
सर्वोच्चमा धर्ना सुरु गर्दाको पहिलो दिन (शुक्रबार) भने कानुन व्यवसायीलाई बारको भवनसँग जोडिएको गेटबाट सर्वोच्च प्रवेश गर्न दिइएको थिएन। शुक्रबार कानुन व्यवसायीले गेट बाहिरै बसेर धर्ना दिएका थिए।
आइतबार बारका पदाधिकारीसहित कानुन व्यवसायीहरूले मूल गेटमा धर्ना दिइरहेको बेला प्रधानन्यायाधीश राणा भने ११ बजेको समयमा वैकल्पिक ढोकाबाट सर्वोच्च छिरे। शुक्रबारजस्तै आइतबार पनि राणा महान्यायाधिवक्ता कार्यालयसँगै रहेको प्रवेशद्वारबाट सर्वोच्च प्रवेश गरे।
सुरक्षाकर्मीको घेरामा रहेर वैकल्पिक बाटोबाट राणा सर्वोच्च छिर्दा धर्नामा रहेका कानुन व्यवसायीहरूले नाराबाजी र भाषण गरिरहेका थिए। मूल गेट बन्द थियो भने कानुन व्यवसायीहरू सर्वोच्च भित्र धर्नामा बसिरहेका थिए।
बारको अगुवाइमा कानुन व्यवसायीको धर्ना सुरु नहुँदै आइतबार बिहान केही कानुन व्यवसायीले प्रधानन्यायाधीश राणाको पक्षमा नाराबाजी पनि गरेका थिए। प्रहरीले उनीहरूलाई तत्कालै नियन्त्रणमा लिएको थियो।
प्रधानन्यायाधीश राणा अदालत प्रवेश गरिसकेका थिए। कानुन व्यवसायीहरू अदालतको भित्र (मूल गेट छेउमा) शान्तिपूर्ण धर्नामा थिए। करिब ११:३० बजेतिर केही युवा सर्वोच्च अदालतको मूल गेट अगाडि (सडकमा) जम्मा भए। उनीहरू लगातार मोटरसाइकलको हर्न बजाउन थाले।
गेट अगाडि जम्मा हुने युवाहरूको संख्या बढ्दै गयो। त्यसपछि त्यहाँ 'सर्वोच्च अदालत बन्द गर्न पाइँदैन' भन्दै नाराबाजी सुरु भयो। नाराबाजी मात्र हैन, सर्वोच्चको गेट अगाडि जम्मा भएकाहरूले सर्वोच्च भित्र धर्नामा बसेका कानुन व्यवसायीमाथि गालीगलौज समेत गर्न थाले।
प्रधानन्यायाधीश राणा वैकल्पिक बाटोबाट भित्र छिर्दा धर्नामा बसेका कानुन व्यवसायीबाट भएको सुरु भएको नाराबाजी रोकिइसकेको थियो। धर्नामा रहेकामध्ये केही कानुन व्यवसायीले भाषण गर्नुबाहेक सर्वोच्चको माहोल 'शान्त' नै थियो। तर, गेटमा जम्मा भएको समूहले धर्नामा बसेकामाथि गालीगलौज गर्न थालेपछि भने सर्वोच्च परिसरको माहोल गर्माउन थाल्यो।
गेट बाहिर भएकाहरू भित्र छिर्न खोजिरहेका थिए भने भित्र धर्नामा बसेका कानुन व्यवसायीले पनि उनीहरूको 'प्रतिवाद' गर्न तयार हुन थाले। सर्वोच्च परिसर एकाएक रणमैदान बन्ने अवस्था देखिन थाल्यो।
गेट बाहिर रहेको समूह उग्र बन्न थालेपछि प्रहरीले हस्तक्षेप गरेर उनीहरूलाई त्यहाँबाट हटायो। करिब आधा घण्टाको कोलाहलपछि १२ बजेदेखि बारले आफ्नो धर्ना स्थगित गर्यो।
कानुन व्यवसायीको आरोप– 'राणा अब गुण्डानाइके भए'
सर्वोच्चको गेटमा धर्ना दिन पुगेकामध्ये केहीलाई प्रहरीले नियन्त्रणमा लिएको थियो। प्रहरीले नियन्त्रणमा लिएकाहरू काठमाडौंमा हुने विभिन्न आपराधिक घटना (गुण्डागर्दी)मा संलग्न रहेकादेखि राजतन्त्र पक्षधरहरू रहेको खुलेपछि भने कानुन व्यवसायीहरू प्रधानन्यायाधीश राणाविरुद्ध झन् उग्र रुपमा प्रस्तुत भए।
नेपाल बारका उपाध्यक्ष ईश्वरी भट्टराईले सर्वोच्च परिसरबाटै प्रधानन्यायाधीश राणा 'विचौलियाको नाइकेबाट गुण्डानाइके' भएको आरोप लगाए। प्रधानन्यायाधीश राणाले विचौलियाको पैसाबाट आफ्नो पक्षमा नाराबाजी गर्न सर्वोच्च अगाडि गुण्डाहरू उतारेको भट्टराईको आरोप थियो।
महानगरीय प्रहरी परिसर काठमाडौं स्रोतका अनुसार आइतबार सर्वोच्च अदालतको मूल गेट अगाडि भेला भएर 'उपद्रो मच्चाउने' क्रममा पक्राउ परेकामध्ये केही गुण्डागर्दीमा संलग्न व्यक्ति छन् भने केही राजतन्त्र पक्षधरहरू पनि छन्।
यस्तै, निश्चित रकम लिएर विभिन्न समूह र राजनीतिक दलको कार्यक्रममा सहभागी भएर चर्का नारा लगाउने युवाहरू पनि आइतबार राणाको पक्षमा नाराबाजी गर्न सर्वोच्च पुगेका प्रहरी स्रोतले जानकारी दिएको छ।
'सर्वोच्चको गेटबाट पक्राउ परेकामध्ये केही टोले गुण्डा पनि छन्। यसअघि राजतन्त्रको पक्षमा आन्दोलन गर्दै आएका युवा, निश्चित रकम लिएर जुनसुकै दल र समूहको पक्षमा नारा लगाउन पुग्ने युवाहरू पनि पक्राउ परेका छन्,' प्रहरी स्रोतले नेपाल लाइभसँग भन्यो।
नेपाल बार एसोसिएसनका पदाधिकारीहरूले पनि प्रधानन्यायाधीश राणा र राणाका मान्छेले पैसा दिएर आफूहरूको आन्दोलन विथोल्नका लागि 'गुण्डा' परिचालन गरेको दाबी गरे।
नेपाल बार एसोसिएसनका अध्यक्ष चण्डेश्वर श्रेष्ठले बारको आन्दोलनविरुद्ध 'प्रतिआन्दोलन' गर्नेहरू प्रधानन्यायाधीश राणाकै मानिस भएको बताए।
वरिष्ठ अधिवक्ता बद्रीबहादुर कार्की, सतीशकृष्ण खरेल लगायतले न्यायालयको शुद्धीकरणका लागि भइरहेको आन्दोलन विथोल्न खोजिनु दु:खद भएको बताए। अदालतकै सहयोगी मानिने कानुन व्यवसायीले न्यायालयको शुद्धीकरणका लागि आन्दोलन गरिरहँदा त्यो आन्दोलन विथोल्न केही मानिसहरू कसैको पक्षमा नारा लगाउँछन् भने उनीहरू प्रायोजित नै भएको भनेर बुझ्न कुनै गाह्रो नहुने वरिष्ठ अधिवक्ता कार्कीको भनाइ छ।
‘यदि कसैको बारेमा प्रश्न उठाएर आन्दोलन भएको छ भने त्यसको समर्थनमा को उत्रन्छ?’, उनले भने, ‘अवश्य पनि अहिले प्रधानन्यायाधीशको विरुद्ध आन्दोलन उठेकाले उनको समर्थनमा आउने भाडाका मानिस उहाँकै हुन्।’
नेपाल बार एसोसिएसनले प्रधानन्यायाधीश राणाविरुद्ध आन्दोलनका कार्यक्रम घोषणा गर्दै अदालतमा कालोपट्टी लगाएर उपस्थित हुने निर्णय गर्दा केही कानुन व्यवसायी सेतो पट्टी बाँधेर राणाको पक्षमा उभिएका थिए। तर, पछिल्लो समय भने सेतो पट्टीवाला कानुन व्यवसायीको संख्या घट्दै गएको थियो।
प्रधानन्यायाधीश राणाको पक्षमा सेती पट्टी बाँधेरे उत्रिने कानुन व्यवसायीहरू घट्दै गएपछि आइतबार 'भाडाका गुण्डा' सडकमा उतारिएको आन्दोलनरत कानुन व्यवसायीहरूको दाबी छ।
तस्बिरहरू– निमेषजंग राई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1687176507.jpg)
-1749208143.png)
-1749200817.png)
