काठमाडौं– सत्तारुढ गठबन्धनका दलहरुबीच राष्ट्रियसभा र रिक्त रहेका प्रतिनिधि सभा तथा प्रदेश सभाको उपचुनावमा तालमेल गर्ने सहमति जुटेको छ।
सोमबार साँझ प्रधानमन्त्रीको सरकारी निवास बालुवाटारमा बसेको गठबन्धनका दलहरुको बैठकले राष्ट्रिय सभा निर्वाचन र प्रतिनिधि सभा तथा प्रदेश सभाको निर्वाचन संयुक्त रुपमा लड्ने निर्णय गरेको नेकपा माओवादी केन्द्रको संसदीय दलका प्रमुख सचेतक देव गुरुङले जानकारी दिए।
‘राष्ट्रिय सभाको रिक्त रहेको पदमा संयुक्त रुपमा चुनाव लड्ने भन्ने विषयमा सहमति भएको छ,’ उनले भने, ‘निर्वाचन आयोगले प्रतिनिधि सभा र प्रदेश सभाको रिक्त स्थानमा पनि उप चुनाव गर्ने जानकारी गराएकाले त्यसमा पनि संयुक्त रुपमा जाने भन्ने कुरा भएको छ।’
उनले चुनावमा कुन पार्टीले कहाँ लड्ने भन्ने विषयको टुंगो शीर्ष नेताहरुले लगाउने बताए।
सोमबारको बैठकले सरकारका काम–कारबाहीलाई प्रभावकारी बनाउन भनेर ११ सदस्यीय राजनीतिक संयन्त्र समेत गठन गरेको छ।
संयन्त्रमा प्रत्येक दल (नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चा)बाट २/२ जना सदस्य रहने छन्। यस्तै, मन्त्रिपरिषद्बाट सरकारका प्रवक्ता ज्ञानेन्द्रबहादुर कार्की सदस्यका रुपमा संयन्त्रमा सहभागी हुनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
