काठमाडौं- प्रधानन्यायाधीश चोलेन्द्र शमशेर राणाको विरोधमा रहेका न्यायाधीशहरुले आन्दोलनको कार्यक्रमलाई निरन्तरता दिँदै बन्दीको मुद्दा सुनुवाइ गर्दा प्रधानन्यायाधीशसँगको संयुक्त इजलास भने बहिष्कार गरेका छन्।
प्रधानन्यायाधीश राणाले यसअघि आफूलाई इजलास नतोक्ने बताएको अवस्थामा आफू र कुमार चुडालको इजलास गठन गरेका थिए। चुडालको एकल इजलाससमेत तोकिएको थियो।
बिहान सुरुमा प्रधानन्यायाधीशको पेसीका विषयमा न्यायाधीशहरुले सामूहिक छलफल गरेका थिए। छलफलपछि न्यायाधीश चुडाल आफ्नो एकल इजलासमा जाने तर प्रधानन्यायाधीशसँग 'बेञ्च सेयरिङ' नगर्ने भन्दै उठेका थिए। लगत्तै अन्य न्यायाधीशहरुले पनि आफूलाई तोकिएको बन्दीको मुद्दा सुनुवाइका लागि इजलास पुगेका थिए।
'प्रधानन्यायाधीशसहितको इजलास हेर्दैनौं, तर बन्दीको मुद्दा सुनुवाइ रोक्दैनौं,' एक न्यायाधीशले भने।
प्रधानन्यायाधीश राणाले सोमबारका लागि दुई एकल र चार संयुक्त गरी छ वटा इजलास गठन गरी बन्दी प्रत्यक्षीकरणसम्बन्धी रिटको सुनुवाइका लागि पेसी तोकेका थिए।
राणा र चुडालबाहेक पाँचवटा इजलासमा सुनुवाइ भएका छन्। न्यायाधीशहरुले आफूहरुले प्रश्न उठाएका प्रधानन्यायाधीश राणासँग इजलासमा सँगै बस्न नसकिने भन्दै आएको अवस्थामा संयुक्त इजलास नबसेको हो।
चुडालले चियाअघि नै एकल इजलासमा कारण देखाऊ आदेश जारी गरेका थिए। चिया समयपछि प्रधानन्यायाधीशसहितको इजलासमा उनी बस्छन् कि बस्दैनन् भनी चासोका साथ हेरिएको थियो। तर, न्यायाधीश चुडाल प्रधानन्यायाधीशसहितको इजलास बस्न नगएपछि उक्त मुद्दा अर्को दिनका लागि स्थगित भएको छ।
प्रधानन्यायाधीश राणाले आफ्नो इजलासमा पनि एक थान बन्दी प्रत्यक्षीकरणको निवेदन राखेका थिए। उक्त निवेदन तामेलीमा पठाउन माग गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
