काठमाडौं- असोज ३१ गतेदेखि परेको भारी वर्षाले प्रदेश १ मा ७० जनाको मृत्यु भएको छ।
अविरल वर्षाले प्रदेश १ का जिल्लामा सबैभन्दा बढी भौतिक क्षति पाँचथरमा भएको छ। पाँचथरमा २८ जनाले ज्यान गुमाएका छन्। इलाममा १४, सुनसरीमा ११, धनकुटामा ७, मोरङमा ६, उदयपुरमा दुई, सोलुखुम्बु र भोजपुरमा एक/एक जनाको मृत्यु भएको छ।
मुख्यमन्त्री भीम आचार्यले प्रदेशमा १८ जना घाइते उपचारत र १२ जना बेपत्ता रहेको जानकारी दिए। पूर्णरुपमा क्षति भएका घरको संख्या ४० रहेको छ। आंशिक क्षति भएका घरको संख्या एक हजार ८२५ रहेको प्रदेश सरकारले जानकारी दिएको छ।
प्रदेश १ मा धानबालीमा सर्वाधिक क्षति झापामा भएको छ। मुख्यतः पाकेको धान वर्षाका कारण नष्ट हुन पुगेको छ। मुख्यमन्त्री आचार्यका अनुसार प्रदेशका जिल्लाहरुमा १० हजार हेक्टर क्षेत्रफलको धान नष्ट भएको छ। वर्षाले असर ५० हजार हेक्टर क्षेत्रफलमा गरेको जानकारी दिँदै आचार्यले पाकेको धानमा पुगेको क्षति भने १० हजार हेक्टरमा रहेको बताए।
कूल धानबालीमध्ये १५ प्रतिशतमा असर रहेको बताइएको छ। काट्न बाँकी धानमा असर गरे पनि पूर्णनष्ट नभएकाले क्षतिको प्रतिशत आठ हुने प्रदेश सरकारको आकलन छ।‘सम्पूर्णतामा साढे सात वा आठ प्रतिशत धानबाली नष्ट हुने विवरणमा देखिएको छ,’आचार्यले भने।
पशुपन्छीमा पुगेको क्षति विवरण संकलनकै क्रममा रहेको बताइएको छ। ‘विवरण संकलनकै क्रममा रहेका छौं। किसानका फर्मबाट हजारौं हजार कुखुराहरु मरेको सूचना प्राप्त भइरहेको छ,’ मुख्यमन्त्री आचार्यले प्रदेश सभाको बैठकमा भने।
घाइतेको नि:शुल्क उपचार गर्ने र पूर्णक्षति भएका घरको लागि तीन लाख रुपैयाँ राहत रकम प्रदेश सरकारले उपलब्ध गराउने भएको छ। आंशिक क्षतिमा ३५ हजार र सामान्य क्षतिमा १५ हजार रुपैयाँ पीडित परिवारलाई उपलब्ध गराउने निर्णय प्रदेश सरकारले गरेको छ।
धानबाली र पशुपन्छीमा भएको क्षतिमा राहत कति दिने सन्दर्भमा छलफलकै क्रममा रहेको आचार्यले बताए। पीडित किसानलाई नोक्सान भएको धानको २५ प्रतिशत राहत उपलब्ध गराउने जानकारी गराए।
लगातार ३६ घण्टाभन्दा बढी समय परेको वर्षाले प्रदेश १ का अधिकांश सडक अवरुद्ध भएका थिए। बिहीबार साँझबाट सबै राजमार्ग सञ्चालनमा आएको बताइएको छ। ग्रामीण केही सडकमा भने अझै सञ्चालनमा आउन सकेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
