काठमाडौं- प्रदेश १ का मुख्यमन्त्री भीम आचार्यले यही कात्तिक ७ गते विश्वासको मत लिने भएका छन्। उनले कात्तिक ७ गते दिउँसो १२:३० मा बस्ने प्रदेश सभा बैठकमा विश्वासको मत लिने भएका हुन्।
जसका लागि उनले शुक्रबारको प्रदेश सभा बैठकमा प्रस्ताव पेस गरिसकेका छन्। अब उनको पदको छिनोफानो ७ कात्तिकमा हुने भएको हो।
संविधानको धारा ११८ को उपधारा २ बमोजिम आफूमाथि प्रदेश सभामा विश्वास छ भनी उनले प्रस्ताव पेस गरेका हुन्। त्यसपछि सभामुख प्रदीपकुमार भण्डारीले कात्तिक ७ गते आइतबार दिउँसो १२:३० मा बस्ने बैठकमाा विश्वासको मत सम्बन्धी प्रस्तावमा मत विभाजित हुने भन्दै आजको बैठक स्थगित गरे।
सरकारको नेतृत्वकर्ता एमाले विभाजन भएपछि आचार्य अल्पमतमा छन्। एमालेका १० जना प्रदेश सभा सदस्यले एकीकृत समाजवादी रोजेका छन्।
कुल ९३ सदस्य रहेको प्रदेश सभामा मुख्यमन्त्रीको पक्षमा ४१ जना सांसद मात्रै छन्। गठबन्धनमा कांग्रेस २१, माओवादी केन्द्र १५, एकीकृत समाजवादी १० र जसपा ३ जना गरी गठबन्धनमा ४९ जना सांसद छन्।
सत्तारूढ गठबन्धनले यसअघि नै प्रदेश १ मा मुख्यमन्त्री परिवर्तन गर्ने भनेका छन्। विश्वासको मत नलिए अविश्वासको प्रस्ताव दर्ता गर्ने चेतावनी दिइसकेको गठबन्धनले नेकपा (एकीकृत समाजवादी)का सांसद राजेन्द्र राईलाई मुख्यमन्त्रीका रूपमा अघि सारेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
