काठमाडौं- बुटवल उपमहानगरपालिका-१७ मोतिपुरस्थित मोतीपुर औद्योगिक क्षेत्रमा भएको झडपमा चार स्थानीयको मृत्यु भएको छ। घटनामा अन्य ३३ प्रहरीसहित ४९ जना घाइते भएका छन्।
आइतबार बिहान निर्माणाधिन मोतिपुर औद्योगिक क्षेत्रमा सुरक्षाकर्मी र बस्तीका स्थानीयबीच झडप भएको हो।
उक्त झडपमा सुरक्षाकर्मीले गोली चलाउँदा कपिलवस्तुस्थित वाणगंगा नगरपालिका-१० बस्ने २० वर्षीय रमेश परियार र हाल नाम, थर, वतन नखुलेका अन्य ३ गरी ४ जनालाई उपचारको लागि ल्याउँदै गर्दा बाटोमा मृत्यु भएको जिल्ला प्रहरी कार्यालय रुपन्देहीले जनाएको छ।
यस्तै, झडपमा नेपाल प्रहरीतर्फ ३३ सुरक्षाकर्मी घाइते भएका छन्। घाइते हुनेमा प्रहरी नायव उपरीक्षक मदन कुँवर, प्रहरी निरीक्षक चक्रबहादुर डरमपाल, प्रहरी नायव निरीक्षकहरू नवीन चालीसे, भरतराज पन्थी तथा बाबुराम घिमिरे र प्रहरी सहायक निरीक्षक विमला विक रहेका छन्।
यस्तै, प्रहरी हवल्दार जगन्नाथ डागी, प्रहरी जवानहरू रिजन थापा, गोविन्द चौधरी, झबिन्द्र परियार, विनोद परियार, अनिता कुँवर, मेघराज पुन, राकेश यादव, राज लौनिया, जितेन्द्र पुन, जगबिर पुन, प्रदिप ठाकुर, सुर्यनाथ रेग्मी, जय कुमार चौधरी, विरेन्द्र सुनारी, झरना परियार, लिला वली, सुजन सोमरे, अजय कुँवर, मनराज घर्ती मगर, निरशंकर केसी, सुरेन्द्र रोका, खगेन्द्र प्रसाद यादव, महेन्द्र वली, अभिषेक बस्नेत, टेकबहादुर पल्ली र भरत गयल मगर रहेका छन् ।
घाइते प्रहरी कर्मचारीमध्ये २५ जनाको लुम्बिनी प्रादेशिक अस्पताल, ७ जनाको मेडिकल कलेज भैरहवा र १ जनाको चौराह हस्पिटल बुटवलमा उपचार भइरहेको छ ।
प्रदर्शनकारीतर्फ १६ जना घाइतेमध्ये ४ जनाको अवस्था गम्भीर रहेको बताइएको छ। यस्तै, ४ जनाको अवस्था मध्यम र अन्यको अवस्था सामान्य रहेको छ । उनीहरूमध्ये १२ जनाको लुम्बिनी प्रादेशिक अस्पताल र ४ जनाको मेडिकल कलेज भैरहवामा उपचार भइरहेको प्रहरीले जनाएको छ।
गत फागुनमा शिलान्यास गरिएको औद्योगिक क्षेत्रमा अतिक्रमण बढेको भन्दै सरकारले अस्थायी रुपमा सशस्त्र प्रहरीलाई बसाउने निर्णय गरेको थियो। सरकारको निर्णयानुसार सशस्त्र प्रहरीले ठाउँ खाली गराउने क्रममा आइतबार जग्गामा बस्दै आएकाहरु विरोध प्रदर्शनमा उत्रिएका थिए।
प्रदर्शनकारीले ढुंगा–मुडा गर्न थालेपछि स्थिति नियन्त्रणमा लिन केही राउण्ड फायर गरिएको रुपन्देही प्रहरीले जानकारी दिएको छ।
उक्त स्थानमा जिल्ला प्रशासन कार्यालय रुपन्देही समेतबाट असोज २४ गते १६:०० बजेदेखि लागू हुने गरी अर्को सूचना जारी नभएसम्मको लागि कर्फ्यू आदेश जारी भएको छ।
उक्त स्थानमा जिल्ला प्रहरी कार्यालय रुपन्देहीसमेतबाट थप प्रहरी टोली खटाइ आवश्यक अनुसन्धान गरिरहेको र हालको अवस्था सामान्य रहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
