काठमाडौं– रुपन्देहीको बुटवलअन्तर्गत मोतीपुर औद्योगिक क्षेत्रमा सशस्त्र प्रहरीले चलाएको गोली लागेर घाइते भएका ४ जनाको मृत्यु भएको छ।
मोतिपुर औद्योगिक क्षेत्रमा सुरक्षाकर्मी र बस्तीका स्थानीयबीच झडप हुँदा सुरक्षाकर्मीले चलाएको गोली लागेर ३२ जना घाइते भएका थिए।
घाइतेमध्ये ४ जनाको उपचारका लागि भैरहवास्थित युनिभर्सल मेडिकल कलेजमा पुर्याउने क्रममा मृत्यु भएको हो। युनिभर्सल मेडिकल कलेजका सूचना अधिकारी तेज केसीले अस्पताल ल्याउँदै गरेको अवस्थामा ४ जनाको मृत्यु भएको जानकारी दिए।
‘गोली लागेर घाइते भएका १३ जनालाई उपचारका लागि यहाँ ल्याइएको थियो। त्यसमा ५ जना प्रहरी हुन्,’ उनले भने,‘४ जनाको मृत्यु भएको छ। ९ जना उपचार भइरहेको छ। घाइतेमध्ये ५ जनाको अवस्था गम्भीर छ।’
प्रहरीका अनुसार मृतक सबै सर्वसाधारण हुन्। तर, मृतकको पहिचान भने खुलेको छैन। नेपाल प्रहरीका प्रवक्ता प्रहरी वरिष्ठ उपरीक्षक (एसएसपी) बसन्त कुँवरले प्रहरीतर्फ ८ जना घाइते भएका जानकारी दिए। नेपाल प्रहरी र सशस्त्र प्रहरीका गरी ८ जना घाइत भएका एसएसपी कुँवरको भनाइ छ।
सुकुम्बासीका नाममा औद्योगिक क्षेत्रको जग्गा कब्जा गर्न खोज्नेहरुलाई हटाउने क्रममा झडप भएपछि सशस्त्र प्रहरीले गोली चलाएको थियो।
गत फागुनमा शिलान्यास गरिएको औद्योगिक क्षेत्रमा अतिक्रमण बढेको भन्दै सरकारले अस्थायी रुपमा सशस्त्र प्रहरीलाई बसाउने निर्णय गरेको थियो। सरकारको निर्णयानुसार सशस्त्र प्रहरीले ठाउँ खाली गराउने क्रममा आइतबार जग्गामा बस्दै आएकाहरु विरोध प्रदर्शनमा उत्रिएका थिए।
प्रदर्शनकारीले ढुंगा–मुडा गर्न थालेपछि स्थिति नियन्त्रणमा लिन केही राउण्ड फायर गरिएको रुपन्देही प्रहरीले जानकारी दिएको छ। प्रहरी र स्थानीयबीचको झडपले स्थिति थप तनावग्रस्त बनेपछि स्थानीय प्रशासनले आइतबार अपराह्न ४ बजेदेखि लागू हुने गरी कर्फ्यू आदेश समेत जारी गरेको छ।
सरकारले २०७२ सालमा बुटवल उप–महानगरपालिकासहित तिलोत्तमा नगरपालिका, सियारी र शुद्धोधन गाउँपालिकासित जोडिएको तिनाउ नदी उकास क्षेत्रको सार्वजनिक जग्गामा औद्योगिक क्षेत्र बनाउने घोषणा गरेको थियो। उद्योगिक क्षेत्रको गत फागुनमा शिलान्यास समेत भएको थियो।
तर, उद्योगिक क्षेत्रको जग्गा भने सुकुम्बासीका नाममा अतिक्रमण गर्ने क्रम बढेपछि सरकारले अस्थायी रुपमा त्यहाँ सशस्त्र प्रहरी बसाउने निर्णय गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
