काठमाडौं– साढे ३३ किलोसहितको ३८ सय किलो सुन तस्करीको मुद्दाका सबै अभियुक्तले सफाइ पाएका छन्।
मोरङ जिल्ला अदालतले मुख्य भनिएका गोरे भनिने चूडामणि उप्रेतिसहित विरुद्ध लगाइएको सुन तस्करीको अभियोग पुष्टि हुने आधार नदेखिएको भन्दै सबैले सफाइ पाउने फैसला सुनाएको हो।
सुन तस्करी तथा मोरङका सनम शाक्य हत्या प्रकरणमा कर्तव्य ज्यान र अपहरण तथा शरीर बन्धकको अभियोग लागेका ८ जना मात्रै दोषी ठहर भएका छन्। जसमध्ये गोरेसहित ६ जनाले कर्तब्य ज्यान मुद्दामा जन्म कैदको सजाय पाएका छन्। अदालतले गोरेविरुद्ध अपहरण तथा शरीर बन्धकको अभियोग पनि पुष्टि हुने ठहर गरेको छ।
गोरेसहित मोहन काफ्ले, टेकराज मल्ल, लाक्पा शेर्पा, नरेन्द्र कार्की र भोजराज भण्डारीलाई जन्म कैदको सजाय तोकिएको छ। यस्तै, राजन कुमारलाई ३ वर्ष र मदनप्रसाद घिमिरेलाई ६ महिना कैद सजाय तोकिएको छ।
१८ फागुन २०७४ मा मोरङको उर्लाबारीका सनम शाक्यको हत्या भएपछि सुरु भएको अनुसन्धानले हत्या घटनामा सुन तस्करी गर्ने गिरोहको संलग्नता देखिएको खुलेको थियो।
अनुसन्धानको क्रममा २०७४ माघमा हवाई मार्ग हुँदै विदेशबाट नेपाल भित्रिएको साढे ३३ किलो सुन हराएको भन्दै तस्करको समूहले शनमलाई यातना दिएर मारेको खुलेको थियो।
आपराधिक समूह नै स्थापना गरेर सुन तस्करी गरेको देखिएको भन्दै गृह मन्त्रालयले सह–सचिवको नेतृत्वमा समिति गठन गरेर विस्तृत छानबिन गरेको थियो। छानबिनका क्रममा प्रहरीका उच्च अधिकारी (डीआईजी)देखि 'प्रभावशाली' व्यापारीहरुको समेत सुन तस्करीमा संलग्नता रहेको खुलेको दाबी गरिएको थियो।
संगठित आपराधिक समूह स्थापना गरी २०१५ जुलाईदेखि २०१६ अगस्टसम्म १७ अर्ब १ करोड ८० लाख ७१ हजार ४ सय ७३ रुपैयाँ बरावरको ३७ लाख ९९ हजार ५ सय ६३ ग्राम बराबरको सुन तस्करी भएको भन्दै प्रतिवेदन बुझाएको थियो।
गृह मन्त्रालयको समितिले गरेको अनुसन्धान अनुसार नै जिल्ला प्रहरी कार्याल मोरङले प्रतिवेदन तयार पारी सुरुमा ६३ जनाविरुद्ध मुद्दा चलाउन भन्दै जिल्ला सरकारी वकिल कार्यालय मोरङलाई सिफारिसर गरेको थियो। जिल्ला सरकारी वकिल कार्यालय मोरङले १९ वैशाख २०७५ मा गोरे भनिने चूडामणि उप्रेतीलाई मुख्य अभियुक्त बनाइ ६३ जनाविरुद्ध मुद्दा दर्ता गरेको थियो। त्यसपछि ३ पटक गरी थप १४ जनाविरुद्ध सुन तस्करी प्रकरणमा मुद्दा दर्ता भएको थियो।
नेपाल प्रहरीका पूर्व डीआईजी गोविन्द निरौला, एसएसपी (हाल डीआजईजी) दिवेश लोहनी, एसपी विकासराज खनाल, डिएसपी प्रजित केसी, सई बालकृष्ण सञ्जेललाई सुन प्रकरणमा प्रतिवादी बनाइएको थियो। थुनछेक बहसपछि जिल्ला अदालतले सुरुमा उनीहरुलाई पुर्पक्षका लागि थुनामा पठाएको थियो। पछि उच्च अदालत विराटनगरको आदेशानुसार उनीहरु साधारण तारेखमा रिहा भएका थिए।
यस्तै, व्यापारी विमल पोद्दार, राजेन्द्रमान शाक्य, रामकुमार तिवारी, प्रभात अग्रवाल, राजकुमार दारुका, मदनप्रसाद घिमिरे, शैयत अक्बर र इम्तियाज लगायतलाई भने उच्च अदालत विराटनगरले धरौटीमा छाडेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
