काठमाडौं- महानगरीय ट्राफिक प्रहरी महाशाखाले उपत्यकाका विभिन्न स्थानबाट हराएकामध्ये २१ मोटरसाइकल फेला पारी सम्बन्धित धनीलाई जिम्मा लगाएको छ। हस्तान्तरण गरिएका २४ मध्ये १० वटा मोटरसाइकल र ११ वटा स्कुटर रहेका छन्।
ट्राफिक प्रहरी महाशाखाबाट खटिएको सादा पोसाकको टोलीले खोजतलास गरी विभिन्न स्थानबाट नियन्त्रणमा लिएका मोटरसाइकलहरु महाशाखाका प्रमुख प्रहरी वरिष्ठ उपरीक्षक जनक भट्टराईले सम्बन्धित धनीलाई हस्तान्तरण गरेका हुन्।
हस्तान्तरण कार्यक्रममा बोल्दै एसएसपी भट्टराईले विशेष सूचना संकलन र निगरानी गरी उपत्यका तथा आसपासको इलाकाबाट मोटरसाइकलहरु बरामद गरिएको र चोरीमा संलग्न मानिसहरुलाई पक्राउ गरी आवश्यक कारबाहीका लागी तत्कालै विभिन्न प्रहरी वृत्तमा पठाउने गरेको जानकारी दिए। उनले हराएका मोटरसाइकल खोजतलास र चोरी नियन्त्रण कार्य निरन्तर हुँदै आएको छ। तर, अब भने हराउनै नदिनका लागि धनीसमेत विशेष चनाखो र सजक हुनुपर्ने दिन आएको एसएसपी भट्टराईले बताए।
‘विशेषगरी स्कुटरको सवारी दर्ता किताब (ब्लुबुक) डिकीमै राख्ने चलन रहेको हुन्छ, चोरीपश्चात् नम्बर प्लेटसमेत परिवर्तन नगरी ट्राफिक चेकिङमा सोही ब्लुबुक देखाउने गरेकोसमेत पाइएको छ,’ उनले भने।
पछिल्लो समय उपत्यकाबाट दुईपाङ्ग्रे सवारीसाधनमध्ये डियो स्कुटर र पल्सर मोटरसाइकल बढी चोरी हुने गरेको महाशाखाको तथ्यांकले देखाएको छ। धनीले दिएको निवेदन हुलियाको आधारमा विभिन्न पार्किङस्थलहरुबाट समेत नियन्त्रणमा लिएका महाशाखाले जनाएको छ।
महाशाखाले पछिल्लो समय सवारीसाधन चोरी घटनालाई न्यूनीकरण एवं नियन्त्रण गर्ने अभियानलाई प्रभावकारी एव परिणाममुखी बनाउन सादा पोसाकमा थप ट्राफिक प्रहरी परिचालन गरेको छ। यस आर्थिक वर्षमा हराएका ३२६ मोटरसाइकलमध्ये १४६ मोटरसाइकल नियन्त्रणमा लिएको छ। १४६ मध्ये १२२ वटा मोटरसाइकल सम्बन्धित धनीलाई जिम्मा लगाएको र अन्य २४ वटाको धनी पत्ता लगाउने कार्य भइरहेको महाशाखाले जनाएको छ।
मोटरसाइकल चोरीमा संलग्न १९ जना व्यक्तिलाई विभिन्न स्थानहरुबाट चोरीका मोटरसाइकलसहित पक्राउ गरी सम्बन्धित प्रहरी वृत्तहरुमा कारबाहीका लागि पठाएकोसमेत महाशाखाले जनाएको छ। चाडपर्वको मौका छोपी मोटरसाइकल चोरीका घटनाहरु बढ्नसक्ने आकलन गरी विशेष सुरक्षा योजना कार्यान्वयन गर्न थप सादा पोसाकमा ट्राफिक प्रहरी परिचालन गरी चेकजाँचलाई समेत कडाइ गरेको छ। चाडपर्वको समयमा किनमेल गर्ने भीडभाड हुने स्थानहरुमा जथाभावी पार्किङ नगर्न र अतिरिक्त लकहरुको प्रयोग गरी सुरक्षाका उपायहरु अपनाउन महाशाखाले विशेष अनुरोध गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
