काठमाडौं– एमाले, माओवादी र नयाँ शक्ति लगायतका पार्टीबीच बृहत्तर एकता गरी अघि बढ्ने छलफल चलिरहँदा संघीय समाजवादी फोरम पनि यसमा जोडिएको छ। माओवादी केन्द्रका अध्यक्ष पुष्पकमल दाहाल ‘प्रचण्ड’ र संघीय समाजवादी फोरमका अध्यक्ष उपेन्द्र यादवबीच मिलेर जाने विषयमा मंगलबार लामो छलफल भएको छ।
‘आगामी चुनावमा मिलेर जाऊँ भन्ने प्रस्ताव थियो, प्रचण्डजीको। कुरामात्र चलेको हो, टुंगो भएको छैन। यस विषयमा पार्टीमा हामीले छलफल थालेका मात्र छौ,’ यादवले भने। प्रचण्डले प्रतिनिधि सभा, प्रदेश सभाको सदस्य संख्या र त्यसपछि गठन हुने सरकार तथा प्रदेश मुख्य मन्त्रीबारे आफ्नो दाबी पेश गर्न यादवलाई आग्रह गरेका थिए।
भागबन्डा मिलाएर संयुक्त रुपमा चुनावमा जाने प्रचण्डको प्रस्तावमा यादवले भने, ‘यतिधेरै पार्टी एकसाथ मिल्दा कसरी समानुपातिक प्रतिनिधित्व सुनिश्चित हुन्छ? संख्यामा जित्ने हो कि मुद्दामा त्यो पनि स्पष्ट हुनुपर्छ।’
माओवादी अध्यक्ष प्रचण्डले तत्काल सत्ता गठबन्धन फेरेर प्रधानमन्त्री हुने र चुनावपछि राष्ट्रपति हुनेबाहेक अन्य कुरामा ध्यान नै नदिएको एकता वार्तामा सहभागी एक नेताले बताए । यस प्रक्रियामा उनले आफ्ना पुराना सहयात्री नयाँ शक्ति नेपालका संयोजक बाबुराम भट्टराईलाई समेत मिलाईसकेका छन्।
‘हो हामी पनि बृहत्तर वामपन्थी, प्रगतिशील एकता अभियानमा सामेल भएका छौ,’ नयाँशक्ति नेपालका संयोजक बाबुराम भट्टराईलाई उद्धृत गर्दै उनका स्वकीय सचिव विश्वदीप पाण्डेले भने। काँग्रेससँग मिलेर मधेस मुद्दालाई अस्थायी रुपमै भए पनि ठेगान लगाइसकेपछि उसँगको सहकार्य आवश्यक नभएको प्रचण्डको बुझाई छ।
‘हमेसा स्थायी दुश्मन रहेको काँग्रेसभन्दा वामपन्थी एकता नै उचित हो। हिजो एमालेले सत्ता हस्तान्तरणमा जालझेल गरेकालेमात्र सम्बन्ध टुटेको हो। नत्र एमालेसँग गठबन्धन गर्दा नै कम्तीमा पनि १० वर्षसम्म सँगै जाने सहमति भएको थियो। एमाले त्यसमा अडेन, अब भने लिखित र पारदर्शी सहमतिसहित अघि बढ्छौ,’ माओवादी केन्द्रका एक शीर्ष नेताले भने।
प्रदेश–२ मा भएको स्थानीय तहको तेस्रो चरणको निर्वाचनमा एमाले पाँचौ स्थानमा खुम्चिएपछि अध्यक्ष केपी ओलीले यो बृहत्तर गठबन्धनमा कुनै एउटा मधेसी दललाई सामेल गर्नु जरुरी भएको भन्दै प्रचण्डलाई वार्तामा अघि सारेका हुन्। एमाले मधेस विरोधी पार्टी हो भन्ने चिर्न पनि कुनै मधेसी दल यो गठबन्धनमा समेट्न एमाले र माओवादीले हर सम्भव प्रयास गरिरहेका छन्।
राष्ट्रिय जनता पार्टी (राजपा) गठबन्धन तोड्नसमेत प्रयास भएको राजपा अध्यक्ष मण्डलका एक नेता महेन्द्र राय यादवले बताए। ६ वटा दल मिलेर बनेको राजपाका केही शीर्ष नेताहरु पनि एक्लै चुनावमा जाने मनस्थितिमा नभएकाले कांग्रेस वा एमाले नेतृत्वको गठबन्धनसँग मिल्नुपर्ने अडानमा छन् । तर आफूहरुलाई सबैचन्दा बढि चिढाएको एमाले गठबन्धनमा जाँदा आफ्नो जनमतमा प्रतिकूल प्रभाव पर्ने भएकाले काँग्रेससँग छलफल चलाउने तयारीमा राजपा नेतृत्व पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
