काठमाडौं– साढे ३३ किलोसहित ३८ सय किलो सुन तस्करी र मोरङका सनम शाक्य हत्या प्रकरणको मुद्दामा जिल्ला अदालत मोरङमा जारी अन्तिम सुनुवाइअन्तर्गत प्रतिवादीका कानुन व्यवसायीको बहस सुरु भएको छ।
जिल्ला न्यायाधीश भरत लम्सालको इजलासमा शुरु भएको अन्तिम सुनुवाइमा सरकारी वकिलको बहसपछि प्रतिवादीका निजी कानुन व्यवसायीले बहस थालेका हुन्। प्रतिवादीका निजी कानुन व्यवसायीहरुले सोमबारदेखि नै बसह थालेकोमा बुधबारसम्म ३ जनाले मात्रै बहस गर्न भ्याएका छन्। अब भने प्रतिरक्षामा बसह गर्ने कानुन व्यवसायीको संख्या बढ्न सक्ने जिल्ला अदालत मोरङका सूचना अधिकारी राजेन्द्रप्रसाद धमलाले बताए।
प्रतिवादीका पक्षमा बहस गर्न ८० भन्दा धेरै कानुन व्यवसायीले वकालातानामा दर्ता गराएका छन्। वकालतनामा दर्ता गराउने क्रम जारी रहेकाले प्रतिरक्षामा बहस गर्ने कानुन व्यवसायीको संख्या अझै बढ्नसक्ने सूचना अधिकारी धमलाले जानकारी दिए।
७७ जना प्रतिवादी भएको मुद्दा भएकाले सबै प्रतिवादीले १–१ जना मात्रै कानुन व्यवसायी राख्दा पनि कानुन व्यवसायीको संख्या धेरै हुने देखिएको छ। जसकारण सबैले बहस गर्न पाउने गरी समय व्यवस्थापनको तयारी भइरहेको धमलाले जानकारी दिए।
२०७४ मंसिरमा हवाईमार्ग हुँदै विदेशबाट तस्करी गरेर ल्याइएको साढे ३३ किलो सुन हराएको भन्दै तस्करको समूहले १८ फागुन २०७४ मा मोरङको उर्लाबारीका सनम शाक्यको हत्या गरेको थियो। सनमको हत्या घटनाको अनुसन्धानकै क्रममा साढे ३३ किलोसहित ३८ सय किलो सुन तस्करी प्रकरण बाहिरिएको थियो।
गृह मन्त्रालयले सुन तस्करी र शाक्यको हत्या प्रकरणको अनुसन्धानका लागि गृह मन्त्रालयका सह–सचिवको नेतृत्वमा समिति गठन गरेको थियो। गृह मन्त्रालयको समितिको छानबिनका आधारमा जिल्ला प्रहरी कार्यालय मोरङले ६३ जनाविरुद्ध मुद्दा चलाउन भन्दै जिल्ला सरकारी वकिल कार्यालय मोरङलाई प्रतिवेदन बुझाइएको थियो।
जिल्ला सरकारी वकिल कार्यालय मोरङले १९ वैशाख २०७५ मा गोरे भनिने चूडामणि उप्रेतीलाई मुख्य अभियुक्त बनाइ ६३ जनाविरुद्ध मुद्दा दर्ता गरेको थियो। त्यसपछि ३ पटक गरी थप १४ जनाविरुद्ध सुन तस्करी प्रकरणमा मुद्दा दर्ता भएको थियो।
विभिन्न समयमा प्रतिवादी बनाइएका ७७ जनाविरुद्ध कर्तब्य ज्यान, ज्यान मार्ने उद्योग, अपहरण तथा शरीर बन्धक, संगठित अपराध, राजस्व छलि लगायतका आधा दर्जन अलग–अलग अभियोग लगाइएको छ।
सुन तस्करी तथा शाक्यको हत्या प्रकरणमा नेपाल प्रहरीका उच्च अधिकारीदेखि व्यापारीसम्म तानिएका थिए। मोरङ जिल्ला अदालतले नेपाल प्रहरीका पूर्व डीआईजी गोविन्द निरौला, एसएसपी (हाल डीआजईजी) दिवेश लोहनी, एसपी विकासराज खनाल, डिएसपी प्रजित केसी, सई बालकृष्ण सञ्जेललाई पुर्पक्षका लागि थुनामा पठाएको थियो। पछि उनीहरुलाई उच्च अदालत विराटनगरले साधारण तारेखमा रिहा गरेको थियो।
मोरङ जिल्ला अदालतले पुर्पक्षका लाथि थुनामा पठाएका रामकुमार तिवारी, प्रभात अग्रवाल, विमल पोद्दार, राजेन्द्रकुमार शाक्य, राजकुमार दारुका, मदनप्रसाद घिमिरे, शैयत अक्बर र इम्तियाज लगायतलाई भने उच्च अदालत विराटनगरले धरौटीमा छाडेको थियो।
२०१५ जुलाईदेखि २०१६ अगस्टसम्म संगठित आपराधिक सन्जाल बनाएर १७ अर्ब १ करोड ८० लाख ७१ हजार ४ सय ७३ रुपैयाँ बरावरको ३७ लाख ९९ हजार ५ सय ६३ ग्राम बराबरको सुन तस्करी गरेको मुद्दामा जिल्ला अदालत मोरङले केही दिन अगाडिदेखि अन्तिम सुनुवाइ सुरु गरेको हो।
अन्तिम सुनुवाइमा प्रतिवादीका तर्फबाट बहस गर्न काठमाडौंदेखि पनि वरिष्ठ अधिवक्ताहरु मोरङ आउन लागेका जिल्ला अदालत स्रोतले जानकारी दिएको छ।
सरकारी पक्षबाट सरकारी वकिलको कार्यालय मोरङका जिल्ला न्यायाधिवक्ता रामहरि काफ्ले, सहायक जिल्ला न्यायाधिवक्ता मनीषबाबु पोखरेल र तेजबहादुर सिँजाली मगरले बहस गरिसकेका छन्। प्रतिबादीका कानुन व्यवसायीले पनि बहस सुरु गरिसकेका छन्। प्रतिवादीका कानुन व्यवसायीको बहस सकिएपछि सरकारी वकिलले जवाफी बहस गर्नेछन्। सरकारी वकिलको जवाफी बहस सकिएपछि अदालतले मुद्दामा फैसला सुनाउने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
