काठमाडौं– नेत्रबिक्रम चन्द (विप्लव) नेतृत्वको नेपाल कम्युनिस्ट पार्टी मूलधार (खुला राजनीति)मा आएपछि सरकारले आन्तरिक सुरक्षा व्यवस्थामा खासै चुनौती नभएको दाबी गर्दै आएको छ।
आन्तरिक सुरक्षा व्यवस्थाको जिम्मेवारी पाएको गृह मन्त्रालयका अधिकारी र नेपाल प्रहरीका अधिकारीहरु देशको समग्र शान्ति सुरक्षाको व्यवस्था सामान्य नै रहेको बताउँछन्। तर, संघीय राजधानी काठमाडौंमा भने पछिल्लो समयमा दिनदहाडै खुकुरी प्रहारका घटना बढिरहेका छन्।
सोमबार मात्रै पशुपति मन्दिर परिसरमा सामान्य विषयमै एक ‘बाबा’माथि दिनदहाडै खुकुरी प्रहार भयो। गाँजा माग्दा नदिएको भन्दै युवाहरुको एक समूहले पशुपति मन्दिर परिसरमा ‘बाबा’ सन्तोषमाथि खुकुरी प्रहार गरे। खुकुरी प्रहारबाट घाइते भएका 'बाबा'लाई उपचारका लागि राष्ट्रिय ट्रमा सेन्टर पठाइएको छ।
महानगरीय प्रहरी बृत्त गौशालाका प्रमुख प्रहरी नायव उपरीक्षक (डीएसपी) केशव भट्टराईका अनुसार खुकुरी प्रहारमा संलग्न भएको आशंकामा अहिलेसम्म १२ जनालाई नियन्त्रणमा लिइएको छ। डीएसपी भट्टराई भन्छन्, ‘अहिलेसम्म १२ जना पक्राउ परेका छन्। उनीहरुमाथि अनुसन्धान हुँदैछ।’
पशुपति मन्दिर परिसरको विश्वरुपा मन्दिर परिसर अगाडि सन्तोष ‘बाबा’ माथि खुकुरी प्रहार भएको थियो। सुरुमा युवाहरुको समूले बाबालाई ‘माल (गाँजा) दे’ भन्दै माग गरेका थिए। तर, बाबाले गाँजा नदिएपछि रिसको झोकमा उनीहरुले खुकुरी नै प्रहार गरेका पाइएको प्रहरीले जनाएको छ।
‘बाबा’माथि खुकुरी प्रहार भएको २० दिनअघि मात्रै कालिमाटीमा दिनदहाडै खुकुरी प्रहार भएको थियो। भदौ १८ गते गुण्डा नाइके भनेर चिनिने समीरमानसिंह बस्नेत (हाल निमार्ण व्यवसायी महासंघका अध्यक्ष शरदकुमार गौचन हत्या आरोपमा पुर्पक्षमा जेलमा रहेका) का भतिज अभिमानसिंह बस्नेतको समूहले बाँके नेपालगञ्जका हेमराज शाहीमाथि खुकुरी प्रहार गरेको थियो।
कालिमाटीको तरकारी बजार पछाडिको क्लब गल्लीमा शाहीमाथि खुकुरी प्रहार भएको थियो। खुकुरी प्रहारबाट घाइते भएका शाहीको ट्रमा सेन्टमार उपचार भइरहेको छ।
खुकुरी प्रहार भएको ११ दिनपछि सीतापाइलाबाट महानगरीय प्रहरी अपराध महाशाखाको टोलीले बस्नेतलाई पक्राउ गरेको थियो। यसअघि भदौ २१ गते महानगरीय प्रहरी परिसर काठमाडौंले यो समूहका ३ युवतीलाई पक्राउ गरी सार्वजनिक हितविरुद्धको मुद्दामा म्याद लिएर अनुसन्धान गरिरहेको छ।
यो खुकुरी प्रहारको घटना पनि सोमबारको घटनाजस्तै लागु औषधसँगै जोडिएको छ। प्रहरीका अनुसार लागु औषध कारोबार गर्ने जेन शाहको समूहलाई नेपालगञ्जमा खुकुरी हानेर हेमराज काठमाडौं आएका थिए। हेमराजविरुद्ध नेपालगञ्ज प्रहरीले ज्यान मार्ने उद्योग मुद्दा समेत दर्ता गरेको छ।
नेपालगञ्जमा खुकुरी प्रहार भएको बदला लिन जेन समूहले शाहीमाथि कालिमाटीमा खुकुरी प्रहार गरेको पाइएको छ। युवतीको प्रयोग गरेर भेट्न बोलाउने र आक्रमण गर्ने योजनाअनुसार शाहीमाथि आक्रमण भएको प्रहरी अनुसन्धानबाट खुलेको छ।
प्रहरीका अनुसार यो समूहले गुण्डागर्दीकै शैलीमा एक समूहले अर्को समूहलाई आक्रमण गर्दै आएको पाइएको छ। यो समूहबाट प्रहरीले ३ वटा खुकुरी समेत बरामद गरेको थियो। खुकुरी हान्ने समूहका सदस्य अझै फरार नै छन्। बस्नेतले भने खुकुरी हान्नेलाई संरक्षण गरेको आरोप लागेको छ।
यसभन्दा अघि गत वर्षको असोज २९ गते पनि मध्यबानेश्वरमा दिनदहाडै खुकुरी प्रहार भएको थियो। मध्यबानेश्वरमा रहेको ग्लोबल आइएमई बैंकका सुरक्षा गार्ड रुद्रबहादुर मगरमाथि खुकुरी प्रहार भएको थियो।
गार्डले नै कम्मरमा भिरेको खुकुरी झिकेर ३१ वर्षीय युवक शशी थापाले गार्डमाथि आक्रमण गरेका थिए। बैंकमा सेवा लिन पुगेका थापा लाइनमा बसेका थिए। सुरक्षा गार्डले लाइन मिलाइरहेका थिए। लाइनकै विषयमा सामान्य विवाद हुँदा नै ती युवाले सुरक्षागार्डकै खुकुरी झिकेर उनैलाई आक्रमण गरेका थिए।
खुकुरी प्रहारबाट सुरक्षा गार्डको हातमा चोट समेत लागेको थियो। खुकुरी प्रहार गर्ने युवालाई गत मंसिर १० गते प्रहरीले पक्राउ गरेको थियो।
त्यसअघि २०७६ जेठमा पनि राजधानीमा एउटा समूहले अर्को समूहलाई दिनदहाडै खुकुरी प्रहार गरी घाइते बनाएको थियो। वौद्ध बस्ने दोलखा घर भएका २१ वर्षीय निमा शेर्पालाई कोटेश्वरमा खुकुरी प्रहार गरी घाइते बनाइएको थियो। कोटेश्वरस्थित एसओएस मोड नजिक चार जनाको समूहले उनीमाटि आक्रमण गरेको थियो। त्यसबेला प्रहरीले सर्लाही घर भएका २४ वर्षीय विशाल मगरलाई पक्राउ गरे पनि अन्य भने फरार थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
